Deddf yr Amgylchedd Hanesyddol (Cymru) 2023 (dsc3)

RHAN 2 LL+C HENEBION O DDIDDORDEB HANESYDDOL ARBENNIG

PENNOD 3 LL+C RHEOLAETHU GWAITH SY’N EFFEITHIO AR HENEBION COFRESTREDIG

Awdurdodi gwaith LL+C

11 Gofyniad i waith gael ei awdurdodi LL+C

(1) Ni chaiff person gyflawni gwaith y mae’r adran hon yn gymwys iddo, na pheri na chaniatáu i waith o’r fath gael ei gyflawni, oni bai bod y gwaith wedi ei awdurdodi o dan y Bennod hon.

(2) Mae’r adran hon yn gymwys—

(a) i waith sy’n arwain at ddymchwel neu ddinistrio heneb gofrestredig, neu at unrhyw ddifrod i heneb gofrestredig;

(b) i waith at ddiben symud ymaith neu atgyweirio heneb gofrestredig neu unrhyw ran ohoni, neu wneud unrhyw addasiadau i’r heneb neu i unrhyw ran ohoni neu unrhyw ychwanegiadau ati neu at unrhyw ran ohoni;

(c) i weithrediadau i foddi tir, neu weithrediadau tipio ar dir, y mae heneb gofrestredig ynddo, arno neu odano.

Gwybodaeth Cychwyn

I1 A. 11 ddim mewn grym ar y Cydsyniad Brenhinol, gweler a. 212(2)

I2 A. 11 mewn grym ar 4.11.2024 gan O.S. 2024/860, ergl. 3(a)