Gorchymyn Gorfodi Sifil ar Dramgwyddau Traffig Ffyrdd (Canllawiau ar Lefelau Taliadau) (Cymru) 2013

Offerynnau Statudol Cymru

2013 Rhif 1969 (Cy. 191)

Traffig Ffyrdd, Cymru

Gorchymyn Gorfodi Sifil ar Dramgwyddau Traffig Ffyrdd (Canllawiau ar Lefelau Taliadau) (Cymru) 2013

Gwnaed

2 Awst 2013

Gosodwyd gerbron Cynulliad Cenedlaethol Cymru

7 Awst 2013

Yn dod i rym

2 Tachwedd 2013

Mae Gweinidogion Cymru, drwy arfer y pŵer a roddwyd i Gynulliad Cenedlaethol Cymru gan baragraff 8 o Atodlen 9 i Ddeddf Rheoli Traffig 2004(1), ac a freiniwyd ynddynt hwy bellach(2), yn gwneud y Gorchymyn a ganlyn.

Enwi, cychwyn, cymhwyso a dehongli

1.—( 1) Enw’r Gorchymyn hwn yw Gorchymyn Gorfodi Sifil ar Dramgwyddau Traffig Ffyrdd (Canllawiau ar Lefelau Taliadau) (Cymru) 2013 a daw i rym ar 2 Tachwedd 2013, ac mae’n gymwys o ran Cymru.

(2) Yn y Gorchymyn hwn—

ystyr “Deddf 2004” (“the 2004 Act”) yw Deddf Rheoli Traffig 2004;

ystyr “y Rheoliadau Darpariaethau Cyffredinol” (“the General Provisions Regulations”) yw Rheoliadau Gorfodi Sifil ar Dramgwyddau Traffig Ffyrdd (Darpariaethau Cyffredinol) (Cymru) 2013(3); ac

ystyr “tramgwydd traffig ffyrdd” (“road traffic contravention”) o ran Cymru, yw unrhyw un o’r canlynol:

(a)

tramgwydd parcio fel y’i disgrifir ym mharagraff 4, Rhan 1 o Atodlen 7 i Ddeddf 2004;

(b)

tramgwydd lôn fysiau fel y’i disgrifir yn Rhan 2 o Atodlen 7 i Ddeddf 2004; neu

(c)

tramgwydd traffig symudol fel y’i disgrifir yn Rhan 4 o Atodlen 7 i Ddeddf 2004.

Canllawiau

2.   Y canllawiau a roddir gan Weinidogion Cymru, sef yr awdurdod cenedlaethol priodol ar gyfer Cymru o dan Ran 6 o Ddeddf 2004, i awdurdodau gorfodi wrth osod lefelau taliadau ar gyfer tramgwyddau traffig ffyrdd yw’r rhai hynny a nodir yn yr Atodlen.

Dirymu

3.   Mae Gorchymyn Gorfodi Sifil ar Dramgwyddau Parcio (Canllawiau ar Lefelau Taliadau) (Cymru) 2008(4) drwy hyn wedi ei ddirymu.

Edwina Hart

Gweinidog yr Economi, Gwyddoniaeth a Thrafnidiaeth, un o Weinidogion Cymru

2 Awst 2013

Erthygl 2

YR ATODLEN CANLLAWIAU I AWDURDODAU GORFODI WRTH OSOD TALIADAU AM DRAMGWYDDAU TRAFFIG FFYRDD

Taliadau cosb ar gyfer tramgwyddau traffig ffyrdd

1.—( 1) Rhaid gosod taliadau cosb ar gyfer tramgwyddau traffig ffyrdd—

(a) ar gyfer tramgwyddau lefel uwch, ar y lefel a bennir yng ngholofn (2) yn un o’r bandiau yn Nhabl 1; a

(b) ar gyfer pob tramgwydd arall, ar y lefel a bennir yng ngholofn (3) yn y band a ddewisir ar gyfer tramgwyddau lefel uwch.

(2) Rhaid gosod y lefel disgownt ar gyfer taliad cosb a delir yn gynnar (hynny yw o fewn 21 o ddiwrnodau yn achos taliadau cosb a osodwyd ar sail cofnod a gynhyrchwyd gan ddyfais a gymeradwyir o dan reoliad 10 o’r Rheoliadau Darpariaethau Cyffredinol a 14 o ddiwrnodau ym mhob achos arall)—

(a) ar gyfer tramgwyddau lefel uwch, ar y lefel a bennir yng ngholofn (4);

(b) ar gyfer pob tramgwydd arall, ar y lefel a bennir yng ngholofn (5),

yn y band sy’n pennu lefelau’r taliadau cosb.

