Trosolwg Cyffredinol O’R Ddeddf
6.Mae’r Ddeddf yn cynnwys darpariaethau mewn nifer o feysydd polisi arwahanol, a nod pob un ohonynt yw ymdrin â heriau cyfoes i iechyd a llesiant yng Nghymru.
7.Yn y Ddeddf ceir 127 o adrannau (mewn 9 Rhan) a 4 Atodlen.
Rhan 1 – Trosolwg
Mae Rhan 2 yn ei gwneud yn ofynnol i Weinidogion Cymru gyhoeddi ac adolygu strategaeth genedlaethol ar atal gordewdra a lleihau lefelau gordewdra yng Nghymru.
Rhan 3 – Tybaco a Chynhyrchion Nicotin
Mae Pennod 1 yn cyfyngu ar ysmygu mewn gweithleoedd caeedig a sylweddol gaeedig a mannau cyhoeddus, ac mewn lleoliadau gofal awyr agored i blant, yn nhir ysgolion, yn nhir ysbytai ac mewn meysydd chwarae cyhoeddus. Mae hefyd yn rhoi pŵer i Weinidogion Cymru i ehangu’r cyfyngiadau i fangreoedd eraill, ac i gerbydau;
Mae Pennod 2 yn sefydlu cofrestr genedlaethol o fanwerthwyr tybaco a chynhyrchion nicotin;
Mae Pennod 3 yn rhoi i Weinidogion Cymru bŵer i wneud rheoliadau i ychwanegu at y troseddau sy’n cyfrannu at Orchymyn Mangre o dan Gyfyngiad yng Nghymru;
Mae Pennod 4 yn gwahardd rhoi tybaco neu gynhyrchion nicotin (pan fyddant yn cael eu danfon neu eu casglu mewn cysylltiad â’u gwerthu) i berson o dan 18 oed sydd ar ei ben ei hun;
Mae Rhan 4 yn darparu ar gyfer creu cynllun trwyddedu mandadol i unigolion sy’n rhoi ‘triniaethau arbennig’ penodedig, sef aciwbigo, tyllu’r corff, electrolysis a thatŵio;
Mae Rhan 5 yn cyflwyno gwaharddiad ar roi twll mewn rhan bersonol o gorff personau o dan 18 oed;
Mae Rhan 6 yn cynnwys darpariaethau ynghylch cynnal asesiadau o’r effaith ar iechyd gan gyrff cyhoeddus;
Mae Rhan 7 yn newid y trefniadau ar gyfer dyfarnu ar geisiadau ar gyfer cynnwys cofnod ar restr fferyllol Bwrdd Iechyd Lleol, i system sy’n seiliedig ar anghenion wedi eu hasesu o safbwynt cymunedau lleol;
Mae Rhan 8 yn ei gwneud yn ofynnol i awdurdodau lleol lunio strategaeth toiledau lleol er mwyn cynllunio sut y byddant yn diwallu anghenion eu cymunedau o ran cael mynediad at doiledau i’r cyhoedd eu defnyddio; ac
Mae Rhan 9 yn cynnwys darpariaethau amrywiol ynghylch y defnydd o dderbyniadau cosb benodedig mewn cysylltiad â throseddau sgorio hylendid bwyd, a nifer o ddarpariaethau cyffredinol, gan gynnwys mewn perthynas â rheoliadau, dehongli, pwerau i wneud darpariaethau canlyniadol a throsiannol, a threfniadau dod i rym.
