Rhan 3 Cynllunio Datblygu
Adran 3 - Llunio ac adolygu Fframwaith Datblygu Cenedlaethol Cymru
14.Mae’r adran hon yn rhoi adrannau 60 i 60C yn lle adran 60 o DCPhG 2004 (a oedd yn gwneud darpariaeth ar gyfer Cynllun Gofodol Cymru).
15.Mae adran 60 yn ei gwneud yn ofynnol i Weinidogion Cymru baratoi a chyhoeddi Fframwaith Datblygu Cenedlaethol Cymru. Mae’r Fframwaith yn nodi polisïau cenedlaethol mewn perthynas â datblygu a defnyddio tir yng Nghymru, gan adlewyrchu polisïau’r Llywodraeth, a chan ystyried polisïau morol a thrafnidiaeth a gyhoeddir gan Weinidogion Cymru. Gall y Fframwaith hefyd nodi’r hyn a all fod yn ddatblygiad o arwyddocâd cenedlaethol (ar gyfer datblygiadau o arwyddocâd cenedlaethol, gweler y nodiadau ar Ran 5, isod). Mae’r Fframwaith yn cael effaith ar gyfer y cyfnod y mae’n ei bennu.
16.Mae adran 60A yn ei gwneud yn ofynnol i Weinidogion Cymru baratoi datganiad ynghylch ymgysylltu â’r cyhoedd. Caiff Gweinidogion adolygu a diwygio’r datganiad unrhyw bryd. Rhaid i’r datganiad nodi sut a phryd y bydd ymgynghori’n digwydd a sut y bydd y cyhoedd yn ymwneud â pharatoi’r Fframwaith. 12 wythnos o ddyddiad cyhoeddi’r Fframwaith drafft yw’r cyfnod ymgynghori.
17.Mae adran 60B yn ei gwneud yn ofynnol i Weinidogion Cymru gynnal arfarniad o gynaliadwyedd o ran y Fframwaith drafft. Rhaid i’r arfarniad gynnwys asesiad o effeithiau tebygol y polisïau yn y Fframwaith drafft ar y defnydd o’r Gymraeg.
18.Mae adran 60B hefyd yn ei gwneud yn ofynnol i Weinidogion Cymru osod y Fframwaith drafft gerbron Cynulliad Cenedlaethol Cymru, ynghyd ag adroddiad sy’n crynhoi’r sylwadau a ddaeth i law yn ystod yr ymgynghoriad ac yn egluro sut y cawsant eu hystyried. Mae gan y Cynulliad gyfnod craffu o 60 diwrnod o’r dyddiad y caiff y drafft ei osod, gan ddiystyru unrhyw ddyddiau y mae’r Cynulliad wedi ei ddiddymu ac unrhyw doriadau o fwy na phedwar diwrnod.
19.Rhaid i Weinidogion Cymru roi sylw i unrhyw benderfyniad y mae’r Cynulliad yn ei basio neu unrhyw argymhelliad a wneir gan bwyllgor o’r Cynulliad am y Fframwaith drafft yn ystod y cyfnod craffu.
20.Ar ôl y cyfnod craffu o 60 diwrnod caiff Gweinidogion Cymru gyhoeddi’r Fframwaith. Fodd bynnag, os yw Gweinidogion Cymru yn cynnig newidiadau i’r Fframwaith, rhaid iddynt osod drafft diwygiedig gerbron y Cynulliad a chyhoeddi’r fersiwn honno. Rhaid i Weinidogion Cymru hefyd, wrth gyhoeddi’r Fframwaith ar ei ffurf derfynol, osod datganiad gerbron y Cynulliad yn egluro sut y maent wedi rhoi sylw i unrhyw benderfyniad a basiwyd gan y Cynulliad neu unrhyw argymhelliad gan bwyllgor o’r Cynulliad a wnaed yn ystod y cyfnod craffu.
21.Mae adran 60C yn ei gwneud yn ofynnol i Weinidogion Cymru adolygu’r Fframwaith yn barhaus. Gellir diwygio’r Fframwaith unrhyw bryd. Os bydd 5 mlynedd yn mynd heibio heb gyhoeddi Fframwaith diwygiedig neu heb osod diwygiad drafft gerbron y Cynulliad, rhaid i Weinidogion Cymru gyhoeddi datganiad yn datgan a ydynt o’r farn y dylid diwygio’r Fframwaith ac yn rhoi rhesymau. Os yw’r Fframwaith i’w ddiwygio, mae’r un gweithdrefnau ar gyfer ymgynghori a chraffu ag a ddisgrifir uchod yn gymwys.
