Gorchymyn Gweithrediadau Pysgota Môr (Dyfeisiau Monitro) (Cymru) 2022

Offerynnau Statudol Cymru

2022 Rhif 70 (Cy. 26)

Pysgodfeydd Môr, Cymru

Gorchymyn Gweithrediadau Pysgota Môr (Dyfeisiau Monitro) (Cymru) 2022

Gwnaed

24 Ionawr 2022

Gosodwyd gerbron Senedd Cymru

27 Ionawr 2022

Yn dod i rym

15 Chwefror 2022

Mae Gweinidogion Cymru yn gwneud y Gorchymyn a ganlyn drwy arfer y pwerau a roddir gan adran 5(1) o Ddeddf Pysgodfeydd Môr 1968(1) sydd bellach wedi eu breinio ynddynt hwy(2).

Enwi, cychwyn, rhychwantu a chymhwyso

1.—( 1) Enw’r Gorchymyn hwn yw Gorchymyn Gweithrediadau Pysgota Môr (Dyfeisiau Monitro) (Cymru) 2022.

(2) Daw’r Gorchymyn hwn i rym ar 15 Chwefror 2022.

(3) Mae’r Gorchymyn hwn—

(a) yn rhychwantu Cymru a Lloegr;

(b) yn gymwys mewn perthynas â—

(i) cychod pysgota Cymreig ar y môr, ym mha le bynnag y bônt;

(ii) cychod pysgota perthnasol sy’n pysgota yng Nghymru neu ym mharth Cymru.

Dehongli

2.   Yn y Gorchymyn hwn—

ystyr “cwch pysgota Cymreig” (“Welsh fishing boat”) yw llestr bysgota o lai na 12 metr o hyd sydd—

(a)

wedi ei chofrestru yn y Deyrnas Unedig o dan Ran 2 o Ddeddf Llongau Masnach 1995(3) ac y mae ei chofnod yn y gofrestr honno yn pennu porthladd yng Nghymru y mae’r llestr i’w thrin fel pe bai yn perthyn iddo; a

(b)

wedi ei thrwyddedu o dan adran 15 o Ddeddf Pysgodfeydd 2020;

ystyr “cwch pysgota perthnasol” (“relevant fishing boat”) yw llestr bysgota o lai na 12 metr o hyd sydd wedi ei thrwyddedu o dan adran 15 neu adran 17 o Ddeddf Pysgodfeydd 2020(4), ac eithrio cwch pysgota Cymreig;

ystyr “dyfais fonitro” (“monitoring device”) yw dyfais sydd â rhif adnabod unigryw ac sy’n gallu trosglwyddo’r wybodaeth ofynnol bob 30 eiliad;

ystyr “gweithrediadau pysgota” (“fishing operations”) yw dal pysgod ac mae’n cynnwys gweithgareddau sy’n ategol i hynny;

ystyr “hyd” (“length”) mewn perthynas â chwch pysgota, yw’r hyd a gyfrifir yn unol â’r rheolau a bennir yn Erthygl 2(1) o Reoliad (EU) 2017/1130 Senedd Ewrop a’r Cyngor dyddiedig 14 Mehefin 2017 sy’n diffinio nodweddion llestrau pysgota(5);

ystyr “IRCS” (“IRCS”) yw arwydd galwad radio rhyngwladol y cwch pysgota(6);

ystyr “y person sydd â gofal” (“the person in charge”) yw perchennog, meistr neu siartrwr, os oes un, y cwch pysgota;

ystyr “Rhif Cofrestr Fflyd” (“Fleet Register Number”) yw—

(a)

y rhif cofrestr fflyd y Deyrnas Unedig a aseiniwyd i’r llestr gan yr Ysgrifennydd Gwladol fel y cyfeirir ato yn Erthygl 8 o Reoliad Gweithredu’r Comisiwn (UE) 2017/218(7); neu

(b)

y rhif cofrestr fflyd gyffredin a aseiniwyd i’r llestr gan Aelod-wladwriaeth fel y cyfeirir ato yn Erthygl 8 o Reoliad Gweithredu’r Comisiwn (EU) 2017/218 ar gofrestr fflyd bysgota’r Undeb(8);

ystyr “yr wybodaeth ofynnol” (“the required information”) yw’r wybodaeth a bennir yn erthygl 4.

Rheoleiddio gweithrediadau pysgota

3.—( 1) Ni chaniateir i’r cwch pysgota ymgymryd â gweithrediadau pysgota oni bai—

(a) bod dyfais fonitro wedi ei gosod arno;

(b) yr hysbyswyd Gweinidogion Cymru ynghylch—

(i) rhif adnabod unigryw’r ddyfais fonitro;

(ii) enw’r cwch pysgota y mae’r ddyfais fonitro wedi ei gosod arno;

(iii) Rhif Cofrestru Fflyd neu IRCS y cwch pysgota; ac

(c) bod y ddyfais fonitro yn trosglwyddo’r wybodaeth ofynnol i Weinidogion Cymru o leiaf unwaith ym mhob cyfnod o ddeng munud.

