RHAN 1 LL+C DIOGELWCH ADEILADAU SY’N CYNNWYS DWY NEU RAGOR O UNEDAU PRESWYL

PENNOD 2 LL+C TERMAU ALLWEDDOL

Personau atebol, prif bersonau atebol a rhannau cyffredin LL+C

8 Ystyr “person atebol” LL+C

(1) Mae’r adran hon yn nodi ystyr “person atebol” ar gyfer adeilad rheoleiddiedig at ddibenion y Ddeddf hon.

(2) Person atebol ar gyfer adeilad yw—

(a) person sy’n dal ystad gyfreithiol mewn meddiant yn rhannau cyffredin yr adeilad neu unrhyw ran ohonynt, oni bai bod is-adran (3) yn gymwys, neu

(b) person nad yw’n dal ystad gyfreithiol mewn unrhyw ran o’r adeilad ond sydd o dan rwymedigaeth atgyweirio berthnasol mewn perthynas â rhannau cyffredin yr adeilad neu unrhyw ran ohonynt.

Mae’r is-adran hon yn ddarostyngedig i is-adran (6) (rheol arbennig ar gyfer tir cyfunddaliad).

(3) Nid yw person (“perchennog ystad”) sy’n dal ystad gyfreithiol mewn meddiant yn rhannau cyffredin adeilad neu unrhyw ran ohonynt (“y rhannau cyffredin perthnasol”) yn berson atebol ar gyfer yr adeilad yn rhinwedd is-adran (2)(a) os—

(a) yw pob les hir y mae’r perchennog ystad yn landlord oddi tano yn darparu bod person penodol, nad yw’n dal ystad gyfreithiol mewn unrhyw ran o’r adeilad, o dan rwymedigaeth atgyweirio berthnasol mewn perthynas â’r holl rannau cyffredin perthnasol, neu

(b) yw’r holl rwymedigaethau atgyweirio sy’n ymwneud â’r rhannau cyffredin perthnasol a fyddai fel arall yn rhwymedigaethau’r perchennog ystad yn swyddogaethau cwmni RTM.

(4) Mae is-adran (5) yn gymwys os—

(a) yw tenant o dan les yn dal ystad gyfreithiol mewn meddiant yn rhannau cyffredin adeilad neu unrhyw ran ohonynt (“y rhannau cyffredin perthnasol”), a

(b) yw landlord o dan y les o dan rwymedigaeth atgyweirio berthnasol mewn perthynas ag unrhyw un neu ragor o’r rhannau cyffredin perthnasol.

(5) At ddibenion yr adran hon ac adran 9 (ystyr “prif berson atebol”)—

(a) mae’r ystad gyfreithiol mewn meddiant mewn hynny o’r rhannau cyffredin perthnasol ag sydd o fewn is-adran (4)(b) i’w thrin fel pe bai’n cael ei dal gan y landlord (yn hytrach na’r tenant), a

(b) os (ac i’r graddau) y delir ystad gyfreithiol wirioneddol y landlord yn y rhannau cyffredin hynny o dan les, mae’r ystad gyfreithiol mewn meddiant a grybwyllir ym mharagraff (a) i’w thrin fel pe bai’n cael ei dal o dan y les honno (ac, yn unol â hynny, caiff is-adran (4) a’r is-adran hon fod yn gymwys mewn perthynas â hi).

(6) Os yw adeilad ar dir cyfunddaliad, y gymdeithas gyfunddaliad yw’r person atebol ar gyfer yr adeilad.

Gwybodaeth Cychwyn

I1 A. 8 mewn grym ar 28.4.2026, gweler a. 138(1)(a)