Adran 4: Dynodi ardaloedd cynllunio strategol a sefydlu Paneli Cynllunio Strategol
22.Mae’r adran hon yn mewnosod adrannau 60D i 60G i DCPhG 2004.
23.Mae adran 60D yn galluogi Gweinidogion Cymru i wneud rheoliadau i ddynodi ardal gynllunio strategol ac i sefydlu panel cynllunio strategol ar gyfer yr ardal honno. Rhaid i ardal gynllunio strategol gynnwys y cyfan o ardal un awdurdod cynllunio lleol a’r cyfan neu ran o ardal o leiaf un awdurdod arall.
24.Mae adran 60D hefyd yn cyflwyno Atodlen 2A i DCPhG 2004. Mae Atodlen 2A yn cynnwys darpariaeth am aelodaeth, gweinyddiaeth a threfniadau ariannol panel cynllunio strategol. Caiff ei fewnosod yn DCPhG 2004 gan Atodlen 1 i’r Ddeddf.
25.Cyn gwneud rheoliadau o dan adran 60D, rhaid i Weinidogion Cymru fod wedi dyroddi cyfarwyddyd o dan adran 60E i un neu ragor o awdurdodau cynllunio lleol, a rhaid bod y rheini naill ai wedi cyflwyno cynnig ar gyfer dynodi ardal neu fod wedi methu â gwneud hynny o fewn y cyfnod penodedig. (Nid yw’r gofynion hyn yn gymwys i reoliadau sy’n diwygio neu’n dirymu rheoliadau blaenorol sy’n dynodi panel.) Hefyd, rhaid bod Gweinidogion Cymru wedi cynnal ymgynghoriad, os oes angen. Nodir yr amgylchiadau pan fo ymgynghori yn ofynnol yn adran 60F ac fe’u disgrifir isod.
26.Mae adran 60E yn galluogi Gweinidogion Cymru i gyfarwyddo un awdurdod cynllunio lleol neu ragor i gyflwyno cynnig am ardal gynllunio strategol. Rhaid i Weinidogion Cymru roi eu rhesymau dros roi’r cyfarwyddyd. Gelwir yr awdurdod neu’r awdurdodau cynllunio lleol sy’n derbyn y cyfarwyddyd yn “awdurdod cyfrifol”. Rhaid i’r awdurdod cyfrifol: baratoi cynnig ar gyfer dynodi ardal gynllunio strategol, gan gynnwys map o’r ffin; ymgynghori ar ei gynnig; a chyflwyno’r holl wybodaeth i Weinidogion Cymru o fewn y cyfnod penodol. Chwe mis yw’r cyfnod penodol hwn, oni bai y nodir cyfnod yn y cyfarwyddyd. Gellir ymestyn y cyfnod hwn os bydd Gweinidogion Cymru yn cytuno. Ar ôl derbyn cynnig, caiff Gweinidogion Cymru fwrw ymlaen i wneud rheoliadau i sefydlu’r panel cynllunio strategol a dynodi’r ardal. Os yw Gweinidogion Cymru yn penderfynu peidio â dynodi ardal, rhaid iddynt roi hysbysiad am y penderfyniad hwnnw a’r rhesymau amdano i’r awdurdod cyfrifol a phob awdurdod arall sydd wedi ei gynnwys yn y cyfarwyddyd.
27.Mae Adran 60F yn nodi’r gofynion o ran ymgynghori: os nad yw Gweinidogion Cymru yn cytuno â’r cynnig a gyflwynwyd gan yr awdurdod cyfrifol; os na chyflwynwyd unrhyw gynnig yn y cyfnod a bennwyd gan yr awdurdod cyfrifol; neu os yw rheoliadau i gael eu diwygio neu eu dirymu. Os yw Gweinidogion Cymru yn dymuno dynodi ardal gynllunio strategol wahanol i’r un a gynigiwyd gan yr awdurdod cyfrifol, rhaid iddynt ymgynghori â’r awdurdodau cynllunio lleol hynny sydd o fewn yr ardal y maent am ei dynodi. Os yw Gweinidogion Cymru yn bwriadu newid ardal gynllunio strategol bresennol, rhaid iddynt ymgynghori â’r awdurdodau cynllunio lleol o fewn yr ardal honno.
