Deddf Tomenni Mwyngloddiau a Chwareli Nas Defnyddir (Cymru) 2025

Swyddogaethau cyffredinol

3 Gwybodaeth, cyngor a chynhorthwy

(1) Rhaid i’r Awdurdod roi unrhyw wybodaeth, cyngor neu gynhorthwy i Weinidogion Cymru y gall fod eu hangen arnynt mewn cysylltiad ag unrhyw fater sy’n berthnasol i arfer eu swyddogaethau o dan y Ddeddf hon neu unrhyw un neu ragor o’u swyddogaethau eraill.

(2) Caiff yr Awdurdod, ar ei gymhelliad ei hun, roi gwybodaeth, cyngor neu gynhorthwy i Weinidogion Cymru mewn cysylltiad ag unrhyw fater sy’n berthnasol i arfer eu swyddogaethau o dan y Ddeddf hon neu unrhyw un neu ragor o’u swyddogaethau eraill.

(3) Caiff yr Awdurdod roi gwybodaeth neu gyngor i unrhyw berson ac eithrio Gweinidogion Cymru ar unrhyw fater sy’n ymwneud â thomen nas defnyddir benodol neu domenni nas defnyddir yn gyffredinol, neu roi cynorthwy iddynt â’r mater hwnnw.

(4) Caiff yr Awdurdod godi ffi am ddarparu gwybodaeth, cyngor neu gynhorthwy o dan is-adran (3).

(5) Yn yr adran hon, mae “cynhorthwy” yn cynnwys cynnal gweithrediadau ar dir.

4 Cynhorthwy ariannol

(1) Caiff yr Awdurdod, gyda chydsyniad Gweinidogion Cymru, roi cynhorthwy ariannol i unrhyw berson mewn cysylltiad â gwariant perthnasol.

(2) Yn is-adran (1), ystyr “gwariant perthnasol” yw gwariant yr aed iddo neu yr eir iddo gan y person ar unrhyw beth y mae’r Awdurdod ystyried ei fod yn ffafriol i gyflawni ei brif amcan.

(3) Caniateir rhoi cynhorthwy ariannol o dan is-adran (1)—

(a) drwy grant neu fenthyciad;

(b) yn ddarostyngedig i amodau.

5 Pwerau ategol

(1) Caiff yr Awdurdod wneud unrhyw beth y bwriedir iddo hwyluso arfer ei swyddogaethau neu sy’n ffafriol neu’n ddeilliadol i’w harfer.

(2) Ond ni chaiff yr Awdurdod gael benthyg arian oddi wrth unrhyw berson heblaw Gweinidogion Cymru.