Rheoliadau Asesu’r Effeithiau Amgylcheddol (Amaethyddiaeth) (Cymru) 2017

Rheoliad 20

ATODLEN 4 Adolygiad o benderfyniadau a chydsyniadau

1.   Cyn gynted ag y bo’n rhesymol ymarferol, rhaid i Weinidogion Cymru wneud asesiad priodol o oblygiadau’r prosiect i’r safle Ewropeaidd gyda golwg ar amcanion cadwraeth y safle, er mwyn dyfarnu a fydd y prosiect a ganiateir gan y penderfyniad neu’r cydsyniad yn effeithio’n andwyol ar gyfanrwydd y safle.

2.   At ddibenion yr asesiad, caiff Gweinidogion Cymru—

(a) ei gwneud yn ofynnol i unrhyw berson sydd â buddiant yn y tir perthnasol ddarparu iddynt unrhyw wybodaeth y maent yn ystyried yn rhesymol sy’n angenrheidiol; a

(b) ymgynghori â’r cyhoedd, os ydynt yn ystyried bod hynny’n angenrheidiol.

3.   Oni fydd Gweinidogion Cymru, yn dilyn yr asesiad, wedi eu bodloni na fydd y prosiect a ganiateir gan y penderfyniad neu’r cydsyniad yn effeithio’n andwyol ar gyfanrwydd y safle Ewropeaidd, ac nad yw rheoliad 16(4) yn gymwys, rhaid i Weinidogion Cymru—

(a) yn achos penderfyniad, dirymu’r penderfyniad; a

(b) yn achos cydsyniad, naill ai—

(i) dirymu’r cydsyniad; neu

(ii) gwneud unrhyw addasiadau i’r cydsyniad sy’n ymddangos yn angenrheidiol iddynt er mwyn sicrhau na fydd y prosiect yn effeithio’n andwyol ar gyfanrwydd y safle Ewropeaidd,

a rhaid i Weinidogion Cymru hysbysu pob person y mae’n ymddangos iddynt fod ganddynt fuddiant yn y tir perthnasol am eu penderfyniad (eu “penderfyniad pellach”).

4.   Nid yw penderfyniad pellach yn effeithio ar unrhyw waith sydd eisoes wedi ei wneud mewn perthynas â phenderfyniad neu gydsyniad, yn ddarostyngedig i baragraff 5.

5.—( 1) Os yw—

(a) prosiect sy’n ddarostyngedig i benderfyniad pellach wedi dechrau; a

(b) yn ymddangos i Weinidogion Cymru ei bod yn angenrheidiol diogelu cyfanrwydd y safle Ewropeaidd,

caiff Gweinidogion Cymru ei gwneud yn ofynnol drwy hysbysiad i’r person sy’n gyfrifol am gyflawni’r gwaith hwnnw, neu unrhyw berson â buddiant yn y tir perthnasol, gyflawni unrhyw waith adfer sy’n rhesymol o dan yr amgylchiadau.

(2) Rhaid i hysbysiad o dan is-baragraff (1) ddatgan y cyfnod y mae’n rhaid i’r gwaith gael ei gyflawni ynddo.

(3) Mae hawlogaeth gan berson sy’n cyflawni gwaith adfer o’r fath, wedi iddo gyflwyno hawliad yn unol â pharagraff 8, adennill oddi wrth Weinidogion Cymru ddigollediad mewn cysylltiad ag unrhyw dreuliau yr aethpwyd iddynt yn rhesymol wrth gyflawni’r gwaith hwnnw.

6.   Mae rheoliad 30 yn gymwys i—

(a) penderfyniad pellach a wneir o dan baragraff 3; a

(b) hysbysiad a gyflwynir o dan baragraff 5.

7.   Os yw person, yn dilyn penderfyniad pellach o dan baragraff 3, wedi mynd i gostau wrth wneud gwaith sydd bellach yn ddi-fudd oherwydd y penderfyniad pellach, neu os yw fel arall wedi dioddef colled neu ddifrod y gellir ei phriodoli neu ei briodoli’n uniongyrchol i’r penderfyniad pellach, mae hawlogaeth gan y person i gael digollediad ar ôl cyflwyno hawliad yn unol â pharagraff 8.

8.   Rhaid i hawliad am ddigollediad sy’n daladwy o dan baragraff 5(3) neu 7—

(a) cael ei gyflwyno i Weinidogion Cymru o fewn 6 wythnos i ddyddiad yr hysbysiad am y penderfyniad pellach; a

(b) dod gydag unrhyw dystiolaeth y mae Gweinidogion Cymru yn ei gwneud yn rhesymol ofynnol.

9.   Caniateir i anghydfod ynghylch swm y digollediad sy’n daladwy o dan baragraffau 5(3) a 7 gael ei atgyfeirio i’r Tribiwnlys Tiroedd o fewn 6 mlynedd i ddyddiad yr hysbysiad am y penderfyniad pellach y mae digollediad yn daladwy mewn cysylltiad ag ef.

10.   Nid oes dim yn yr Atodlen hon yn effeithio ar unrhyw beth a wnaed yn unol â phenderfyniad neu gydsyniad cyn y dyddiad y daeth y safle yn safle Ewropeaidd.