28.Mae adran 60G yn darparu, os yw Gweinidogion Cymru yn gwneud cais am wybodaeth gan awdurdodau cynllunio lleol, y mae ei hangen arnynt i gyflawni eu swyddogaethau mewn perthynas â dynodi ardaloedd cynllunio strategol, fod rhaid i’r awdurdodau ddarparu’r wybodaeth.
Adran 5 - Ardaloedd cynllunio strategol: arolwg
29.Mae’r adran hon yn mewnosod adran 60H i DCPhG 2004.
30.Mae adran 60H yn darparu bod rhaid i baneli cynllunio strategol adolygu’n barhaus faterion y disgwylir iddynt effeithio ar ddatblygiad yr ardal gynllunio strategol. Gwna hyn drwy wneud adran 61(2) i (5) o DCPhG 2004 yn gymwys i baneli cynllunio strategol. Mae adran 61(2) yn rhestru materion y mae’n rhaid eu hadolygu’n barhaus, megis prif nodweddion ardal, y dibenion y defnyddir tir ar eu cyfer, y boblogaeth, systemau cyfathrebu a thrafnidiaeth. (Mae adran 11 o’r Ddeddf hefyd yn diwygio adran 61(2) drwy ddiweddaru’r materion a grybwyllir ym mharagraff (a) fel bod rhaid i’r adolygiad o brif nodweddion yr ardal gynllunio strategol gynnwys ystyriaeth o’r graddau y defnyddir y Gymraeg yn yr ardal.)
31.Yn ogystal â’r materion a restrir yn adran 61(2), mae is-adran (3) yn darparu bod rhaid i banel cynllunio strategol adolygu unrhyw newidiadau a all ddigwydd mewn cysylltiad ag unrhyw un neu ragor o’r materion eraill a’u heffaith ar ddatblygiad yr ardal gynllunio strategol neu ar gynllunio datblygiad o’r fath. Mae is-adran (4) yn ymestyn yr adolygiad o’r materion a restrir yn is-adrannau (2) a (3) i ystyried y materion hynny mewn unrhyw ardal gyfagos a allai effeithio ar yr ardal gynllunio strategol. Mae is-adran (5) yn gosod gofyniad ar banel i ymgynghori ag awdurdodau cynllunio lleol cyfagos at ddiben cynnal adolygiad o faterion mewn cysylltiad ag ardal gyfagos.
Adran 6: Llunio ac adolygu Cynlluniau Datblygu Strategol
32.Mae’r adran hon yn mewnosod adran 60I i DCPhG 2004.
33.Mae adran 60I yn ei gwneud yn ofynnol i banel cynllunio strategol baratoi a mabwysiadu cynllun datblygu strategol. Mae cynllun datblygu strategol yn nodi amcanion mewn perthynas â defnydd a datblygiad tir a pholisïau cyffredinol ar gyfer gwireddu’r amcanion hynny. Rhaid i’r cynllun datblygu strategol gydymffurfio’n gyffredinol â’r Fframwaith Datblygu Cenedlaethol.
34.O ran yr ymadrodd “cydymffurfio’n gyffredinol” (“general conformity”) a ddefnyddir yn yr adran hon, ystyriodd y Llys Apêl ystyr y gofyniad i gynlluniau strwythurol a chynlluniau lleol gydymffurfio’n gyffredinol yn achos Persimmon Homes (Thames Valley) Limited v Stevenage Borough Council [2005] EWCA Civ 1365. Honnodd yr Arglwydd Ustus Laws, oherwydd y cyfnodau arwain maith ar gyfer gweithredu cynlluniau, y dylid ymdrin yn hyblyg â’r ymadrodd “cydymffurfio’n gyffredinol” er mwyn adlewyrchu’r amrywiol bethau annisgwyl a newidiol a allai godi. Mater o farn gynllunio i’r awdurdodau cynllunio (yr awdurdod cynllunio lleol yn yr achos hwnnw) oedd pa un a yw cynlluniau yn cydymffurfio’n gyffredinol. Disgwylir y byddai’r agwedd hon hefyd yn gymwys i gydymffurfio rhwng cynlluniau datblygu strategol a’r Fframwaith Datblygu Cenedlaethol.
