Deddf Llety Ymwelwyr (Cofrestr ac Ardoll) Etc. (Cymru) 2025

34 Ychwanegu swm ychwanegol at gyfradd ardoll LL+C

(1) Caiff Gweinidogion Cymru drwy reoliadau ddarparu y caiff prif gynghorau (yn unol â Phennod 4) ychwanegu swm a bennir yn y rheoliadau at y naill neu’r llall o’r cyfraddau a ganlyn, neu at y ddwy—

(a) cyfradd is yr ardoll sy’n daladwy yn ardal y cyngor;

(b) cyfradd uwch yr ardoll sy’n daladwy yn ardal y cyngor.

(2) Caniateir i swm a bennir o dan is-adran (1) gael ei fynegi fel canran o gyfradd yr ardoll o dan sylw.

(3) Caiff rheoliadau o dan is-adran (1), yn benodol, wneud darpariaeth—

(a) ynghylch a gaiff prif gyngor ychwanegu swm at gyfradd ardoll sy’n llai na’r swm a bennir yn y rheoliadau, ac i ba raddau y caiff wneud hynny;

(b) sy’n galluogi prif gyngor i wneud y canlynol—

(i) ychwanegu swm at yr ardoll dim ond mewn perthynas â rhan neu rannau o’i ardal;

(ii) ychwanegu symiau gwahanol at yr ardoll (sy’n llai na’r symiau a bennir yn y rheoliadau) mewn perthynas â rhannau gwahanol o’i ardal;

(c) sy’n pennu cyfnodau o amser, neu’n galluogi prif gyngor i bennu cyfnodau o amser—

(i) pan na fo’r symiau ychwanegol yn gymwys;

(ii) pan fo swm ychwanegol sy’n llai na’r swm a bennir yn y rheoliadau yn gymwys.

(4) Cyn gwneud rheoliadau o dan is-adran (1), rhaid i Weinidogion Cymru ymgynghori â’r canlynol—

(a) pob prif gyngor;

(b) pob awdurdod Parc Cenedlaethol ar gyfer Parc Cenedlaethol yng Nghymru;

(c) sefydliadau sydd—

(i) yn cynrychioli busnesau sy’n gweithio ym maes twristiaeth, neu sy’n ymwneud â gweithgareddau sy’n gysylltiedig â thwristiaeth, yng Nghymru;

(ii) yn hybu neu’n hwyluso twristiaeth yng Nghymru;

(d) unrhyw bersonau eraill y maent yn ystyried eu bod yn briodol.

Gwybodaeth Cychwyn

I1 A. 34 mewn grym ar 19.9.2025, gweler a. 67(1)