http://www.legislation.gov.uk/asc/2026/5/section/37/welshDeddf Diogelwch Adeiladau (Cymru) 2026cyStatute Law Database2026-06-25Expert Participation2026-04-28 RHAN 1DIOGELWCH ADEILADAU SY’N CYNNWYS DWY NEU RAGOR O UNEDAU PRESWYLPENNOD 5DYLETSWYDDAU SY’N GYMWYS I ADEILADAU CATEGORI 1 A FEDDIENNIR YN UNIGAdroddiadau achos diogelwchLlunio ac adolygu adroddiad achos diogelwch gan brif berson atebol 37 1 Rhaid i’r prif berson atebol ar gyfer adeilad categori 1 a feddiennir lunio adroddiad sy’n cynnwys gwybodaeth a bennir mewn rheoliadau a wnaed gan Weinidogion Cymru sy’n ymwneud ag— a yr asesiad risg tân cyfredol ar gyfer yr adeilad; b y camau a gymerwyd o dan adran 33 (rheoli risgiau diogelwch tân) gan bob person atebol ar gyfer yr adeilad ac unrhyw berson sy’n cael ei drin fel person atebol at ddibenion yr adran honno yn rhinwedd adran 36; c yr asesiad risg strwythurol cyfredol ar gyfer pob rhan o’r adeilad y mae person atebol yn gyfrifol amdani; d y camau a gymerwyd o dan adran 35 (rheoli risgiau diogelwch strwythurol) gan bob person atebol ar gyfer yr adeilad ac unrhyw berson sy’n cael ei drin fel person atebol at ddibenion yr adran honno yn rhinwedd adran 36. 2 Cyfeirir at adroddiad o dan is-adran (1) yn y Ddeddf hon fel “adroddiad achos diogelwch”. 3 Rhaid i’r prif berson atebol lunio yr adroddiad achos diogelwch cyn gynted ag y bo’n rhesymol ymarferol ar ôl i’r diweddaraf o’r digwyddiadau a ganlyn ddigwydd— a bod yr adeilad yn cael ei feddiannu; b bod yr adeilad yn dod yn adeilad categori 1; c bod y person yn dod yn brif berson atebol ar gyfer yr adeilad; d bod yr adran hon yn dod i rym. 4 Cyn gynted â phosibl ar ôl llunio’r adroddiad achos diogelwch, rhaid i’r prif berson atebol roi copi ohono i awdurdod diogelwch adeiladau yr adeilad. 5 Rhaid i’r prif berson atebol— a cadw’r adroddiad achos diogelwch o dan adolygiad, a b gwneud unrhyw ddiwygiadau i’r adroddiad sy’n angenrheidiol i sicrhau ei fod yn cael ei ddiweddaru. 6 Os y’i cyfarwyddir gan yr awdurdod diogelwch adeiladau i wneud hynny, rhaid i’r prif berson atebol ddiwygio’r adroddiad achos diogelwch yn unol â’r cyfarwyddyd. 7 Cyn gynted â phosibl ar ôl diwygio’r adroddiad achos diogelwch o dan is-adran (5) neu (6), rhaid i’r prif berson atebol roi i’r awdurdod diogelwch adeiladau— a copi o’r adroddiad diwygiedig, a b hysbysiad yn crynhoi’r diwygiadau. 8 Caiff Gweinidogion Cymru drwy reoliadau— a gwneud darpariaeth bellach ynghylch cynnwys adroddiad achos diogelwch neu hysbysiad o dan is-adran (7)(b); b gwneud darpariaeth ynghylch ffurf adroddiad neu hysbysiad; c gwneud darpariaeth ynghylch sut y mae rhaid rhoi copi o adroddiad neu hysbysiad. A. 37 ddim mewn grym ar y Cydsyniad Brenhinol, gweler a. 138(2)