NODYN ESBONIADOL
(Nid yw’r nodyn hwn yn rhan o’r Rheoliadau)
Mae’r Rheoliadau hyn yn diwygio Rheoliadau Rhwymedigaethau Cyfrifoldeb Cynhyrchwyr (Gwastraff Deunydd Pacio) 2007 (O.S. 2007/871) o ran Cymru. Mae’r Rheoliadau hynny’n gosod rhwymedigaeth ar gynhyrchwyr i adennill ac ailgylchu gwastraff deunydd pacio er mwyn cyrraedd y targedau adennill ac ailgylchu a nodir yn Erthygl 6(1) o Gyfarwyddeb 94/62/EC Senedd Ewrop a’r Cyngor ar ddeunydd pacio a gwastraff deunydd pacio (OJ Rhif L 365, 31.12.94, t. 10).
Mae’r Rheoliadau hyn yn rhoi targedau ailgylchu ar gyfer cynhyrchwyr yn lle targedau adennill ac ailgylchu’r UE. Maent hefyd yn amrywio’r targedau ailgylchu ar gyfer deunyddiau penodol i gynhyrchwyr sydd o dan rwymedigaeth ar gyfer papur, plastig, gwydr, alwminiwm, dur a phren yn ogystal â’r targed aildoddi penodol ar gyfer gwydr. Mae’r dyraniad ailgylchu ar gyfer cynhyrchwyr bach ar gyfer 2018 i 2020 wedi ei newid ar gyfer 2021 a 2022.
Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth yr Is-adran Effeithlonrwydd Adnoddau a’r Economi Gylchol, Llywodraeth Cymru, Parc Cathays, Caerdydd, CF10 3NQ.