Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (dccc1)

ATODLEN 7 LL+C PARTNERIAETHAU

RHAN 2 LL+C DARPARIAETHAU CYFFREDINOL

Partneriaethau LL+C

3 Yn y Ddeddf hon, ystyr “partneriaeth” yw—

(a) partneriaeth o fewn Deddf Partneriaeth 1890 (p. 39);

(b) partneriaeth gyfyngedig a gofrestrwyd o dan Ddeddf Partneriaethau Cyfyngedig 1907 (p. 24);

(c) partneriaeth atebolrwydd cyfyngedig a ffurfiwyd o dan Ddeddf Partneriaethau Atebolrwydd Cyfyngedig 2000 (p. 12);

(d) ffyrm neu endid o gymeriad tebyg i unrhyw un neu ragor o’r rhai a enwir uchod a ffurfiwyd o dan gyfraith gwlad neu diriogaeth y tu allan i’r Deyrnas Unedig.

Gwybodaeth Cychwyn

I1 Atod. 7 para. 3 ddim mewn grym ar y Cydsyniad Brenhinol, gweler a. 81(2)

I2 Atod. 7 para. 3 mewn grym ar 1.4.2018 gan O.S. 2018/34, ergl. 3

Trin buddiannau trethadwy fel pe baent yn cael eu dal gan bartneriaid etc. LL+C

4 (1) At ddibenion y Ddeddf hon—

(a) caiff buddiant trethadwy a ddelir gan neu ar ran partneriaeth ei drin fel pe bai’n cael ei ddal gan neu ar ran y partneriaid, a

(b) caiff trafodiad tir yr ymrwymir iddo at ddibenion partneriaeth ei drin fel pe ymrwymir iddo gan neu ar ran y partneriaid,

ac nid gan neu ar ran y bartneriaeth fel y cyfryw.

(2) Mae is-baragraff (1) yn gymwys er gwaethaf y ffaith yr ystyrir bod partneriaeth yn berson cyfreithiol, neu’n gorff corfforaethol, o dan gyfraith y wlad neu’r diriogaeth y’i ffurfir oddi tani.

Gwybodaeth Cychwyn

I3 Atod. 7 para. 4 ddim mewn grym ar y Cydsyniad Brenhinol, gweler a. 81(2)

I4 Atod. 7 para. 4 mewn grym ar 1.4.2018 gan O.S. 2018/34, ergl. 3

Nid yw caffael buddiant mewn partneriaeth yn drethadwy ac eithrio pan ddarperir yn arbennig ar gyfer hynny LL+C

5 Nid yw caffael buddiant mewn partneriaeth yn drafodiad trethadwy er gwaethaf y ffaith fod eiddo’r bartneriaeth yn cynnwys tir, ac eithrio fel a ddarperir gan—

(a) paragraff 18 (trosglwyddo buddiant yn unol â threfniadau cynharach);

(b) paragraff 34 (trosglwyddo buddiant mewn partneriaeth buddsoddi mewn eiddo).

Gwybodaeth Cychwyn

I5 Atod. 7 para. 5 ddim mewn grym ar y Cydsyniad Brenhinol, gweler a. 81(2)

I6 Atod. 7 para. 5 mewn grym ar 1.4.2018 gan O.S. 2018/34, ergl. 3

Parhad partneriaethau LL+C

6 At ddibenion y Ddeddf hon, caiff partneriaeth ei thrin fel yr un bartneriaeth er gwaethaf newid mewn aelodaeth os yw unrhyw berson a oedd yn aelod cyn y newid yn parhau i fod yn aelod ar ôl y newid.

Gwybodaeth Cychwyn

I7 Atod. 7 para. 6 ddim mewn grym ar y Cydsyniad Brenhinol, gweler a. 81(2)

I8 Atod. 7 para. 6 mewn grym ar 1.4.2018 gan O.S. 2018/34, ergl. 3

Nid yw partneriaeth i’w hystyried yn gynllun ymddiriedolaeth unedau etc. LL+C

7 At ddibenion y Ddeddf hon, nid yw partneriaeth i’w hystyried yn gynllun ymddiriedolaeth unedau nac yn gwmni buddsoddi penagored.

Gwybodaeth Cychwyn

I9 Atod. 7 para. 7 ddim mewn grym ar y Cydsyniad Brenhinol, gweler a. 81(2)

I10 Atod. 7 para. 7 mewn grym ar 1.4.2018 gan O.S. 2018/34, ergl. 3