50Taliadau uniongyrchol i ddiwallu anghenion oedolynLL+C
(1)Caiff rheoliadau ei gwneud yn ofynnol neu ganiatáu i awdurdod lleol wneud taliadau i berson tuag at y gost o ddiwallu anghenion oedolyn am ofal a chymorth o dan adran 35 neu 36.
(2)Ond ni chaiff rheoliadau o dan is-adran (1) ei gwneud yn ofynnol bod taliadau o’r fath yn cael eu gwneud na chaniatáu hynny oni chaiff amod 1 neu 2 ei fodloni.
(3)Amod 1 yw—
(a)bod y taliadau i’w gwneud i’r oedolyn y mae arno anghenion am ofal a chymorth (“A”),
(b)bod gan A, neu y mae’r awdurdod lleol yn credu bod gan A, alluedd i gydsynio bod y taliadau’n cael eu gwneud,
(c)bod yr awdurdod lleol wedi ei fodloni—
(i)bod gwneud y taliadau yn ffordd briodol o ddiwallu anghenion A, a
(ii)bod gan A allu i reoli’r taliadau (naill ai ar ei ben ei hun neu gyda’r cymorth sydd ar gael i A), a
(d)bod A wedi cydsynio i’r taliadau gael eu gwneud.
(4)Amod 2 yw—
(a)nad oes gan yr oedolyn y mae arno anghenion am ofal a chymorth (“A”), neu y mae’r awdurdod lleol yn credu nad oes ganddo, y galluedd i gydsynio bod y taliadau’n cael eu gwneud,
(b)bod y taliadau i’w gwneud i berson (“P”) ar wahân i A,
(c)bod P yn berson addas,
(d)bod yr awdurdod lleol wedi ei fodloni—
(i)bod gwneud y taliadau’n ffordd briodol o ddiwallu anghenion A,
(ii)bod gan P allu i reoli’r taliadau (naill ai ar ei ben ei hun neu gyda’r cymorth sydd ar gael i P), a
(iii)y bydd P yn gweithredu er lles pennaf A wrth reoli’r taliadau, ac
(e)bod y cydsyniad angenrheidiol wedi ei gael i wneud y taliadau i P.
(5)At ddibenion is-adran (4)(c), mae P yn “berson addas”—
(a)os yw P wedi ei awdurdodi o dan Ddeddf Galluedd Meddyliol 2005 (p’un ai yn nhermau cyffredinol neu benodol) i wneud penderfyniadau ynghylch anghenion A am ofal a chymorth,
(b)lle nad yw P wedi ei awdurdodi fel a grybwyllwyd ym mharagraff (a), os yw person sydd wedi ei awdurdodi felly yn cytuno gyda’r awdurdod lleol fod P yn addas i gael taliadau tuag at y gost o ddiwallu anghenion A am ofal a chymorth, neu
(c)lle nad yw P wedi ei awdurdodi fel a grybwyllwyd ym mharagraff (a) ac nad oes unrhyw berson sydd wedi ei awdurdodi felly, os yw’r awdurdod lleol o’r farn bod P yn addas i gael taliadau o’r math hwnnw.
(6)At ddibenion is-adran (4)(e), ystyr “cydsyniad angenrheidiol” yw—
(a)cydsyniad P, a
(b)pan fo P yn berson addas yn rhinwedd is-adran (5)(b), cydsyniad person sydd wedi ei awdurdodi o dan Ddeddf Galluedd Meddyliol 2005 (p’un ai yn nhermau cyffredinol neu benodol) i wneud penderfyniadau ynghylch anghenion A am ofal a chymorth.
(7)Cyfeirir at daliad o dan yr adran hon yn y Ddeddf hon fel “taliad uniongyrchol”.