Rheoliadau Draenio Cynaliadwy (Cais am Ffioedd Cymeradwyo) (Cymru) 2018

Offerynnau Statudol Cymru

2018 Rhif 1075 (Cy. 225)

Y Diwydiant Dŵr, Cymru

Rheoliadau Draenio Cynaliadwy (Cais am Ffioedd Cymeradwyo) (Cymru) 2018

Gwnaed

10 Hydref 2018

Gosodwyd gerbron Cynulliad Cenedlaethol Cymru

15 Hydref 2018

Yn dod i rym

7 Ionawr 2019

Mae Gweinidogion Cymru, drwy arfer y pwerau a roddir iddynt gan adrannau 32 a 48(2) o Ddeddf Rheoli Llifogydd a Dŵr 2010(1), a pharagraffau 4(a) a 13 o Atodlen 3 iddi, yn gwneud y Rheoliadau a ganlyn.

Yn unol â pharagraff 13(3) o Atodlen 3 i’r Ddeddf honno, mewn perthynas â ffioedd am geisiadau am gymeradwyaeth, mae Gweinidogion Cymru wedi rhoi sylw i ba mor ddymunol fyddai sicrhau nad yw incwm y ffi yn sylweddol uwch na’r costau (uniongyrchol ac anuniongyrchol) y mae’r cyrff sy’n cymeradwyo(2) yn mynd iddynt mewn cysylltiad â chymeradwyo.

Enwi a chychwyn

1.—( 1) Enw’r Rheoliadau hyn yw Rheoliadau Draenio Cynaliadwy (Cais am Ffioedd Cymeradwyo) (Cymru) 2018.

(2) Daw’r Rheoliadau hyn i rym ar 7 Ionawr 2019.

Dehongli

2.—( 1) Yn y Rheoliadau hyn—

ystyr “Atodlen 3” (“Schedule 3”) yw Atodlen 3 i Ddeddf Rheoli Llifogydd a Dŵr 2010;

ystyr “cais” (“application”) yw cais am gymeradwyaeth a wneir i gorff cymeradwyo yn unol â pharagraff 9(2) neu 10(2) o Atodlen 3 ac mae cyfeiriadau at “ceisydd” (“applicant”) i’w dehongli yn unol â hynny;

ystyr “cymeradwyaeth” (“approval”) yw cymeradwyaeth yn unol â pharagraff 7(1) o Atodlen 3;

ystyr “ffi am gais” (“application fee”) yw ffi sydd i’w chodi mewn perthynas â chais.

(2) Yn y Rheoliadau hyn, mae cyfeiriad at “gwaith adeiladu”(3) i’w ddehongli fel cyfeiriad at waith adeiladu y mae iddo oblygiadau o ran draenio(4).

Ffioedd ceisiadau

3.—( 1) Caiff corff cymeradwyo godi ffi am gais ar geisydd.

(2) Rhaid pennu ffi am gais yn unol â’r Rheoliadau hyn.

Graddfa ffioedd

4.—( 1) Yn ddarostyngedig i reoliadau 5 i 9, pennir ffi am gais fel a ganlyn—

(a) £350 am bob cais, a

(b) swm ychwanegol hyd at uchafswm o £7,500 a gyfrifir drwy gyfeirio at faint yr ardal adeiladu fel a ganlyn—

(i) £70 am bob 0.1 hectar neu ffracsiwn o 0.1 hectar, am y 0.5 hectar cyntaf;

(ii) £50 am bob 0.1 hectar neu ffracsiwn o 0.1 hectar, o 0.5 hectar hyd at a chan gynnwys 1.0 hectar;

(iii) £20 am bob 0.1 hectar neu ffracsiwn o 0.1 hectar, o 1.0 hectar a hyd at a chan gynnwys 5.0 hectar;

(iv) £10 am bob 0.1 hectar ychwanegol neu ffracsiwn o 0.1 hectar sy’n fwy na 5.0 hectar.

