ATODLEN 2Y WEITHDREFN AR GYFER GWNEUD RHEOLIADAU
Rheoliadau’r weithdrefn uwch
1
(1)
Mae’r paragraff hwn yn gymwys i offeryn statudol sy’n cynnwys rheoliadau a wneir o dan y Ddeddf hon sydd—
(a)
yn sefydlu awdurdod cyhoeddus newydd;
(b)
yn rhoi swyddogaethau i awdurdod cyhoeddus;
(c)
yn gosod neu’n cynyddu ffi mewn cysylltiad â swyddogaeth sy’n arferadwy gan awdurdod cyhoeddus;
(d)
yn creu trosedd neu’n ehangu cwmpas trosedd;
(e)
yn creu neu’n diwygio pŵer i ddeddfu;
(f)
yn addasu deddfwriaeth sylfaenol;
(g)
wedi eu gwneud o dan adran 11, adran 12 neu adran 22;
ond nid yw’r paragraff hwn yn gymwys os yw paragraff 4 yn gymwys.
(2)
Os yw Gweinidogion Cymru yn ystyried ei bod yn briodol bwrw ymlaen i wneud y rheoliadau rhaid iddynt osod drafft o’r rheoliadau gerbron Cynulliad Cenedlaethol Cymru ynghyd â datganiad sy’n nodi barn Gweinidogion Cymru o ran a ddylai’r weithdrefn yn is-baragraffau (6) i (14) fod yn gymwys.
(3)
Os yw’r rheoliadau drafft yn cynnwys darpariaeth sy’n addasu deddfwriaeth sylfaenol, rhaid i Weinidogion Cymru osod datganiad gerbron Cynulliad Cenedlaethol Cymru sy’n esbonio pam bod angen y ddarpariaeth.
(4)
Os, ar ôl i’r cyfnod o 40 o ddiwrnodau ddod i ben, yw’r rheoliadau drafft a osodwyd o dan is-baragraff (2) wedi eu cymeradwyo drwy benderfyniad gan Gynulliad Cenedlaethol Cymru, caiff Gweinidogion Cymru wneud rheoliadau ar ffurf y rheoliadau drafft, oni bai bod y weithdrefn yn is-baragraffau (6) i (14) yn gymwys.
(5)
Mae’r weithdrefn yn is-baragraffau (6) i (14) yn gymwys i’r rheoliadau drafft yn lle’r weithdrefn yn is-baragraff (4)—
(a)
os yw’r rheoliadau drafft i’w gwneud o dan adran 12 neu adran 22,
(b)
os yw Cynulliad Cenedlaethol Cymru yn penderfynu o fewn y cyfnod o 30 o ddiwrnodau y dylai’r weithdrefn fod yn gymwys, neu
(c)
os yw pwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft yn argymell o fewn y cyfnod o 30 o ddiwrnodau y dylai’r weithdrefn fod yn gymwys ac nad yw’r Cynulliad, drwy benderfyniad, yn gwrthod yr argymhelliad o fewn y cyfnod hwnnw.
(6)
Rhaid i Weinidogion Cymru roi sylw i—
(a)
unrhyw sylwadau,
(b)
unrhyw benderfyniad gan Gynulliad Cenedlaethol Cymru, ac
(c)
unrhyw argymhellion gan bwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft,
a wneir yn ystod y cyfnod o 60 o ddiwrnodau o ran y rheoliadau drafft.
(7)
Os, ar ôl i’r cyfnod o 60 o ddiwrnodau ddod i ben, yw Gweinidogion Cymru yn dymuno gwneud rheoliadau ar ffurf y drafft, rhaid iddynt osod gerbron Cynulliad Cenedlaethol Cymru ddatganiad—
(a)
sy’n datgan a gyflwynwyd unrhyw sylwadau, a
(b)
sydd, os cyflwynwyd unrhyw sylwadau, yn rhoi manylion y sylwadau hynny.
(8)
Caiff Gweinidogion Cymru, ar ôl gosod y datganiad, wneud rheoliadau ar ffurf y drafft os y’i cymeradwyir drwy benderfyniad gan Gynulliad Cenedlaethol Cymru.
(9)
Ond caiff pwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft, ar unrhyw adeg ar ôl i ddatganiad gael ei osod o dan is-baragraff (7) a chyn i’r rheoliadau drafft gael eu cymeradwyo gan y Cynulliad o dan is-baragraff (8), argymell nad oes unrhyw drafodion pellach mewn perthynas â’r rheoliadau drafft.
