4 Pŵer i wneud darpariaeth bellach mewn cysylltiad â’r brif Ddeddf LL+C

(1) Caiff Gweinidogion Cymru drwy reoliadau a wneir drwy offeryn statudol Cymreig—

(a) gwneud darpariaeth sy’n ddeilliadol neu’n atodol i unrhyw ddarpariaeth yn y brif Ddeddf neu’r Ddeddf hon, neu sy’n ganlyniadol ar unrhyw ddarpariaeth yn y brif Ddeddf neu’r Ddeddf hon;

(b) gwneud darpariaeth drosiannol neu ddarpariaeth arbed mewn cysylltiad ag unrhyw ddarpariaeth yn y brif Ddeddf neu’r Ddeddf hon.

(2) Caiff rheoliadau o dan yr adran hon ddiwygio, diddymu neu ddirymu unrhyw ddeddfiad, pa bryd bynnag y’i deddfir neu y’i gwneir (gan gynnwys darpariaeth yn y brif Ddeddf neu’r Ddeddf hon).

(3) Mae rheoliadau o dan yr adran hon sy’n diwygio neu’n diddymu unrhyw ddeddfiad mewn deddfwriaeth sylfaenol yn ddarostyngedig i weithdrefn gymeradwyo’r Senedd.

(4) Mae unrhyw reoliadau eraill o dan yr adran hon yn ddarostyngedig i weithdrefn annilysu’r Senedd.

(5) Yn yr adran hon—

• mae “deddfiad” (“enactment”) yn cynnwys darpariaeth mewn Mesur gan Eglwys Loegr (o fewn yr ystyr a roddir gan adran 408 o’r brif Ddeddf) neu mewn offeryn a wneir o dan Fesur o’r fath;

• ystyr “deddfwriaeth sylfaenol” (“primary legislation”) yw—

  (a)

  Deddf gan Senedd Cymru,

  (b)

  Mesur Cynulliad, neu

  (c)

  Deddf gan Senedd y Deyrnas Unedig.

Gwybodaeth Cychwyn

I1 A. 4 mewn grym ar 28.4.2026, gweler a. 5(1)(c)