(3) Rhaid gosod lefel gordal taliad o dâl cosb wedi i dystysgrif codi tâl gael ei dyroddi—

(a) ar gyfer tramgwyddau lefel uwch ar y lefel a bennir yng ngholofn (6);

(b) ar gyfer pob tramgwydd arall ar y lefel a bennir yng ngholofn (7),

yn y band sy’n pennu lefelau’r taliadau cosb.

Tabl 1

(1) Band	(2) Tâl cosb lefel uwch	(3) Tâl cosb lefel is	(4) Tâl cosb lefel uwch a delir yn gynnar	(5) Tâl cosb lefel is a delir yn gynnar	(6) Tâl cosb lefel uwch a delir ar ôl cyflwyno tystysgrif codi tâl	(7) Tâl cosb lefel is a delir ar ôl cyflwyno tystysgrif codi tâl
1.	£60	£40	£30	£20	£90	£60
2.	£70	£50	£35	£25	£105	£75

(4) Caiff awdurdod gorfodi osod taliadau cosb yn unol â gwahanol fandiau yn y tabl mewn gwahanol rannau o’i ardal, cyn belled â bod pob taliad ym mhob rhan yn cael ei osod yn unol â’r un band.

(5) “Tramgwyddau lefel uwch” yw’r rhai hynny a restrir yn yr Atodiad.

Taliadau am symud ymaith, storio a gwaredu cerbydau

2.   Y rhai hynny a geir yn Nhabl 2 yw’r taliadau y mae’n rhaid eu codi am symud ymaith, storio a gwaredu cerbydau a ganfyddir mewn ardal orfodi sifil.

Tabl 2

(1) Eitem	(2) Math o dâl	(3) Swm y tâl
1.	Y tâl am symud cerbyd ymaith	£105.00
2	Y tâl am storio cerbyd	£12 ar gyfer pob diwrnod, neu ran o ddiwrnod, pan fydd y cerbyd yn cael ei gadw
3.	Y tâl am waredu cerbyd	£50.00

Rhyddhau cerbyd o afael dyfais i’w rwystro rhag symud o dan adran 79 o Ddeddf Rheoli Traffig 2004

3.   Rhaid i’r tâl sy’n daladwy o dan reoliad 14(2)(b) o’r Rheoliadau Darpariaethau Cyffredinol ar gyfer rhyddhau cerbyd o afael dyfais i’w rwystro rhag symud fod yn £40.

Arbedion ar gyfer pwerau Gweinidogion Cymru

4.   Nid oes dim yn y canllawiau hyn yn rhagfarnu nac yn effeithio ar bwerau Gweinidogion Cymru o dan baragraff 8(3) o Atodlen 9 i Ddeddf Rheoli Traffig 2004 i ganiatáu i awdurdod gorfodi i wyro oddi wrth y canllawiau hyn.

Atodiad RHESTR O DRAMGWYDDAU LEFEL UWCH

1.   Tramgwydd yn ymwneud â chyflawni trosedd o’r math y cyfeirir ato ym mharagraff 4(2)(b) (cyfyngiadau aros a llwytho) o Atodlen 7 i Ddeddf Rheoli Traffig 2004 (“Deddf 2004”).

2.   Tramgwydd yn ymwneud â gadael y cerbyd mewn man parcio ar-y-stryd ac eithrio fel a awdurdodir gan unrhyw orchymyn yn ymwneud â’r man parcio yn unrhyw un o’r achosion a ganlyn, neu oddi tano—

(a) heb fod yn dangos hawlen, taleb neu docyn talu ac arddangos;

(b) mewn man lle mae parcio wedi cael ei atal;

(c) pan fo’r cerbyd yn cael ei ddefnyddio mewn cysylltiad â gwerthu nwyddau neu gynnig neu arddangos nwyddau i’w gwerthu;

(d) pan nad yw’r cerbyd yn dod o fewn y dosbarth o gerbyd y caniateir iddo barcio yno.