(10)
Pan fo argymhelliad wedi ei wneud gan bwyllgor yng Nghynulliad Cenedlaethol Cymru o dan is-baragraff (9) mewn perthynas â rheoliadau drafft, ni chaniateir unrhyw drafodion mewn perthynas â’r drafft o dan is-baragraff (8) oni bai bod yr argymhelliad wedi ei wrthod drwy benderfyniad gan y Cynulliad.
(11)
Os, ar ôl i’r cyfnod o 60 o ddiwrnodau ddod i ben, yw Gweinidogion Cymru yn dymuno bwrw ymlaen i wneud y rheoliadau drafft ond gyda newidiadau sylweddol, rhaid i Weinidogion Cymru osod gerbron Cynulliad Cenedlaethol Cymru—
(a)
y rheoliadau drafft diwygiedig,
(b)
datganiad—
(i)
sy’n rhoi crynodeb o’r newidiadau a gynigir,
(ii)
sy’n datgan a gyflwynwyd unrhyw sylwadau, a
(iii)
sydd, os cyflwynwyd unrhyw sylwadau, yn rhoi manylion y sylwadau hynny.
(12)
Os yw’r rheoliadau drafft diwygiedig wedi eu cymeradwyo drwy benderfyniad gan Gynulliad Cenedlaethol Cymru, caiff Gweinidogion Cymru wneud y rheoliadau ar ffurf y rheoliadau drafft diwygiedig.
(13)
Ond caiff pwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft diwygiedig, ar unrhyw adeg ar ôl i ddatganiad gael ei osod o dan is-baragraff (11) a chyn i’r rheoliadau drafft gael eu cymeradwyo gan y Cynulliad o dan is-baragraff (12), argymell nad oes unrhyw drafodion pellach mewn perthynas â’r rheoliadau drafft diwygiedig.
(14)
Pan fo argymhelliad wedi ei wneud gan bwyllgor yng Nghynulliad Cenedlaethol Cymru o dan is-baragraff (13) mewn perthynas â rheoliadau drafft diwygiedig, ni chaniateir unrhyw drafodion mewn perthynas â’r drafft diwygiedig o dan is-baragraff (12) oni bai bod yr argymhelliad wedi ei wrthod drwy benderfyniad gan y Cynulliad.
(15)
At ddibenion y paragraff hwn mae rheoliadau wedi eu gwneud ar ffurf y rheoliadau drafft neu’r rheoliadau drafft diwygiedig os nad ydynt yn cynnwys newidiadau sylweddol i’w darpariaethau.
(16)
Yn y paragraff hwn, mae cyfeiriadau at y cyfnodau “30 o ddiwrnodau”, “40 o ddiwrnodau” a “60 o ddiwrnodau” mewn perthynas ag unrhyw reoliadau drafft yn gyfeiriadau at y cyfnodau o 30, 40 a 60 o ddiwrnodau sy’n dechrau â’r diwrnod y cafodd y rheoliadau drafft eu gosod gerbron Cynulliad Cenedlaethol Cymru.
(17)
At ddibenion is-baragraff (16) nid oes unrhyw ystyriaeth i’w rhoi i unrhyw amser pan yw Cynulliad Cenedlaethol Cymru wedi ei ddiddymu neu ar doriad am fwy na 4 diwrnod.
Datgelu sylwadau
2
(1)
Pan fo person sy’n cyflwyno sylwadau am reoliadau drafft neu reoliadau drafft diwygiedig o dan baragraff 1 wedi gofyn i Weinidogion Cymru beidio â’u datgelu, ni chaiff Gweinidogion Cymru eu datgelu o dan baragraff 1 os neu i’r graddau y byddai gwneud hynny (gan ddiystyru unrhyw gysylltiad â thrafodion yng Nghynulliad Cenedlaethol Cymru) yn gyfystyr â thorri cyfrinachedd y gall unrhyw berson ddwyn achos yn ei gylch.
(2)
Os yw gwybodaeth sydd mewn sylwadau yn ymwneud â pherson arall, nid oes angen i Weinidogion Cymru ddatgelu’r wybodaeth o dan baragraff 1 os neu i’r graddau—
(a)
y mae’n ymddangos i Weinidogion Cymru y gallai datgelu’r wybodaeth honno effeithio’n andwyol ar fuddiannau’r person arall hwnnw; a
(b)
y mae Gweinidogion Cymru wedi methu â chael cydsyniad y person arall hwnnw i’r wybodaeth gael ei datgelu.
