Deddf Ombwdsmon Gwasanaethau Cyhoeddus (Cymru) 2019 (dccc3)

RHAN 3 LL+C YMCHWILIADAU

Ymchwiliadau ategol LL+C

16 Pŵer i ymchwilio i wasanaethau eraill sy’n gysylltiedig ag iechyd LL+C

(1) Mae’r adran hon yn gymwys fel a ganlyn—

(a) pan fo gan yr Ombwdsmon bŵer o dan y Rhan hon i ymchwilio—

(i) i gamweinyddu honedig gan awdurdod rhestredig perthnasol mewn cysylltiad â chamau gweithredu perthnasol a gymerwyd gan yr awdurdod mewn perthynas â pherson,

(ii) i fethiant honedig mewn gwasanaeth perthnasol a ddarperir i berson gan awdurdod rhestredig perthnasol, neu

(iii) i fethiant honedig gan awdurdod rhestredig perthnasol i ddarparu gwasanaeth perthnasol i berson, a

(b) pan fo gwasanaeth sy’n gysylltiedig ag iechyd nad yw’n wasanaeth perthnasol hefyd wedi’i ddarparu i’r person.

(2) Os yw’r Ombwdsmon o’r farn na ellir ymchwilio’n effeithiol nac yn gyflawn i’r camweinyddu honedig neu’r methiant honedig heb hefyd ymchwilio i’r gwasanaeth sy’n gysylltiedig ag iechyd a grybwyllir yn is-adran (1)(b), caiff yr Ombwdsmon ymchwilio i’r gwasanaeth hwnnw fel rhan o’r ymchwiliad mewn perthynas â’r awdurdod rhestredig perthnasol.

(3) Os gwnaiff yr Ombwdsmon hynny, mae unrhyw gyfeiriad at awdurdod rhestredig yn adran 17, 18, 23(2)(b) neu (7)(a), 27, 28(4)(b), (6)(c), (6)(d) neu (9)(b)(ii) neu 29(4)(a) yn cynnwys hefyd gyfeiriad at y person a ddarparodd y gwasanaeth sy’n gysylltiedig ag iechyd a grybwyllir yn is-adran (1)(b).

(4) Yn yr adran hon—

• ystyr “awdurdod rhestredig perthnasol” (“relevant listed authority”) yw—

  (a)

  F1 ...

  (b)

  Bwrdd Iechyd Lleol;

  (c)

  Ymddiriedolaeth GIG sy’n rheoli ysbyty neu sefydliad neu gyfleuster arall yng Nghymru;

  (d)

  Awdurdod Iechyd Arbennig nad yw’n cyflawni swyddogaethau yn Lloegr yn unig neu’n bennaf;

  (e)

  F2 ...

  (f)

  darparwr annibynnol yng Nghymru;

  (g)

  darparwr gwasanaeth iechyd teulu yng Nghymru;

  (h)

  person â swyddogaethau a roddir gan reoliadau a wneir o dan adran 113(2) o Ddeddf Iechyd a Gofal Cymdeithasol (Iechyd Cymunedol a Safonau) 2003 (p.43);

  (i)

  Pwyllgor Gwasanaethau Iechyd Arbenigol Cymru;

  (ia)

  [F3 Corff Llais y Dinesydd ar gyfer Iechyd a Gofal Cymdeithasol, Cymru;]

• mae i “camau gweithredu perthnasol” (“relevant action”) yr ystyr a roddir yn adran 11(4);

• mae i “gwasanaeth perthnasol” (“relevant service”) yr ystyr a roddir yn adran 11(5);

• mae “gwasanaeth sy’n gysylltiedig ag iechyd” (“health-related service”) yn cynnwys⁠—

  (a)

  unrhyw wasanaeth meddygol, deintyddol, offthalmig, nyrsio, bydwreigiaeth neu fferyllol, a

  (b)

  unrhyw wasanaeth arall a ddarperir mewn cysylltiad ag iechyd corfforol neu feddyliol person,

  heblaw triniaeth arbennig a gyflawnir o dan awdurdod trwydded triniaeth arbennig (o fewn ystyr Rhan 4 o Ddeddf Iechyd y Cyhoedd (Cymru) 2017 (dccc2);

(5) Nid yw’r adran hon yn effeithio ar bŵer yr Ombwdsmon o dan adran 19.

Diwygiadau Testunol

F1 A. 16(4)(a) wedi ei hepgor (1.4.2023) yn rhinwedd Deddf Iechyd a Gofal Cymdeithasol (Ansawdd ac Ymgysylltu) (Cymru) 2020 (asc 1), a. 29(2), Atod. 3 para. 17(2)(a); O.S. 2023/370, ergl. 3(1)(t)

F2 A. 16(4)(e) wedi ei hepgor (1.4.2023) yn rhinwedd Deddf Iechyd a Gofal Cymdeithasol (Ansawdd ac Ymgysylltu) (Cymru) 2020 (asc 1), a. 29(2), Atod. 3 para. 17(2)(b); O.S. 2023/370, ergl. 3(1)(t)

F3 A. 16(4)(ia) wedi ei fewnosod (1.4.2023) gan Deddf Iechyd a Gofal Cymdeithasol (Ansawdd ac Ymgysylltu) (Cymru) 2020 (asc 1), a. 29(2), Atod. 3 para. 17(2)(c); O.S. 2023/370, ergl. 3(1)(t)

Gwybodaeth Cychwyn

I1 A. 16 ddim mewn grym ar y Cydsyniad Brenhinol, gweler a. 77(1)

I2 A. 16 mewn grym ar 23.7.2019 gan O.S. 2019/1096, rhl. 2