RHAN 5COSBAU

PENNOD 2COSBAU AM FETHU Â DYCHWELYD FFURFLENNI NEU DALU TRETH NEU SYMIAU SY’N DALADWY MEWN CYSYLLTIAD Â CHREDYDAU TRETH

Cosb am fethu â dychwelyd ffurflen dreth

121Gostwng cosb am fethu â dychwelyd ffurflen dreth: datgelu

(1)

Caiff ACC ostwng cosb o dan adran 118, F1118A, 119 neu 120 os yw’r person yn datgelu gwybodaeth sydd wedi ei hatal o ganlyniad i fethiant i ddychwelyd ffurflen dreth (“gwybodaeth berthnasol”).

(2)

Mae person yn datgelu gwybodaeth berthnasol drwy—

(a)

dweud wrth ACC amdani,

(b)

rhoi cymorth rhesymol i ACC feintioli unrhyw dreth ddatganoledig nas talwyd oherwydd i’r wybodaeth gael ei hatal, ac

(c)

caniatáu i ACC weld cofnodion at ddiben gwirio faint o dreth ddatganoledig nas talwyd fel hyn.

(3)

Wrth ostwng cosb o dan yr adran hon, caiff ACC ystyried—

(a)

pa un a oedd y datgeliad wedi ei gymell neu’n ddigymell, a

(b)

ansawdd y datgeliad.

(4)

Mae datgelu gwybodaeth berthnasol—

(a)

yn “ddigymell” os gwneir hynny ar adeg pan nad oes gan y person sy’n datgelu unrhyw reswm i gredu bod ACC wedi darganfod yr wybodaeth berthnasol neu ei fod ar fin ei darganfod, a

(b)

fel arall, “wedi ei gymell”.

(5)

Mae “ansawdd”, mewn perthynas â datgelu, yn cynnwys amseriad, natur a graddau.