Deddf Seilwaith (Cymru) 2024

Rhagolygol

25 Cyfarwyddydau o dan adrannau 22 i 24: darpariaeth gyffredinol LL+C

(1) Mae’r adran hon yn gymwys i gyfarwyddydau o dan adrannau 22, 23 a 24.

(2) Caniateir rhoi cyfarwyddyd yn ddarostyngedig i amodau.

(3) Caiff cyfarwyddyd bennu o fewn pa gyfnod y mae’n cael effaith.

(4) Caiff Gweinidogion Cymru roi cyfarwyddyd yn dilyn archiad cymhwysol oddi wrth ddatblygwr neu pan na cheir archiad cymhwysol oddi wrth ddatblygwr.

(5) Nid yw’n ofynnol i Weinidogion Cymru ystyried archiad am gyfarwyddyd oni bai ei fod yn archiad cymhwysol oddi wrth ddatblygwr.

(6) Os yw Gweinidogion Cymru yn cael archiad cymhwysol, rhaid iddynt roi rhesymau dros eu penderfyniad i roi neu i beidio â rhoi’r cyfarwyddyd y gwnaed archiad amdano i’r person a wnaeth yr archiad.

(7) Yn yr adran hon—

• ystyr “archiad cymhwysol” (“qualifying request”) yw archiad ysgrifenedig am gyfarwyddyd o dan yr adran hon sy’n pennu’r datblygiad y mae’n ymwneud ag ef;

• ystyr “datblygwr” (“developer”) yw—

  (a)

  person sy’n bwriadu cynnal unrhyw ran neu’r cyfan o’r datblygiad y mae’r archiad yn ymwneud ag ef;

  (b)

  person sydd wedi gwneud cais, neu sy’n bwriadu gwneud cais, am gydsyniad adran 20 mewn perthynas ag unrhyw ran neu’r cyfan o’r datblygiad;

  (c)

  person sydd, os rhoddir cyfarwyddyd o dan adran 22(1) mewn perthynas â’r datblygiad hwnnw, yn bwriadu gwneud cais am gydsyniad seilwaith ar gyfer unrhyw ran neu’r cyfan o’r datblygiad hwnnw.

Gwybodaeth Cychwyn

I1 A. 25 ddim mewn grym ar y Cydsyniad Brenhinol, gweler a. 147(2)