439.Mae adran 174 yn ei gwneud yn ofynnol i awdurdod lleol sefydlu gweithdrefn ar gyfer ystyried sylwadau sy’n ymwneud â phlant a phobl ifanc penodol a’r rhai sy’n gofalu amdanynt. Mae’n atgynhyrchu i raddau helaeth ddarpariaethau adran 26(3) i (3C) o Ddeddf Plant 1989 sydd i’w datgymhwyso o ran Cymru. Mae’r sylwadau y caniateir eu hystyried o dan y weithdrefn hon yn dod o fewn tri chategori:
Sylwadau ynghylch y swyddogaethau awdurdod lleol a ganlyn, naill ai mewn perthynas â phlant sy’n derbyn gofal gan yr awdurdod lleol neu mewn perthynas â phlant nad ydynt yn derbyn gofal ond y gall fod arnynt anghenion am ofal a chymorth:
swyddogaethau sy’n arferadwy o dan Rannau 3 i 6 o’r Ddeddf hon (ac eithrio swyddogaethau sy’n arferadwy mewn perthynas â phlentyn fel gofalwr);
swyddogaethau sy’n arferadwy mewn perthynas â phlentyn o dan Ran 7 o’r Ddeddf hon, a;
swyddogaethau o dan Ran 4 neu 5 o Ddeddf Plant 1989 ond a bennir mewn rheoliadau.
Caiff sylwadau o’r fath gael eu cyflwyno gan y personau a restrir yn is-adran (3).
Sylwadau ynghylch swyddogaethau awdurdod lleol o dan adran 14F o Ddeddf Plant 1989 a bennwyd mewn rheoliadau. Mae adran 14F yn darparu bod rhaid i awdurdodau lleol wneud trefniadau ar gyfer darparu, o fewn eu hardal, gwasanaethau cynnal gwarcheidiaeth arbennig (megis cwnsela, cyngor a gwybodaeth). Caiff sylwadau o’r fath gael eu cyflwyno gan y personau a restrir yn is-adran (4).
Sylwadau ynghylch swyddogaethau awdurdod lleol o dan Ddeddf Mabwysiadu a Phlant 2002, sydd wedi eu pennu mewn rheoliadau ac a gyflwynir gan y personau a bennir yn is-adran (5).
440.Mae is-adran (6) yn ei gwneud yn ofynnol i’r awdurdod lleol sicrhau bod y weithdrefn a sefydlir ganddo o dan yr adran hon yn gwarantu y bydd sylwadau’n cael eu hystyried gan un person o leiaf, nad yw’n aelod o’r awdurdod lleol o dan sylw nac yn swyddog iddo, a bydd un neu ragor o bobl o’r fath hefyd yn cymryd rhan mewn unrhyw drafodaethau dilynol ynghylch y camau i’w cymryd. Gwneir hyn er mwyn sicrhau bod lefel ddigonol o annibyniaeth yn rhan annatod o’r broses, er mwyn rhoi sylw digonol i safbwyntiau plant a phobl ifanc a allai fod yn agored i niwed. Gall rheoliadau ddatgymhwyso’r gofyniad hwn mewn sefyllfaoedd pan ystyrir, neu pan drafodir, sylwadau at ddibenion ceisio datrys materion yn anffurfiol (gweler is-adran (8)). Mae is-adran (9) yn ei gwneud yn ofynnol i awdurdod lleol roi cyhoeddusrwydd i’r weithdrefn a sefydlir ganddo o dan yr adran hon.