http://www.legislation.gov.uk/asc/2025/5/section/29/welshDeddf Llety Ymwelwyr (Cofrestr ac Ardoll) Etc. (Cymru) 2025cyStatute Law Database2026-05-06Expert Participation2025-09-19 RHAN 3PENNOD 1 29 1 At ddibenion y Rhan hon, mae arhosiad dros nos mewn llety ymwelwyr yn digwydd— a os oes gan un neu ragor o bobl hawlogaeth, o dan gontract, i breswylio‍ am un neu ragor o nosweithiau mewn llety ymwelwyr mewn mangre yn ardal prif gyngor sydd wedi cyflwyno’r ardoll, b os darperir y llety i’r bobl hynny yng nghwrs masnach neu fusnes a gynhelir gan y darparwr llety ymwelwyr, c os nad yw’r llety yn unig breswylfa neu’n brif breswylfa unrhyw un neu ragor o’r bobl hynny, a d os yw unrhyw un neu ragor o’r bobl hynny yn mynd i mewn i’r llety yn unol â’r contract. 2 Ond nid yw arhosiad dros nos mewn llety ymwelwyr yn digwydd— a os yw’r contract yn rhoi hawlogaeth i un neu ragor o unigolion penodol i breswylio yn y llety ymwelwyr (pa un ai ag unrhyw berson arall ai peidio), a bod gan bob unigolyn penodol hawlogaeth o dan y contract i breswylio yno— i am fwy nag 31 o nosweithiau (pa un a yw’r nosweithiau hynny yn olynol ai peidio), a ii pob noson y mae’r contract yn rhoi hawlogaeth i breswylio yn y llety hwnnw; b os yw’r llety— i wedi ei drefnu gan, neu wedi ei ddarparu ar ran, prif gyngor (fel awdurdod tai lleol) o dan Ran 2 o Ddeddf Tai (Cymru) 2014 (dccc 7) (digartrefedd); ii wedi ei ddarparu o dan adran 4 (llety) neu o dan Ran 6 (cymorth i geiswyr lloches, etc.) o Ddeddf Mewnfudo a Lloches 1999 (p. 33); iii wedi ei ddarparu ar ran yr Ysgrifennydd Gwladol mewn cysylltiad â gofyniad a osodir o dan adran 3(6) (darpariaethau cyffredinol) o Ddeddf Mechnïaeth 1976 (p. 63); iv wedi ei ddarparu o dan Ran 1 (trefniadau ar gyfer darparu gwasanaethau prawf) o Ddeddf Rheoli Troseddwyr 2007 (p. 21) at y dibenion prawf (o fewn ystyr “the probation purposes” yn adran 1 o’r Ddeddf honno); v yn ymwneud â chyfleusterau a ddarperir o dan baragraff 9 o Atodlen 10 (mechnïaeth mewnfudo) i Ddeddf Mewnfudo 2016 (p. 19) ar gyfer lletya person mewn cyfeiriad a bennir mewn amod mechnïaeth mewnfudo. 3 Yn yr adran hon, nid yw “contract” yn cynnwys contract gwasanaeth, contract prentisiaeth, na chontract am wasanaethau y mae person sydd â hawlogaeth i breswylio yn y llety ymwelwyr yn darparu gwasanaethau odano i’r darparwr llety ymwelwyr. 4 Y darparwr llety ymwelwyr, mewn cysylltiad ag arhosiad dros nos mewn llety ymwelwyr, yw’r darparwr llety ymwelwyr— a sy’n darparu’r llety y mae’r arhosiad yn digwydd ynddo, a b sy’n feddiannydd ar y fangre lle y darperir y llety hwnnw. 5 Caiff Gweinidogion Cymru drwy reoliadau ddiwygio’r adran hon at ddibenion ychwanegu, dileu neu newid disgrifiadau o amgylchiadau pryd y mae arhosiad dros nos mewn llety ymwelwyr yn digwydd neu pryd nad yw arhosiad dros nos mewn llety ymwelwyr yn digwydd. 6 Caiff Gweinidogion Cymru drwy reoliadau wneud darpariaeth ynghylch ffyrdd y caniateir profi na ddigwyddodd arhosiad dros nos mewn llety ymwelwyr oherwydd bod y llety yn dod o fewn is-adran (2)(b), gan gynnwys darpariaeth ynghylch— a dogfennau neu wybodaeth arall y gellir dibynnu arnynt neu arni i brofi na ddigwyddodd arhosiad dros nos mewn llety ymwelwyr; b gwneud trefniadau ar gyfer dyroddi talebau y gellir eu defnyddio i brofi na ddigwyddodd arhosiad dros nos mewn llety ymwelwyr, ac mewn perthynas â dyroddi talebau o’r fath. A. 29 mewn grym ar 19.9.2025, gweler a. 67(1)