3.   Tramgwyddo’r gwaharddiad a osodir gan adran 85 (parcio dwbl etc.) o Ddeddf 2004.

4.   Tramgwyddo’r gwaharddiad a osodir gan adran 86 (troetffyrdd a ostyngwyd) o Ddeddf 2004.

5.   Tramgwydd sy’n cynnwys cyflawni trosedd o’r math y cyfeirir ato ym mharagraff 4(2)(h) o Atodlen 7 i Ddeddf 2004 (troseddau sy’n ymwneud â llwybrau beiciau).

6.   Tramgwydd sy’n cynnwys trosedd o’r math y cyfeirir ato ym mharagraff 4(2)(g) o Atodlen 7 i Ddeddf 2004 (parcio Cerbydau Nwyddau Trymion ar leiniau ymyl, lleiniau canol neu droetffyrdd).

7.   Tramgwydd sy’n cynnwys trosedd o’r math y cyfeirir ato ym mharagraff 4(2)(c) (peri i gerbydau aros ar groesfannau i gerddwyr neu gerllaw iddynt) neu 4(2)(i)(i) (llinellau igam-ogam gerllaw croesfannau) o Atodlen 7 i Ddeddf 2004.

8.   Tramgwydd sy’n cynnwys trosedd o’r math y cyfeirir ato ym mharagraff 4(2)(i)(ii) o Atodlen 7 i Ddeddf 2004 (marciau safleoedd bysiau neu arosfannau bysiau).

9.   Tramgwydd sy’n ymwneud â throsedd o’r math y cyfeirir ato ym mharagraff 4(2)(e) o Atodlen 7 i Ddeddf 2004 (parcio mewn mannau llwytho).

10.   Tramgwydd sy’n ymwneud â throsedd o’r math y cyfeirir ato ym mharagraff 4(2)(d) o Atodlen 7 i Ddeddf 2004 mewn perthynas â man parcio oddi-ar-y-stryd ac yn cynnwys unrhyw un neu rai o’r canlynol pan fo gorchymyn yn eu gwahardd mewn perthynas â’r man parcio—

(a) defnyddio cerbyd mewn cysylltiad â gwerthu nwyddau neu gynnig neu arddangos nwyddau i’w gwerthu;

(b) parcio mewn man cyfyngedig;

(c) parcio mewn cilfan hawlenni heb arddangos hawlen;

(d) parcio mewn man parcio i berson anabl heb arddangos yn gywir fathodyn dilys person anabl;

(e) parcio cerbyd mewn man pan nad yw’r cerbyd yn dod o fewn y dosbarth o gerbyd y caniateir iddo barcio yno.

11.   Tramgwydd lôn fysiau fel y’i disgrifir yn Rhan 2 o Atodlen 7 i Ddeddf 2004.

12.   Tramgwydd traffig symudol fel y’i disgrifir yn Rhan 4 o Atodlen 7 i Ddeddf 2004.

NODYN ESBONIADOL

(Nid yw’r nodyn hwn yn rhan o’r Gorchymyn)

Mae Rhan 3 (paragraffau 7 i 9) o Atodlen 9 i Ddeddf Rheoli Traffig 2004 yn gwneud darpariaeth i awdurdodau gorfodi y tu allan i Lundain Fwyaf osod lefelau taliadau o dan Ran 6 o’r Ddeddf honno (gorfodi sifil ar dramgwyddau traffig) ac yn ei gwneud yn ofynnol i’r lefelau hynny gyd-fynd â chanllawiau a roddir gan yr awdurdod cenedlaethol priodol, ac eithrio pan fo’r awdurdod hwnnw yn caniatáu i awdurdod gorfodi wyro oddi wrth y canllawiau hynny.

Drwy’r Gorchymyn hwn, mae Gweinidogion Cymru, sef yr awdurdod cenedlaethol priodol ar gyfer Cymru, yn rhoi i awdurdodau gorfodi yng Nghymru y canllawiau ar daliadau am dramgwyddau traffig ffyrdd a nodir yn yr Atodlen.

(1)

2004 p.18.

(2)

Trosglwyddwyd swyddogaethau Cynulliad Cenedlaethol Cymru o dan Ddeddf Rheoli Traffig 2004 i Weinidogion Cymru yn rhinwedd paragraff 30 o Atodlen 11 i Ddeddf Llywodraeth Cymru 2006 (p.32).

(3)

O.S. 2013/362.

(4)

O.S. 2008/613 (Cy.65).