Deddf Seilwaith (Cymru) 2024

Ffioedd LL+C

124 Ffioedd am gyflawni swyddogaethau a darparu gwasanaethau cydsyniad seilwaith LL+C

(1) Caiff rheoliadau wneud darpariaeth ar gyfer codi ffioedd ac mewn cysylltiad â chodi ffioedd gan—

(a) awdurdod cyhoeddus penodedig am gyflawni swyddogaeth cydsyniad seilwaith;

(b) awdurdod cyhoeddus penodedig am ddarparu gwasanaeth cydsyniad seilwaith.

(2) Ystyr “swyddogaeth cydsyniad seilwaith” yw swyddogaeth a roddir gan y Ddeddf hon, odani neu yn ei rhinwedd.

(3) Ystyr “gwasanaeth cydsyniad seilwaith” yw unrhyw gyngor, gwybodaeth neu gymorth arall (gan gynnwys ymateb i ymgynghoriad neu gymryd rhan mewn archwiliad o gais drwy lunio cyflwyniad ysgrifenedig, bod yn bresennol neu roi tystiolaeth mewn gwrandawiad neu fod yn bresennol neu roi tystiolaeth mewn ymchwiliad lleol) a ddarperir mewn cysylltiad ag—

(a) cais neu gais arfaethedig—

(i) am gydsyniad seilwaith, neu

(ii) i newid neu ddirymu gorchymyn cydsyniad seilwaith, neu

(b) unrhyw fater penodedig arall sy’n ymwneud â phrosiectau seilwaith arwyddocaol.

(4) Caiff rheoliadau o dan is-adran (1), ymhlith pethau eraill, wneud darpariaeth ynghylch—

(a) pryd y caniateir, a phryd na chaniateir, codi ffi (gan gynnwys ffi atodol);

(b) y swm y caniateir ei godi (gan gynnwys darpariaeth sy’n pennu’r swm neu ddarpariaeth sy’n rhoi pŵer i bennu’r swm);

(c) yr hyn y caniateir, a’r hyn na chaniateir, ei ystyried wrth gyfrifo’r swm a godir;

(d) pwy sy’n agored i dalu ffi a godir;

(e) i bwy y telir ffioedd;

(f) pryd y mae ffi a godir yn daladwy;

(g) adennill ffioedd a godir;

(h) ildio, lleihau neu ad-dalu ffioedd;

(i) effaith talu neu fethu â thalu ffioedd a godir (gan gynnwys darpariaeth sy’n caniatáu i awdurdod cyhoeddus a bennir o dan is-adran (1) beidio â gwneud rhywbeth y byddai’n ofynnol i’r awdurdod ei wneud fel arall o dan ddeddfiad hyd nes y telir unrhyw ffioedd sydd heb eu talu am ei wneud);

(j) trosglwyddo ffioedd sy’n daladwy i un person i berson arall;

(k) cyflenwi neu gyhoeddi gwybodaeth at unrhyw un neu ragor o ddibenion y rheoliadau.

(5) Caiff rheoliadau o dan is-adran (1) roi swyddogaeth, gan gynnwys swyddogaeth sy’n ymwneud ag arfer disgresiwn, i unrhyw berson.

(6) Caiff rheoliadau o dan is-adran (1)(a) ddarparu bod symiau ffioedd i’w cyfrifo drwy gyfeirio at y costau yr eir iddynt—

(a) wrth gyflawni unrhyw swyddogaeth cydsyniad seilwaith, a

(b) wrth wneud unrhyw beth y bwriedir iddo hwyluso cyflawni unrhyw swyddogaeth cydsyniad seilwaith, neu sy’n ffafriol neu’n ddeilliadol i’w chyflawni.

(7) Yn yr adran hon, ystyr “penodedig” yw wedi ei bennu mewn rheoliadau.

Gwybodaeth Cychwyn

I1 A. 124 mewn grym ar 4.6.2024 at ddibenion penodedig, gweler a. 147(1)(b)