Deddf Gwasanaethau Cymdeithasol a Llesiant (Cymru) 2014 (dccc4)

RHAN 1 LL+C CYFLWYNIAD

Termau allweddol LL+C

2 Ystyr “llesiant” LL+C

(1) Mae’r adran hon yn gymwys at ddiben y Ddeddf hon.

(2) Ystyr “llesiant”, o ran person, yw llesiant mewn perthynas ag unrhyw un neu rai o’r canlynol—

(a) iechyd corfforol, iechyd meddwl a llesiant emosiynol;

(b) amddiffyn rhag camdriniaeth ac esgeulustod;

(c) addysg, hyfforddiant a gweithgareddau hamdden;

(d) perthnasoedd domestig, teuluol a phersonol;

(e) cyfraniad a wneir at y gymdeithas;

(f) sicrhau hawliau a hawlogaethau;

(g) llesiant cymdeithasol ac economaidd;

(h) addasrwydd llety preswyl.

(3) O ran plentyn, mae “llesiant” hefyd yn cynnwys—

(a) datblygiad corfforol, deallusol, emosiynol, cymdeithasol ac ymddygiadol;

(b) “lles” fel y diffinnir y term Saesneg cyfatebol “welfare” at ddibenion Deddf Plant 1989.

(4) O ran oedolyn, mae “llesiant” hefyd yn cynnwys—

(a) rheolaeth ar fywyd pob dydd;

(b) cymryd rhan mewn gwaith.

Gwybodaeth Cychwyn

I1 A. 2 mewn grym ar 2.5.2014, gweler a. 199(1)

3 Ystyr “oedolyn”, “plentyn”, “gofalwr”ac “anabl” LL+C

(1) Mae’r adran hon yn gymwys at ddiben y Ddeddf hon.

(2) Ystyr “oedolyn” yw person sy’n 18 oed neu drosodd.

(3) Ystyr “plentyn” yw person dan 18 oed.

(4) Ystyr “gofalwr” yw person sy’n darparu neu’n bwriadu darparu gofal i oedolyn neu blentyn anabl; ond gweler is-adrannau (7) ac (8) ac adran 187(1).

(5) Mae person yn “anabl” os oes ganddo anabledd (“disability”) at ddibenion Deddf Cydraddoldeb 2010, yn ddarostyngedig i ddarpariaeth a wneir o dan is-adran (6).

(6) Caiff rheoliadau ddarparu bod person sy’n dod o fewn categori penodedig i’w drin neu i beidio â chael ei drin fel un sy’n anabl at ddibenion y Ddeddf hon.

(7) Nid yw person yn ofalwr at ddibenion y Ddeddf hon os yw’n darparu neu’n bwriadu darparu gofal—

(a) o dan gontract neu yn rhinwedd contract, neu

(b) fel gwaith gwirfoddol.

(8) Ond caiff awdurdod lleol drin person fel gofalwr at ddibenion unrhyw un neu rai o’i swyddogaethau o dan y Ddeddf hon os yw’r awdurdod o’r farn bod natur y berthynas rhwng y person sy’n darparu neu’n bwriadu darparu gofal a’r person y mae’r gofal hwnnw yn cael ei ddarparu, neu i’w ddarparu, iddo yn golygu y byddai’n briodol i’r cyntaf gael ei drin fel gofalwr at ddibenion y swyddogaeth honno neu’r swyddogaethau hynny.

Gwybodaeth Cychwyn

I2 A. 3 mewn grym ar 2.5.2014, gweler a. 199(1)

4 Ystyr “gofal a chymorth” LL+C

Mae unrhyw gyfeiriad at ofal a chymorth yn y Ddeddf hon i’w ddehongli fel cyfeiriad at—

(a) gofal;

(b) cymorth;

(c) gofal a chymorth.

Gwybodaeth Cychwyn

I3 A. 4 mewn grym ar 2.5.2014, gweler a. 199(1)