(2) Pan fo’r cwch pysgota yn cael ei ddefnyddio yn groes i baragraff (1), mae’r person sydd â gofal amdano yn euog o drosedd.

Yr Wybodaeth Ofynnol

4.   Yr wybodaeth ofynnol yw—

(a) rhif adnabod unigryw’r ddyfais fonitro;

(b) safle daearyddol diweddaraf y cwch hwnnw gan ddefnyddio cyfesurynnau lledred a hydred ar System Geodetig y Byd 1984(9), gyda chyfeiliornad safle o lai na 10 metr;

(c) dyddiad ac amser, wedi eu mynegi mewn Amser Cyffredinol Cyd-drefnedig, unrhyw safle daearyddol y cwch hwnnw; a

(d) cyflymder a chwrs y cwch hwnnw ar yr adeg honno.

Cyfrifoldebau parhaus ynghylch y dyfeisiau monitro

5.   Rhaid i’r person sydd â gofal am y cwch pysgota wneud pob ymdrech resymol i sicrhau—

(a) nad oes modd gwrthwneud y ddyfais fonitro â llaw;

(b) nad yw’r ddyfais fonitro yn cael ei dinistrio, ei difrodi, ei gwneud yn anweithredol, neu nas amherir â hi fel arall;

(c) nad yw unrhyw antena sy’n gysylltiedig â’r ddyfais fonitro yn cael ei rwystro mewn unrhyw ffordd; a

(d) nad yw’r cyflenwad pŵer i’r ddyfais fonitro yn cael ei dorri.

Methiant Dyfais Fonitro

6.—( 1) Os nad yw’r ddyfais fonitro ar fwrdd y cwch pysgota yn gallu trosglwyddo’r wybodaeth ofynnol, rhaid i’r person sydd â gofal, ar yr adeg y mae’n gwybod, neu y gellir disgwyl yn rhesymol iddo wybod, bod y ddyfais wedi stopio trosglwyddo’r wybodaeth—

(a) hysbysu Gweinidogion Cymru nad yw’r ddyfais fonitro yn gallu trosglwyddo’r wybodaeth ofynnol; a

(b) sicrhau nad yw’r cwch pysgota yn ymgymryd ag unrhyw weithrediadau pysgota pellach hyd nes y gall y ddyfais fonitro drosglwyddo’r wybodaeth berthnasol yn unol ag erthygl 3(1)(c) a bod hysbysiad ynghylch hynny wedi ei roi i Weinidogion Cymru.

(2) Rhaid i hysbysiad o dan baragraff (1)(a) neu (b) gynnwys—

(a) rhif adnabod unigryw’r ddyfais fonitro;

(b) enw’r cwch pysgota y mae’r ddyfais fonitro wedi ei gosod arno;

(c) Rhif Cofrestru Fflyd neu IRCS y cwch pysgota; a

(d) pan fo hynny’n hysbys i’r person sydd â gofal—

(i) yr amser pryd stopiodd y ddyfais fonitro drosglwyddo’r wybodaeth ofynnol;

(ii) y rheswm neu’r rhesymau dros fethiant y ddyfais fonitro i weithio’n gywir;

(iii) pa elfen o’r wybodaeth ofynnol nad yw’r ddyfais fonitro berthnasol yn gallu ei throsglwyddo.

Lesley Griffiths,

y Gweinidog Materion Gwledig a Gogledd Cymru, a’r Trefnydd, un o Weinidogion Cymru

24 Ionawr 2022

NODYN ESBONIADOL

(Nid yw’r nodyn hwn yn rhan o’r Gorchymyn)

Mae’r Gorchymyn hwn yn gymwys o ran cychod pysgota Cymreig (ym mha le bynnag y bônt) a chychod pysgota perthnasol sy’n pysgota yng Nghymru neu ym mharth Cymru. Mae’n rheoleiddio pysgota ar y môr a daw i rym ar 15 Chwefror 2022.

Mae erthygl 2 o’r Gorchymyn hwn yn diffinio termau a ddefnyddir yn y Gorchymyn hwn, gan gynnwys y diffiniad o “cwch pysgota Cymreig” a “cwch pysgota perthnasol” at ddibenion y Gorchymyn hwn.

Mae paragraff (1) o erthygl 3 o’r Gorchymyn hwn yn ei gwneud yn ofynnol i gychod pysgota Cymreig, wrth bysgota yn y môr, a chychod pysgota perthnasol, wrth bysgota yng Nghymru neu ym mharth Cymru, i fod â dyfais fonitro ar eu bwrdd, i hysbysu Gweinidogion Cymru am faterion penodol ac i wybodaeth benodol (yr wybodaeth ofynnol) gael ei throsglwyddo i Weinidogion Cymru o leiaf unwaith ym mhob cyfnod o ddeng munud. Mae paragraff (2) o erthygl 3 yn darparu bod perchennog, meistr a siartrwr (os oes un) (y person sydd â gofal) yn euog o drosedd os defnyddir y cwch pysgota yn groes i baragraff (1).

Mae erthygl 4 yn rhagnodi’r wybodaeth ofynnol y mae rhaid ei throsglwyddo i Weinidogion Cymru.