35.Mae’r panel cynllunio strategol i roi sylw i faterion penodol wrth baratoi cynllun datblygu strategol. Rhaid i gynlluniau datblygu strategol fod yn destun arfarniad o gynaliadwyedd, a rhaid i’r arfarniad hwnnw gynnwys asesiad o effeithiau tebygol y cynllun ar y defnydd o’r Gymraeg. Caiff Gweinidogion Cymru wneud rheoliadau ynghylch ffurf a chynnwys cynlluniau datblygu strategol a chyfnod y cynllun. Mae’r cynllun datblygu strategol yn cael effaith fel cynllun datblygu am y cyfnod a bennir yn y cynllun.
36.Mae adran 60J yn nodi sut y bydd adrannau perthnasol yn Rhan 6 o DCPhG 2004, sy’n darparu ar gyfer sut y mae cynllun datblygu lleol yn cael ei baratoi, yn gymwys i gynlluniau datblygu strategol. Mae’r rhan fwyaf o’r adrannau hynny yn gymwys yn yr un ffordd ag y maent yn gymwys i gynlluniau datblygu lleol, ac yn sgil hynny mae’r broses gyffredinol ar gyfer paratoi, mabwysiadu ac adolygu cynllun datblygu strategol yr un fath. Mae’r broses o baratoi cynllun datblygu lleol a nodir yn Rhan 6 o DCPhG 2004 ac mewn rheoliadau, yn cynnwys adolygu a datblygu sylfaen dystiolaeth; paratoi a chyflwyno cynllun darparu; paratoi’r cynllun cyn-adneuo; adneuo’r cynllun; cyflwyno’r cynllun ar gyfer archwiliad annibynnol (i’r Arolygiaeth Gynllunio a benodir gan Weinidogion Cymru); derbyn adroddiad yr Arolygydd sy’n nodi’r newidiadau sydd eu hangen i’r cynllun a adneuwyd; a mabwysiadu a chyhoeddi’r cynllun. Mae cynllun datblygu lleol hefyd yn destun gweithdrefnau monitro ac adolygu.
37.Mae gan Weinidogion Cymru bŵer yn rhinwedd adran 60J i ymyrryd drwy gyfarwyddyd neu i alw’r cynllun i mewn i’w gymeradwyo ganddynt.
Adran 7 - Cydymffurfedd cynlluniau penodol â’r Fframwaith Datblygu Cenedlaethol a’r cynllun datblygu strategol
38.Mae’r adran hon yn diwygio adran 62 o DCPhG 2004. Mae’n ei gwneud yn ofynnol i gynllun datblygu lleol gydymffurfio’n gyffredinol â’r Fframwaith Datblygu Cenedlaethol ac unrhyw gynllun datblygu strategol ar gyfer ardal yr awdurdod cynllunio lleol (gweler paragraff 34 uchod am sylwadau ar y term “cydymffurfio’n gyffredinol”).
39.Mae’r adran hon hefyd yn diwygio adran 83 o DCGTh 1990 mewn perthynas â chynlluniau parthau cynllunio syml a wneir gan awdurdodau cynllunio lleol. (O dan adran 82 o DCGTh 1990, ardal y mae cynllun parth cynllunio syml mewn grym ynddi yw parth cynllunio syml. Mewn unrhyw ran o’r parth, rhoddir caniatâd cynllunio i ddatblygiad a bennir yn y cynllun neu i ddatblygiad o unrhyw ddosbarth a bennir mewn rheoliadau.) Mae’r diwygiad i adran 83 yn ei gwneud yn ofynnol i gynllun parth cynllunio syml yng Nghymru gydymffurfio’n gyffredinol â’r Fframwaith Datblygu Cenedlaethol ac unrhyw gynllun datblygu strategol perthnasol.
Adran 8 - Dyletswydd i ystyried pa un ai i adolygu Cynllun Datblygu Lleol
40.Mae’r adran hon yn mewnosod adran 68A i DCPhG 2004. Mae’n darparu, yn dilyn cyhoeddi neu ddiwygio’r Fframwaith Datblygu Cenedlaethol neu fabwysiadu neu gymeradwyo cynllun datblygu strategol, bod rhaid i awdurdod cynllunio lleol ystyried pa un ai i gynnal adolygiad o’i gynllun datblygu lleol.
41.Mae’r adran hon hefyd yn gwneud diwygiad canlyniadol i adran 69 o DCPhG 2004. (Mae adran 69 yn ymdrin ag adolygu cynlluniau datblygu lleol.)