(2) Yn y rheoliad hwn, ystyr “ardal adeiladu” yw—

(a) yr ardal o dir a nodwyd ar blan sy’n mynd gyda’r cais am ganiatâd cynllunio(5), neu

(b) os nad oes cais am ganiatâd cynllunio wedi ei wneud, yr ardal o dir y mae’r gwaith adeiladu wedi cychwyn arno, neu y bwriedir cychwyn gwaith adeiladu arno.

Ffi sy’n daladwy gan gyngor cymuned am gais

5.—( 1) Os mai cyngor cymuned yw’r ceisydd, mae’r ffi am gais hanner y swm a fyddai i’w godi, oni bai am y rheoliad hwn, yn unol â rheoliad 4.

(2) Yn y rheoliad hwn, ystyr “cyngor cymuned” yw cyngor cymuned neu dref yn unol â Rhan 2 o Ddeddf Llywodraeth Leol 1972(6).

Cais a addaswyd drwy gytundeb cyn dod i benderfyniad

6.   Os caiff cais am gymeradwyaeth ei addasu drwy gytundeb rhwng y corff cymeradwyo a’r ceisydd cyn i’r corff cymeradwyo ddod i benderfyniad yn ei gylch, ni chaniateir i’r corff hwnnw godi ffi mewn perthynas â’r addasiad y cytunwyd arno.

Ffioedd am geisiadau sy’n cynnwys cynigion eraill

7.—( 1) Rhaid pennu ffi am gais yn unol â pharagraff (2) pan fo’r ceisydd—

(a) yn gwneud mwy nag un cais i gymeradwyo system ddraenio(7) ar gyfer gwaith adeiladu, a phob un yn amlinellu cynnig arall i adeiladu system ddraenio ar gyfer y gwaith adeiladu hwnnw, neu

(b) yn gwneud un cais i gymeradwyo system ddraenio ar gyfer gwaith adeiladu sy’n amlinellu mwy nag un o gynigion eraill i adeiladu system ddraenio ar gyfer y gwaith adeiladu hwnnw.

(2) Swm y ffi am gais yw—

(a) y ffi sydd i’w chodi am y cais neu (yn achos paragraff (1)(b)) y cynnig, a fyddai’n denu’r ffi uchaf yn unol â rheoliad 4, a

(b) hanner y swm o’r ffioedd a fyddai i’w codi oni bai am y rheoliad hwn, yn unol â rheoliad 4 mewn cysylltiad â phob un o’r ceisiadau neu’r cynigion sy’n weddill.

(3) At ddibenion rheoliadau 3(2) a 4 yn achos cais sydd o fewn paragraff (1)(b), mae pob cynnig i gael ei drin fel petai’n gais ar wahân.

Ffioedd am arolygiad fel amod o gymeradwyaeth

8.   Pan fo corff cymeradwyo yn rhoi cymeradwyaeth yn ddarostyngedig i amod (ni waeth pa un a yw’r gymeradwyaeth yn ddarostyngedig i unrhyw amodau eraill) bod un arolygiad neu ragor yn cael ei gynnal neu eu cynnal, caiff godi ffi o £168 am bob arolygiad.

Ffi sydd i’w chodi am gais yn ymwneud â chais blaenorol

9.—( 1) Mae’r rheoliad hwn yn gymwys pan fo corff cymeradwyo wedi cymeradwyo cais yn flaenorol (“y cais blaenorol”) mewn perthynas â system ddraenio.

(2) Yn ddarostyngedig i baragraff (3), mae’r ffi am gais hanner y swm a fyddai i’w godi, oni bai am y rheoliad hwn, yn unol â rheoliad 4, os gwneir cais dilynol—

(a) o fewn 12 mis o ddyddiad cymeradwyo’r cais blaenorol, a

(b) sy’n ymwneud yn gyfan gwbl neu’n bennaf â’r system ddraenio a oedd yn destun y cais blaenorol, gan gynnwys cynigion adeiladu ac amodau cymeradwyo’r cais blaenorol.