(3)
Nid yw is-baragraffau (1) a (2) yn effeithio ar unrhyw ddatgeliad y gofynnir amdano gan bwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft neu’r rheoliadau drafft diwygiedig, ac a wneir i’r pwyllgor.
Rheoliadau’r weithdrefn safonol
3
(1)
Mae’r paragraff hwn yn gymwys i offeryn statudol sy’n cynnwys rheoliadau o dan y Ddeddf hon, oni bai bod paragraff 1 neu 4 yn gymwys.
(2)
Ni chaniateir i’r rheoliadau gael eu gwneud oni bai bod drafft o’r rheoliadau wedi ei osod gerbron Cynulliad Cenedlaethol Cymru a’i gymeradwyo ganddo drwy benderfyniad.
Rheoliadau’r weithdrefn frys
4
(1)
Caniateir i offeryn statudol sy’n cynnwys rheoliadau o dan y Ddeddf hon (ac eithrio adran 11, adran 12 ac adran 22) gael ei wneud heb i ddrafft ohono gael ei osod gerbron Cynulliad Cenedlaethol Cymru a’i gymeradwyo ganddo drwy benderfyniad, os yw’n cynnwys datganiad bod Gweinidogion Cymru o’r farn, oherwydd brys, fod angen gwneud y rheoliadau heb osod na chymeradwyo drafft.
(2)
Ar ôl i offeryn gael ei wneud yn unol ag is-baragraff (1), rhaid i Weinidogion Cymru ei osod gerbron Cynulliad Cenedlaethol Cymru ynghyd â datganiad sy’n esbonio amgylchiadau’r brys a pham, ym marn Gweinidogion Cymru, yr oedd angen gwneud y rheoliadau heb osod na chymeradwyo drafft.
(3)
Mae rheoliadau sydd wedi eu cynnwys mewn offeryn a wneir yn unol ag is-baragraff (1) yn peidio â chael effaith ar ddiwedd cyfnod o 30 o ddiwrnodau, sy’n dechrau â’r diwrnod y caiff yr offeryn ei wneud oni bai bod yr offeryn, yn ystod y cyfnod hwnnw, wedi ei gymeradwyo drwy benderfyniad gan Gynulliad Cenedlaethol Cymru.
(4)
Wrth gyfrifo’r cyfnod o 30 o ddiwrnodau, nid oes unrhyw ystyriaeth i’w rhoi i unrhyw amser pan yw Cynulliad Cenedlaethol Cymru wedi ei ddiddymu neu ar doriad am fwy na 4 diwrnod.
(5)
Os yw rheoliadau yn peidio â chael effaith o ganlyniad i is-baragraff (3), nid yw hynny—
(a)
yn effeithio ar ddilysrwydd unrhyw beth a wnaed yn flaenorol o dan y rheoliadau, neu
(b)
yn atal gwneud rheoliadau newydd.
Y weithdrefn ar ailarfer pwerau penodol
5
Caiff offeryn, y mae paragraff 1, 3 neu 4 yn gymwys iddo, sy’n dirymu, yn diwygio neu’n ailddeddfu unrhyw offeryn o’r fath (er gwaethaf adran 14 o Ddeddf Dehongli 1978) fod yn ddarostyngedig i weithdrefn wahanol o dan yr Atodlen hon i’r weithdrefn yr oedd yr offeryn a oedd yn cynnwys y rheoliadau gwreiddiol yn ddarostyngedig iddi.
Cyfuniadau o offerynnau
6
(1)
Mae is-baragraff (2) yn gymwys i offeryn statudol sy’n cynnwys rheoliadau o dan y Ddeddf hon sy’n ddarostyngedig i weithdrefn o dan baragraff 1, 3 neu 4.
(2)
Caiff yr offeryn statudol hefyd gynnwys rheoliadau o dan ddeddfiad arall a wneir drwy offeryn statudol sy’n ddarostyngedig i weithdrefn gerbron Cynulliad Cenedlaethol Cymru sy’n darparu ar gyfer diddymu’r offeryn ar ôl iddo gael ei wneud.
(3)
Pan fo rheoliadau wedi eu cynnwys fel y’i crybwyllir yn is-baragraff (2), y weithdrefn sy’n gymwys i’r offeryn statudol yw’r weithdrefn a grybwyllir yn is-baragraff (1) ac nid y weithdrefn a grybwyllir yn is-baragraff (2).
(4)
Nid yw’r paragraff hwn yn atal cynnwys rheoliadau eraill mewn offeryn statudol sy’n cynnwys rheoliadau o dan y Ddeddf hon.