Adran 9 - Y Fframwaith Datblygu Cenedlaethol a’r Cynllun Datblygu Strategol i fod yn rhan o’r cynllun datblygu
42.Mae’r adran hon yn diwygio adran 38(4) o DCPhG 2004 fel bod y cynllun datblygu ar gyfer unrhyw ardal yng Nghymru yn cynnwys y Fframwaith Datblygu Cenedlaethol, y cynllun datblygu strategol a’r cynllun datblygu lleol.
43.Mae adran 70 o DCGTh 1990 yn datgan bod rhaid i awdurdod lleol, wrth ymdrin â chais ar gyfer caniatâd cynllunio, roi sylw i’r cynllun datblygu ac ystyriaethau perthnasol eraill. Mae adran 38(6) o DCPhG 2004 yn ei gwneud yn ofynnol, os yw sylw i’w roi i gynllun datblygu, bod rhaid penderfynu ar geisiadau yn unol â’r cynllun datblygu oni bai bod ystyriaethau perthnasol yn awgrymu fel arall. Effaith y diwygiad a wneir gan adran 9 yw bod rhaid i awdurdodau cynllunio lleol roi sylw i bob un o’r tri chynllun wrth wneud penderfyniadau cynllunio. Os oes gwrthdaro rhwng y tri chynllun datblygu, mae adran 38(5) o DCPhG 2004 yn darparu bod hyn yn cael ei ddatrys drwy weithredu’n unol â’r ddogfen ddiweddaraf.
Adran 10 -Tir y mae’r Fframwaith Datblygu Cenedlaethol neu’r Cynllun Datblygu Strategol yn effeithio arno
44.Mae gwerth eiddo yn aml yn cwympo pan fydd gwaith cyhoeddus, fel traffordd neu reilffordd newydd, yn effeithio arno; gelwir hyn yn “falltod”. Mae Rhan 6 ac Atodlen 13 o DCGTh 1990 yn ymdrin â thir o dan falltod ac yn darparu y gall tirfeddianwyr a effeithiwyd, mewn amgylchiadau penodol, ei gwneud yn ofynnol i awdurdodau lleol brynu eu tir.
45.Mae adran 149 yn Rhan 6 o DCGTh 1990 yn cyflwyno Atodlen 13, sy’n nodi’r hyn y gellir ei drin fel tir o dan falltod (ni fydd pob tir y mae datblygiad arfaethedig yn effeithio arno yn “dir o dan falltod”). Fel arall mae darpariaethau yn Rhan 6 yn nodi’r weithdrefn ar gyfer perchennog tir o dan falltod i’w gwneud yn ofynnol i awdurdod lleol gaffael buddiant y perchennog yn y tir.
46.O dan adran 150 yn Rhan 6, o fodloni amodau penodol, gall perchennog tir sydd o’r farn bod cynigion awdurdod cyhoeddus yn golygu ei fod o dan falltod roi hysbysiad i’r awdurdod yn ei gwneud yn ofynnol iddo brynu buddiant y perchennog yn y tir. Pris y tir yw ei werth ar y farchnad gan anwybyddu effeithiau’r datblygiad sy’n creu’r malltod.
47.Gwneir diwygiadau canlyniadol yn yr adran hon i Ran 6 o DCGTh 1990 ac Atodlen 13 iddi o ganlyniad i gyflwyno’r Fframwaith Datblygu Cenedlaethol a’r cynlluniau datblygu strategol. Caiff cyfeiriadau at y Fframwaith Datblygu Cenedlaethol a’r cynllun datblygu strategol eu mewnosod yn Atodlen 13. Mae’r adran hon hefyd yn rhoi pwerau prynu gorfodol i Weinidogion Cymru pan fo hysbysiad malltod wedi ei gyflwyno mewn cysylltiad â thir sydd wedi ei neilltuo at ddibenion penodol yn y Fframwaith Datblygu Cenedlaethol. Effaith hyn yw bod perchenogion tir y mae cynigion yn y Fframwaith neu mewn cynllun datblygu strategol yn golygu ei fod o dan falltod i’w trin yn yr un modd â’r rheini y mae cynigion cynllunio eraill yn effeithio arnynt.
Adran 11 - Y Gymraeg
48.Mae adran 11 yn diwygio adrannau 61 a 62 o DCPhG 2004.
