RHAN 3HYBU MYNEDIAD AT LYWODRAETH LEOL

PENNOD 4CYFARFODYDD LLYWODRAETH LEOL

50Rheoliadau ynglŷn â chynnal cyfarfodydd awdurdodau lleol, dogfennau sy’n ymwneud â chyfarfodydd a chyhoeddi gwybodaeth

(1)

Caiff Gweinidogion Cymru, drwy reoliadau, wneud darpariaeth ar gyfer ac mewn cysylltiad â gofynion sy’n ymwneud â hysbysiadau a dogfennau eraill mewn perthynas â chyfarfodydd awdurdodau lleol ac sy’n ymwneud â chynnal y cyfarfodydd hynny.

(2)

Caiff rheoliadau o dan is-adran (1) gynnwys, yn benodol, ddarpariaeth ynglŷn ag—

(a)

llunio hysbysiadau a dogfennau eraill sy’n ymwneud â chyfarfodydd awdurdodau lleol;

(b)

cyhoeddi a dosbarthu’r hysbysiadau a’r dogfennau hynny;

(c)

cynnwys yr hysbysiadau a’r dogfennau hynny;

(d)

hawliau i gael mynediad at yr hysbysiadau a’r dogfennau hynny;

(e)

cadw dogfennau sy’n ymwneud â chynnal cyfarfodydd awdurdodau lleol;

(f)

trefniadau sy’n ymwneud â chynnal cyfarfodydd awdurdodau lleol;

(g)

cofnodi penderfyniadau a wneir yn y cyfarfodydd hynny.

(3)

Caiff Gweinidogion Cymru hefyd, drwy reoliadau, wneud darpariaeth ar gyfer cyhoeddi gan awdurdodau lleol, ac mewn cysylltiad â chyhoeddi gan awdurdodau lleol, wybodaeth sy’n nodi manylion ynglŷn ag—

(a)

aelodau o’r awdurdod a’i bwyllgorau a’i is-bwyllgorau;

(b)

hawliau i fynychu cyfarfodydd awdurdod lleol a chael mynediad at ddogfennau;

(c)

arfer pwerau awdurdod lleol gan ei swyddogion,

a gwneud darpariaeth ar gyfer hawliau i gael mynediad at yr wybodaeth honno, ac mewn cysylltiad â hynny.

(4)

Caiff rheoliadau o dan yr adran hon ddiwygio, addasu, ddiddymu neu ddirymu unrhyw ddeddfiad.

(5)

Yn yr adran hon—

ystyr “awdurdod lleol” (“local authority”) yw—

(a)

prif gyngor;

(b)

cyngor cymuned;

(c)

awdurdod tân ac achub ar gyfer ardal yng Nghymru;

(d)

awdurdod Parc Cenedlaethol ar gyfer Parc Cenedlaethol yng Nghymru;

(e)

cyd-fwrdd—

  1. (i)

    a gyfansoddir yn gorff corfforedig o dan unrhyw ddeddfiad, a

  2. (ii)

    sy’n cyflawni swyddogaethau dau brif gyngor neu ragor;

(f)

awdurdod iechyd porthladd ar gyfer ardal iechyd porthladd yng Nghymru a gyfansoddwyd o dan adran 2 o Ddeddf Iechyd y Cyhoedd (Rheoli Clefydau) 1984 (p. 22);

ystyr “cyfarfod awdurdod lleol” (“local authority meeting”) yw cyfarfod—

(a)

awdurdod lleol;

(b)

pan fo’r awdurdod lleol yn brif gyngor, ei weithrediaeth;

(c)

cyd-bwyllgor o ddau awdurdod lleol neu ragor;

(d)

pwyllgor neu is-bwyllgor i unrhyw beth sydd o fewn paragraffau (a) i (c).