RHAN 2Y GWEITHLU ADDYSG

Y gofynion sydd i’w bodloni er mwyn darparu gwasanaethau

16Gweithwyr cymorth dysgu mewn addysg bellach

(1)

Caiff Gweinidogion Cymru drwy reoliadau ddarparu na chaiff person (yn uniongyrchol neu’n anuniongyrchol) ddarparu’r gwasanaethau a ddisgrifir yn is-adran (2) mewn neu ar ran sefydliad addysg bellach yng Nghymru oni bai bod y person hwnnw—

(a)

yn bodloni unrhyw ofynion penodedig, a

(b)

wedi ei gofrestru yng nghategori gweithiwr cymorth dysgu mewn addysg bellach.

(2)

Y gwasanaethau yw—

(a)

galluogi neu helpu dysgwr i gymryd rhan mewn addysg,

(b)

cefnogi annibyniaeth, cyflawniad neu ddilyniant y dysgwr, neu

(c)

cefnogi person sy’n darparu addysg mewn neu ar ran sefydliad addysg bellach.

(3)

Caiff gofyniad yn y rheoliadau o dan is-adran (1) ymwneud, yn benodol, â—

(a)

meddu ar gymhwyster penodedig neu brofiad o fath penodedig;

(b)

cymryd rhan mewn rhaglen neu gwrs hyfforddi penodedig neu gwblhau rhaglen neu gwrs o’r fath;

(c)

cydymffurfedd ag amod penodedig;

(d)

arfer disgresiwn gan Weinidogion Cymru, person penodedig arall neu berson arall o ddisgrifiad penodedig.

(4)

At ddibenion yr adran hon, mae i “addysg” yr ystyr a roddir i “education” gan adran 140(3) o Ddeddf 2002.