49.Effaith y diwygiad i adran 61 yw bod rhaid i’r materion sy’n effeithio ar ddatblygiad yr ardal sydd i’w hadolygu’n barhaus bellach gynnwys y defnydd o’r Gymraeg. Mae hyn yn gymwys i awdurdodau cynllunio lleol ac (yn rhinwedd adran 5 o’r Ddeddf) i baneli cynllunio strategol.
50.Mae’r diwygiad i adran 62 yn ei gwneud yn ofynnol i arfarniad o gynaliadwyedd y cynllun datblygu lleol gynnwys asesiad o effeithiau tebygol y cynllun ar y defnydd o’r Gymraeg.
Adran 12 - Y cyfnod y bydd cynllun datblygu lleol yn cael effaith
51.Mae’r adran hon yn diwygio adran 62 o DCPhG 2004. Mae’n ei gwneud yn ofynnol i gynllun datblygu lleol bennu cyfnod y mae’r cynllun yn cael effaith ynddo ac ar ôl y cyfnod hwnnw, bydd y cynllun yn peidio â bod yn gynllun datblygu. Mae gan Weinidogion Cymru bŵer i wneud rheoliadau ynghylch cyfnod y cynllun.
Adran 13 - Tynnu cynllun datblygu lleol yn ôl
52.Mae’r adran hon yn rhoi adrannau 66 a 66A newydd yn lle adran o 66 DCPhG 2004.
53.Effaith yr adran 66 newydd yw bod gan Weinidogion Cymru bŵer i gyfarwyddo awdurdod cynllunio lleol i dynnu ei gynllun datblygu lleol yn ôl unrhyw bryd cyn i’r cynllun gael ei fabwysiadu. Rhaid i Weinidogion Cymru roi rhesymau dros y cyfarwyddyd.
54.Mae’r adran 66A newydd o DCPhG 2004 yn disgrifio sut y gellir tynnu cynllun datblygu lleol yn ôl os na cheir unrhyw gyfarwyddyd gan Weinidogion Cymru. Mae adran 66A(3)(a) yn darparu na chaiff awdurdod cynllunio lleol dynnu’r cynllun yn ôl os yw Gweinidogion Cymru wedi rhoi cyfarwyddyd i awdurdod cynllunio lleol gyflwyno’r cynllun datblygu lleol iddynt i’w gymeradwyo yn unol ag adran 65(4) (a gall hynny fod unrhyw bryd cyn mabwysiadu cynllun datblygu lleol).
55.Yn yr un modd, ni chaiff awdurdod cynllunio lleol dynnu cynllun datblygu lleol yn ôl os nad yw Gweinidogion Cymru wedi cymryd unrhyw gam yn ymwneud â’r cynllun o dan adran 71 (ymyrraeth gan Weinidogion Cymru). Mae adran 71 yn gymwys os yw Gweinidogion Cymru o’r farn bod awdurdod cynllunio lleol yn methu â gwneud unrhyw beth neu’n hepgor gwneud unrhyw beth sy’n angenrheidiol mewn cysylltiad â pharatoi, diwygio neu fabwysiadu cynllun datblygu lleol. Ymysg y camau y gall Gweinidogion Cymru eu cymryd yn unol ag adran 71 mae cynnal archwiliad annibynnol (y mae adran 64(4) i (7) yn gymwys iddo), paratoi, diwygio a chymeradwyo cynllun datblygu lleol (gweler is-adran (3)(b)).
56.Ar ôl i gynllun datblygu lleol gael ei gyflwyno i’w archwilio’n annibynnol, ni ellir ei dynnu’n ôl ond ar sail argymhelliad yr archwilydd a chyn belled nad yw Gweinidogion Cymru wedi gwrthod yr argymhelliad hwn (gweler is-adran (4)).
57.Ni chaiff awdurdod cynllunio lleol dynnu cynllun yn ôl os yw wedi cyrraedd cam a bennir mewn rheoliadau (ee cyhoeddi cynigion cyn-adneuo neu gynllun a adneuwyd neu gam arall yn natblygiad y cynllun) ac nad yw wedi’i gyflwyno i’w archwilio eto, oni bai bod yr awdurdod cynllunio lleol wedi rhoi hysbysiad o’i fwriad i dynnu ei gynllun yn ôl i Weinidogion Cymru a bod cyfnod yr hysbysiad sy’n ymwneud â’r bwriad i dynnu’n ôl wedi dod i ben (gweler is-adrannau (5) a (6)). Pennir y cyfnod hysbysu ar gyfer tynnu’n ôl mewn rheoliadau, gweler is-adran (9).
