RHAN 1 LL+C DIOGELWCH ADEILADAU SY’N CYNNWYS DWY NEU RAGOR O UNEDAU PRESWYL

Rhagolygol

PENNOD 4 LL+C ASESU A RHEOLI RISGIAU DIOGELWCH ADEILAD

Risgiau diogelwch tân mewn adeiladau rheoleiddiedig LL+C

31 Amseru ac adolygu asesiadau risg tân LL+C

(1) Rhaid gwneud yr asesiad risg tân cyntaf ar gyfer adeilad rheoleiddiedig heb fod yn hwyrach na 6 mis ar ôl y diweddaraf o’r hyn a ganlyn—

(a) y diwrnod y caiff yr adeilad ei feddiannu;

(b) y diwrnod y daw’r adran hon i rym.

(2) Caiff Gweinidogion Cymru, drwy reoliadau, ddiwygio’r adran hon i amrywio’r cyfnod ar gyfer gwneud yr asesiad risg tân cyntaf ar gyfer adeilad rheoleiddiedig.

(3) Rhaid gwneud asesiadau risg tân pellach cyn gynted â phosibl ar ôl i unrhyw un neu ragor o’r hyn a ganlyn ddigwydd—

(a) bod gwaith yn cael ei wneud mewn perthynas â’r adeilad, neu bod newidiadau i feddiannaeth neu ddefnydd unrhyw ran o’r adeilad, y mae caniatâd cynllunio neu gymeradwyaeth rheolaeth adeiladu yn ofynnol ar eu cyfer;

(b) bod gwaith yn cael ei wneud‍ am y tro cyntaf mewn perthynas â’r adeilad i addasu unrhyw ran ohono i ddiwallu anghenion preswylwyr anabl (ac eithrio gwaith a wneir y tu mewn i uned breswyl heb yn wybod i’r prif berson atebol);

(c) bod tân yn achosi difrod i unrhyw un neu ragor o rannau cyffredin yr adeilad neu i ddwy uned breswyl neu ragor yn yr adeilad;

(d) bod canfyddiadau adolygiad o dan is-adran (6) yn awgrymu nad yw’r asesiad risg tân cyfredol ar gyfer yr adeilad yn addas nac yn ddigonol mwyach at y diben a grybwyllir yn adran 29(4);

(e) bod gan y prif berson atebol ar gyfer yr adeilad unrhyw reswm arall dros amau nad yw’r asesiad cyfredol yn addas nac yn ddigonol mwyach at y diben hwnnw.

(4) Ond os bydd unrhyw un neu ragor o’r amgylchiadau a grybwyllir yn is-adran (3) yn digwydd ar adeg pan nad yw’r adeilad wedi ei feddiannu, rhaid gwneud asesiad risg tân pellach cyn gynted â phosibl ar ôl i’r adeilad gael ei feddiannu eto.

(5) Rhaid i’r prif berson atebol ar gyfer yr adeilad sicrhau, os caiff ei gyfarwyddo i wneud hynny gan awdurdod diogelwch tân yr adeilad, fod asesiad risg tân pellach yn cael ei wneud o fewn cyfnod a bennir yn y cyfarwyddyd.

(6) Rhaid i’r prif berson atebol sicrhau bod yr asesiad risg tân cyfredol ar gyfer yr adeilad yn cael ei adolygu, er mwyn sicrhau ei fod yn parhau i fod yn addas ac yn ddigonol, o leiaf unwaith ym mhob 12 mis ar ôl i’r asesiad gael ei wneud.

Gwybodaeth Cychwyn

I1 A. 31 ddim mewn grym ar y Cydsyniad Brenhinol, gweler a. 138(2)