(3) Ni chaiff corff cymeradwyo godi ffi pan fo cais o dan baragraff (2) yn ymwneud ag amod yn unig, ac eithrio amod o dan baragraff 11(2)(a) o Atodlen 3, o gymeradwyo’r cais blaenorol.

Ad-dalu ffioedd am gais

10.   Pan fo ffi am gais neu ran ohoni yn cael ei chodi mewn camgymeriad, rhaid i gorff cymeradwyo ad-dalu’r ffi honno neu ran ohoni cyn gynted ag y bo’n ymarferol ar ôl darganfod y camgymeriad hwnnw.

Hannah Blythyn

Gweinidog yr Amgylchedd, o dan awdurdod Ysgrifennydd y Cabinet dros Ynni, Cynllunio a Materion Gwledig, un o Weinidogion Cymru

10 Hydref 2018

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn gwneud darpariaeth i gorff cymeradwyo godi ffioedd mewn perthynas â cheisiadau i gymeradwyo systemau draenio cynaliadwy yn unol ag Atodlen 3 i Ddeddf Rheoli Llifogydd a Dŵr 2010 (p. 29).

Mae rheoliad 3 yn darparu y caiff corff cymeradwyo godi ffi (“ffi am gais”) mewn perthynas â chais i gymeradwyo system ddraenio, a bod rhaid i ffioedd o’r fath gael eu pennu yn unol â’r Rheoliadau hyn.

Mae rheoliad 4 yn darparu’r dull o bennu’r ffioedd am gais, yn ddarostyngedig i reoliadau 5 i 9.

Mae rheoliad 5 yn darparu ar gyfer ffioedd gostyngol am gais mewn achosion lle gwneir cais gan gyngor cymuned.

Mae rheoliad 6 yn darparu pan fo achosion lle caiff cais ei addasu drwy gytundeb rhwng y corff cymeradwyo a’r ceisydd cyn ei benderfynu, ni fydd unrhyw ffi ychwanegol yn daladwy mewn cysylltiad â’r addasiad y cytunwyd arno.

Mae rheoliad 7 yn darparu ar gyfer ffioedd gostyngol mewn perthynas â cheisiadau sy’n cynnwys mwy nag un cynnig arall ar gyfer system ddraenio.

Mae rheoliad 8 yn darparu i ffioedd fod yn daladwy am arolygiadau, pan fo corff cymeradwyo yn rhoi cymeradwyaeth yn ddarostyngedig i amod bod un neu ragor o arolygiadau yn cael ei gynnal neu eu cynnal.

Mae rheoliad 9 yn darparu ar gyfer ffi ostyngol am gais pan fo datblygwr yn gwneud cais dilynol am gymeradwyaeth sy’n ymwneud yn gyfan gwbl neu’n bennaf â system ddraenio y cytunwyd arni yn flaenorol o fewn y cyfnod o 12 mis cyn y cais dilynol.

Mae rheoliad 10 yn darparu i’r ffioedd am gais gael eu had-dalu mewn amgylchiadau penodol.

Lluniwyd asesiad effaith rheoleiddiol, o ran Cymru, o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth Lywodraeth Cymru, Parc Cathays, Caerdydd, CF10 3NQ ac mae wedi ei gyhoeddi ar www.llyw.cymru.

(1)

2010 p. 29. Diwygiwyd Atodlen 3 gan adrannau 21(3), 88(a) ac 88(b) o Ddeddf Dŵr 2014 (p. 21) ac O.S. 2012/1659 a 2013/755 (Cy. 90).

(2)

Diffinnir “approving body” ym mharagraff 6 o Atodlen 3.

(3)

Diffinnir “construction work” ym mharagraff 7(2)(a) o Atodlen 3.

(4)

Diffinnir “drainage implications” ym mharagraff 7(2)(b) o Atodlen 3.

(5)

Diffinnir “planning permission” ym mharagraff 8(4) o Atodlen 3.

(6)

1972 p. 70.

(7)

Diffinnir “drainage system” ym mharagraff 1 o Atodlen 3.