58.Unwaith y bydd Gweinidogion Cymru yn derbyn hysbysiad o fwriad awdurdod cynllunio lleol i dynnu cynllun yn ôl, caiff Gweinidogion Cymru gyfarwyddo’r awdurdod i ddarparu gwybodaeth bellach a/neu ymestyn y cyfnod hysbysu (gweler is-adran (7)).
59.Caiff rheoliadau a wneir gan Weinidogion Cymru gynnwys darpariaeth ynghylch rhoi hysbysiad o fwriad i dynnu cynllun datblygu lleol yn ôl (gweler is-adran (8)).
Adran 14 - Pŵer Gweinidogion Cymru i gyfarwyddo bod cynllun datblygu lleol yn cael ei lunio ar y cyd
60.Mae’r adran hon yn diwygio adran 72 o DCPhG 2004, sy’n caniatáu i awdurdodau cynllunio lleol baratoi cynllun datblygu lleol ar y cyd. Effaith y diwygiad yw rhoi pŵer newydd i Weinidogion Cymru gyfarwyddo dau neu ragor o awdurdodau cynllunio lleol i baratoi cynllun datblygu lleol ar y cyd a’i gwneud yn ofynnol i Weinidogion Cymru ddatgan eu rhesymau dros wneud hynny. Nid yw’r pŵer hwn yn ymestyn i awdurdodau Parciau Cenedlaethol.
61.Rhaid i’r awdurdodau a gyfarwyddir weithredu ar y cyd wrth arfer eu swyddogaethau mewn perthynas â chynlluniau datblygu lleol (gan gynnwys y swyddogaethau o baratoi, mabwysiadu a diwygio cynllun datblygu lleol). Ceir darpariaethau eraill sy’n ymdrin â’r sefyllfa lle tynnir cyfarwyddyd yn ôl mewn perthynas ag un awdurdod, neu bob awdurdod (drwy weithredu darpariaethau sy’n bodoli eisoes ynghylch yr hyn sy’n digwydd os bydd awdurdod yn tynnu’n ôl o gytundeb i baratoi cynllun datblygu lleol ar y cyd).
Adran 15 - Byrddau cydgynllunio: swyddogaethau sy’n ymwneud ag arolygon a Chynlluniau Datblygu Lleol
62.Mae gan Weinidogion Cymru bŵer ar hyn o bryd o dan adran 2(1B) o DCGTh 1990 i sefydlu bwrdd cydgynllunio i fod yn awdurdod cynllunio lleol ar gyfer ardal unedig sy’n cynnwys dwy ardal neu ragor, pob un ohonynt yn sir neu’n fwrdeistref sirol gyfan, neu’n rhan o sir neu fwrdeistref sirol, yng Nghymru.
63.Mae adran 15 yn diwygio’r diffiniad o “awdurdod cynllunio lleol” (“local planning authority”) yn adran 78 o DCPhG 2004 i gynnwys bwrdd cydgynllunio. Effaith y diwygiad yw galluogi bwrdd cydgynllunio i baratoi cynllun datblygu lleol a gweithredu fel awdurdod codi tâl at ddibenion ardoll seilwaith cymunedol ei ardal. (Gweler Rhan 11 o Ddeddf Cynllunio 2008 am yr ardoll seilwaith cymunedol.)
64.Mae’r adran hon hefyd yn diwygio adran 62 o DCPhG 2004 i’w gwneud yn ofynnol i fwrdd cydgynllunio roi sylw i’r cynllun neu’r cynlluniau llesiant lleol ar gyfer ei ardal wrth baratoi cynllun datblygu lleol. (Gweler adran 39 o Ddeddf Llesiant Cenedlaethau’r Dyfodol (Cymru) 2015 am gynlluniau llesiant lleol.)
65.Mae adran 41 o’r Ddeddf yn galluogi Gweinidogion Cymru i wneud newidiadau i’r pŵer i sefydlu byrddau cydgynllunio, gweler paragraffau 161 i 163 isod.
Adran 16 - Cynllunio datblygu: diwygiadau pellach
13.Mae’r adran hon yn cyflwyno Atodlen 2. Mae Atodlen 2 yn cynnwys diwygiadau canlyniadol i amryw Ddeddfau.
