http://www.legislation.gov.uk/asc/2026/5/section/89/welshDeddf Diogelwch Adeiladau (Cymru) 2026cyStatute Law Database2026-06-25Expert Participation2026-04-28 RHAN 2DIOGELWCH TÂN MEWN TAI AMLFEDDIANNAETH PENODOLDyletswyddau meddianwyr tai amlfeddiannaeth perthnasolMynediad gan ddeiliaid dyletswydd at ddibenion asesu a rheoli risgiau diogelwch tân 89 1 Mae’r adran hon yn gymwys pan— a ‍bo deiliad dyletswydd ar gyfer tŷ amlfeddiannaeth perthnasol yn gwneud cais am fynediad i ran o’r tŷ amlfeddiannaeth perthnasol a bennir yn y cais (“y rhan benodedig”), b gwneir y cais i feddiannydd o’r rhan benodedig sy’n 18 oed neu’n hŷn, c ‍bo’r cais yn cael ei wneud at ddiben a grybwyllir yn is-adran (2), d ‍bo’r cais yn cydymffurfio ag is-adran (3), ac e na roddir mynediad i’r rhan benodedig. 2 Y dibenion yw galluogi’r deiliad dyletswydd— a i gydymffurfio ag adrannau 81 i 84 neu reoliadau a wneir o dan yr adrannau hynny (asesu risgiau diogelwch tân), pan‍ mai’r deiliad dyletswydd yw landlord y tŷ amlfeddiannaeth perthnasol; b i gydymffurfio ag adran 85 neu reoliadau a wneir oddi tani (rheoli risgiau diogelwch tân). 3 Mae cais yn cydymffurfio â’r is-adran hon os yw— a yn ysgrifenedig, b yn nodi’r diben y gwneir y cais ar ei gyfer, c yn esbonio pam ei bod yn angenrheidiol mynd i’r rhan benodedig o’r tŷ amlfeddiannaeth perthnasol at y diben hwnnw, d yn gofyn am fynediad ar ddyddiad, ac amser, sy’n rhesymol, ac e yn cael ei roi i’r meddiannydd o leiaf 48 awr cyn hynny. 4 Caiff y deiliad dyletswydd wneud cais i dribiwnlys eiddo preswyl am orchymyn mynediad i dŷ amlfeddiannaeth. 5 Ond ni chaiff deiliad dyletswydd wneud cais am orchymyn mynediad i dŷ amlfeddiannaeth oni bai bod y deiliad dyletswydd wedi rhoi hysbysiad i’r awdurdod diogelwch tân ar gyfer y tŷ amlfeddiannaeth perthnasol yn nodi’r bwriad i wneud cais am orchymyn o’r fath mewn cysylltiad â’r meddiannydd a’r tŷ amlfeddiannaeth perthnasol (y mae rhaid i’r ddau ohonynt gael eu pennu yn yr hysbysiad). 6 Mae gorchymyn mynediad i dŷ amlfeddiannaeth yn orchymyn sydd— a yn ei gwneud yn ofynnol i’r meddiannydd ganiatáu i’r deiliad dyletswydd fynd i’r rhan benodedig o’r tŷ amlfeddiannaeth perthnasol ar amser rhesymol at y diben a nodir yn y cais o dan is-adran (3)(b), a b os yw’n angenrheidiol at y diben hwnnw, yn awdurdodi’r person sy’n mynd i’r rhan benodedig yn unol â’r gorchymyn i fesur neu brofi unrhyw beth, neu gymryd samplau, ffotograffau neu recordiadau. 7 Caiff tribiwnlys eiddo preswyl wneud gorchymyn mynediad i dŷ amlfeddiannaeth os yw’n fodlon ei bod yn angenrheidiol gwneud hynny at y diben a nodir yn y cais o dan is-adran (3)(b). 8 Rhaid i orchymyn mynediad i dŷ amlfeddiannaeth bennu dyddiad y caniateir mynediad i’r rhan benodedig o’r tŷ amlfeddiannaeth perthnasol, neu gyfnod y caniateir i’r mynediad ddigwydd ynddo. A. 89 ddim mewn grym ar y Cydsyniad Brenhinol, gweler a. 138(2)