Mae erthygl 5 yn darparu ar gyfer rhwymedigaethau parhaus ar y person sydd â gofal o ran y ddyfais fonitro.

Mae erthygl 6 yn nodi gofynion penodol sy’n gymwys i’r person sydd â gofal os nad yw’r ddyfais fonitro yn gallu trosglwyddo’r wybodaeth ofynnol.

Yn rhinwedd adran 5(4) o Ddeddf Pysgodfeydd Môr 1968 (p. 77), mae torri’r Gorchymyn hwn yn drosedd sy’n dwyn cosb ar gollfarn ddiannod o ddirwy ddiderfyn.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Gorchymyn hwn. O ganlyniad, lluniwyd Asesiad Effaith Rheoleiddiol o’r costau a’r manteision sy’n debygol o ddeillio o gydymffurfio â’r Gorchymyn hwn. Gellir cael copi oddi wrth: Llywodraeth Cymru, Parc Cathays, Caerdydd CF10 3NQ.

(1)

1968 p. 77 (“Deddf 1968”). Diwygiwyd adran 5(1) gan adran 4(2) o Ddeddf Terfynau Pysgodfeydd 1976 (p. 86). Gweler adran 19 o Ddeddf 1968 am ddiffiniad o “the Ministers”; diwygiwyd y diffiniad o “the Ministers” yn adran 19 gan O.S. 1999/1820, erthygl 4, Atodlen 2, Rhan I, paragraff 48(1) a (5)(c).

(2)

Yn rhinwedd erthygl 2 o Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672) trosglwyddwyd y swyddogaethau sy’n arferadwy o dan adran 5 o Ddeddf 1968 i Gynulliad Cenedlaethol Cymru i’r graddau y maent yn arferadwy o ran Cymru (gan weithredu ar y cyd ag unrhyw un o Weinidogion y Goron y mae’r pwerau hynny yn arferadwy ganddynt ynghylch adnabod a marcio cychod pysgota). Trosglwyddwyd y swyddogaethau hynny o eiddo Cynulliad Cenedlaethol Cymru i Weinidogion Cymru yn rhinwedd adran 162 o Ddeddf Llywodraeth Cymru 2006 (p. 32) a pharagraff 30 o Atodlen 11 iddi. Yn rhinwedd erthyglau 4(1)(c) a 5(1)(c) o Orchymyn Parth Cymru (Ffiniau a Throsglwyddo Swyddogaethau) 2010 (O.S. 2010/760), trosglwyddwyd ymhellach swyddogaethau sy’n arferadwy o dan adran 5 o Ddeddf 1968 i Weinidogion Cymru mewn perthynas â pharth Cymru (gan weithredu ar y cyd ag unrhyw un o Weinidogion y Goron y mae’r pwerau hynny yn arferadwy ganddynt o dan adran 5 ynghylch adnabod a marcio cychod pysgota). Yn rhinwedd adran 59A o Ddeddf Llywodraeth Cymru 2006, a pharagraff 2(1) a (2)(c) o Atodlen 3A iddi, trosglwyddwyd ymhellach swyddogaethau sy’n arferadwy o dan adran 5 o Ddeddf 1968 i Weinidogion Cymru mewn perthynas a chychod pysgota Cymreig y tu hwnt i derfyn parth Cymru (gan weithredu ar y cyd ag unrhyw un o Weinidogion y Goron y mae’r pwerau hynny yn arferadwy ganddynt mewn perthynas â swyddogaethau o dan adran 5(1) a (2)(a) o Ddeddf 1968). Gweler paragraff 2(4) o Atodlen 3A am y diffiniad o “Welsh fishing boat” (“cwch pysgota Cymreig”).

(3)

1995 p. 21. Diwygiwyd Rhan 2 gan O.S. 2002/794 ac O.S.2015/664.

(4)

2020 p. 22.

(5)

EUR 2017/1130.

(6)

Dyrennir yr arwydd galwad radio rhyngwladol i gwch pysgota gan yr awdurdod telathrebu cenedlaethol i bob llestr sydd â chyfarpar radio ar ei bwrdd, fel rhan o’r broses trwyddedu radio. Dyrennir cyfres o arwyddion galwad i bob gwlad gan yr Undeb Telathrebu Rhyngwladol.

(7)

EUR 2017/218.

(8)

OJ Rhif L 34, 9.2.2017, t. 9.

(9)

Mae System Geodetig y Byd 1984 (“WGS 84”) yn diffinio ffrâm gyfeirio ar gyfer y ddaear, i’w defnyddio ym maes geodeseg a mordwyaeth. Fe’i datblygwyd gan Asiantaeth Gwybodaeth Geo-ofodol yr Unol Daleithiau, a chaiff ei chynnal ganddi. Diffinnir WGS 84 ym mharagraff 2.1 o Adroddiad Technegol Asiantaeth Genedlaethol Delweddau a Mapiau’r Unol Daleithiau TR8350.2, trydydd argraffiad, diwygiad 1 dyddiedig 3 Ionawr 2000 o’r enw “Department of Defense World Geodetic System 1984” https://gis-lab.info/docs/nima-tr8350.2-wgs84fin.pdf.