Deddf Diogelwch Adeiladau (Cymru) 2026

Rhagolygol

85 Rheoli risgiau diogelwch tân gan ddeiliaid dyletswydd LL+C

(1) Rhaid i bob deiliad dyletswydd ar gyfer tŷ amlfeddiannaeth perthnasol gymryd pob cam rhesymol i—

(a) atal risg diogelwch tân rhag cael ei gwireddu mewn perthynas â’r tŷ amlfeddiannaeth perthnasol, a

(b) lleihau difrifoldeb unrhyw ddigwyddiad sy’n deillio o wireddiad risg o’r fath.

(2) Rhaid i’r camau y mae deiliad dyletswydd yn eu cymryd, yn benodol, gynnwys pob cam rhesymol i—

(a) lleihau’r tebygolrwydd y bydd tân yn cychwyn (pa un ai’n ddamweiniol neu’n fwriadol) yn y tŷ amlfeddiannaeth perthnasol;

(b) lleihau’r tebygolrwydd y bydd unrhyw dân sy’n cychwyn yn y tŷ amlfeddiannaeth perthnasol neu’n agos ato yn lledaenu ynddo, iddo neu ohono;

(c) sicrhau bod pobl yn y tŷ amlfeddiannaeth perthnasol neu o’i amgylch y mae eu diogelwch mewn perygl oherwydd tân yn y tŷ amlfeddiannaeth perthnasol yn gallu dianc yn gyflym ac yn ddiogel;

(d) sicrhau y gellir ymladd unrhyw dân yn y tŷ amlfeddiannaeth perthnasol yn brydlon ac yn effeithiol.

(3) Caiff y camau y mae deiliad dyletswydd yn eu cymryd o dan yr adran hon gynnwys gwneud gwaith i’r tŷ amlfeddiannaeth perthnasol.

(4) Wrth benderfynu ar y camau sydd i’w cymryd o dan yr adran hon, rhaid i ddeiliad dyletswydd roi sylw penodol i’r asesiad risg tân ar dŷ amlfeddiannaeth cyfredol ar gyfer y tŷ amlfeddiannaeth perthnasol.

(5) Rhaid cymryd camau sy’n ofynnol gan yr adran hon yn brydlon.

(6) Rhaid i ddeiliad dyletswydd—

(a) gwneud trefniadau i sicrhau y caiff y camau a gymerir gan y deiliad dyletswydd o dan yr adran hon eu cynllunio, eu trefnu, eu rheoli, eu monitro a’u hadolygu’n effeithiol, a

(b) rhoi effaith i’r trefniadau hynny.

(7) Rhaid i ddeiliad dyletswydd sicrhau y caiff cofnod ysgrifenedig ei wneud o—

(a) trefniadau y mae’r deiliad dyletswydd yn eu gwneud o dan yr adran hon, a

(b) camau y mae’r deiliad dyletswydd yn eu cymryd o dan yr adran hon.

(8) Caiff Gweinidogion Cymru drwy reoliadau—

(a) gwneud darpariaeth ynghylch yr hyn sy’n gamau rhesymol at ddibenion yr adran hon;

(b) pennu materion y mae rhaid i ddeiliad dyletswydd roi sylw iddynt, neu egwyddorion y mae rhaid i ddeiliad dyletswydd weithredu yn unol â hwy, wrth benderfynu ar y camau i’w cymryd o dan yr adran hon neu wrth gymryd y camau;

(c) pennu gofynion y mae rhaid i drefniadau o dan yr adran hon gydymffurfio â hwy;

(d) pennu gwybodaeth y mae rhaid ei chynnwys mewn cofnod ysgrifenedig o’r trefniadau a wnaed, neu gamau a gymerir, o dan yr adran hon.

(9) Cyn gwneud rheoliadau o dan is-adran (8), rhaid i Weinidogion Cymru ymgynghori ag—

(a) pob awdurdod tai lleol yng Nghymru,

(b) pob awdurdod diogelwch tân, ac

(c) unrhyw bersonau eraill y maent yn ystyried eu bod yn briodol.

Gwybodaeth Cychwyn

I1 A. 85 ddim mewn grym ar y Cydsyniad Brenhinol, gweler a. 138(2)