1. Enw’r Rheoliadau hyn yw Rheoliadau Cofrestru Deintyddiaeth Breifat (Cymru) 2017 a deuant i rym ar 1 Ebrill 2017.
2. Maeʼr Rheoliadau hyn yn gymwys o ran Cymru.
3.—(1) Yn y Rheoliadau hyn—
ystyr “addasiadau rhesymol” (“reasonable adjustments”) yw’r addasiadau rhesymol hynny a fyddai’n ofynnol o dan Ddeddf Cydraddoldeb 2010(1);
ystyr “ceisydd” (“applicant”) yw’r person sy’n ceisio cael ei gofrestru;
ystyr “cofrestriad” a “cofrestru” (“registration”) yw cofrestriad o dan Ran 2 o’r Ddeddf;
mae i “cwmni daliannol” yr ystyr a roddir i “holding company” gan adran 1159 o Ddeddf Cwmnïau 2006(2);
ystyr “darparwr cofrestredig” (“registered provider”) yw person sydd wedi ei gofrestru o dan Ran 2 o’r Ddeddf fel y person sy’n cynnal practis deintyddol preifat;
ystyr “datganiad o ddiben” (“statement of purpose”) yw’r datganiad ysgrifenedig a lunnir yn unol â rheoliad 5(1) o Reoliadau Deintyddiaeth Breifat (Cymru) 2017;
ystyr “deintydd” (“dentist”) yw person sydd wedi ei gofrestru yn y gofrestr o ddeintyddion a gedwir yn unol ag adran 14 o Ddeddf Deintyddion 1984(3);
ystyr “y Ddeddf” (“the Act”) yw Deddf Safonau Gofal 2000 ac, mewn cysylltiad â Rhan 2 o’r Ddeddf honno, y Rhan honno fel y’i cymhwysir gydag addasiadau i bractisau deintyddol preifat gan Reoliadau Deddf Safonau Gofal 2000 (Estyn Cymhwysiad Rhan 2 i Bractisau Deintyddol Preifat) (Cymru) 2017 a chan reoliad 39 o Reoliadau Deintyddiaeth Breifat (Cymru) 2017;
ystyr “gwasanaethau deintyddol” (“dental services”) yw gofal a thriniaeth ddeintyddol a ddarperir gan ddeintydd;
ystyr “gwasanaethau proffesiynol perthnasol” (“relevant professional services”) yw’r ddarpariaeth o wasanaethau proffesiynol yn unol â chwmpas ymarfer llawn proffesiynolyn gofal deintyddol, ac eithrio yn unol â phresgripsiwn gan ddeintydd ond nid yw’n cynnwys—
darparu gwasanaethau gwynnu dannedd gan hylenydd deintyddol neu therapydd deintyddol, a
darparu a chynnal a chadw dannedd gosod i gleifion â dannedd(4) gan dechnegydd deintyddol clinigol;
ystyr “hylenydd deintyddol” (“dental hygienist”), “therapydd deintyddol” (“dental therapist”) a “technegydd deintyddol clinigol” (“clinical dental technician”) yw personau sydd wedi eu cofrestru felly â’r Cyngor Deintyddol Cyffredinol yn y gofrestr o broffesiynolion gofal deintyddol a sefydlwyd o dan adran 36B o Ddeddf Deintyddion 1984;
mae i “is-gwmni” yr ystyr a roddir i “subsidiary” gan adran 1159 o Ddeddf Cwmnïau 2006;
ystyr “person cofrestredig” (“registered person”) yw person sy’n ddarparwr cofrestredig neu’n rheolwr cofrestredig practis deintyddol preifat;
ystyr “person cyfrifol” (“responsible person”) yw—
pan fo’r ceisydd yn unigolyn—
y ceisydd; ac
os yw’r ceisydd yn cynnal y practis deintyddol preifat mewn partneriaeth ag eraill, neu’n bwriadu gwneud hynny, enw pob partner i’r ceisydd;
pan fo’r ceisydd yn bartneriaeth, pob aelod o’r bartneriaeth;
pan fo’r ceisydd yn sefydliad, yr unigolyn cyfrifol;
ystyr “practis deintyddol preifat” (“private dental practice”)(5) yw ymgymeriad sy’n darparu neu’n cynnwys darparu—
gwasanaethau deintyddol preifat gan ddeintydd, neu
gwasanaethau proffesiynol perthnasol gan broffesiynolyn gofal deintyddol, ac eithrio at ddibenion Deddf y Gwasanaeth Iechyd Gwladol (Cymru) 2006(6);
ystyr “proffesiynolyn gofal deintyddol” (“dental care professional”) yw—
hylenydd deintyddol;
therapydd deintyddol; neu
technegydd deintyddol clinigol;
ystyr “Rheoliadau 2017” (“the 2017 Regulations”) yw Rheoliadau Deintyddiaeth Breifat (Cymru) 2017(7);
ystyr “rheolwr cofrestredig” (“registered manager”) yw person sydd wedi ei gofrestru o dan Ran 2 o’r Ddeddf fel rheolwr practis deintyddol preifat;
ystyr “rhestr perfformwyr deintyddol” (“dental performers list”) yw’r rhestr a luniwyd gan Fwrdd Iechyd Lleol neu Fwrdd Comisiynu’r Gwasanaeth Iechyd Gwladol ac a gyhoeddwyd yn unol â rheoliad 3(1)(b) o Reoliadau’r Gwasanaeth Iechyd Gwladol (Rhestri Perfformwyr) (Cymru) 2004(8) neu reoliadau o dan adran 106 o Ddeddf y Gwasanaeth Iechyd Gwladol 2006(9) fel y bo’n briodol;
ystyr “rhif cofrestru proffesiynol” (“professional registration number”) yw’r rhif gyferbyn ag enw’r person yn y gofrestr o ddeintyddion a gedwir yn unol ag adran 14 o Ddeddf Deintyddion 1984;
ystyr “sefydliad” (“organisation”) yw corff corfforaethol neu unrhyw gymdeithas anghorfforedig ac eithrio partneriaeth;
ystyr “swyddfa briodol yr awdurdod cofrestru” (“appropriate office of the registration authority”) mewn perthynas â phractis deintyddol preifat yw—
os yw swyddfa wedi ei phennu o dan reoliad 3(2) o Reoliadau Deintyddiaeth Breifat (Cymru) 2017, y swyddfa honno;
mewn unrhyw achos arall, unrhyw swyddfa’r awdurdod cofrestru;
mae “triniaethau a all arwain at gysylltiad” (“exposure-prone procedures”), at ddibenion y Rheoliadau hyn, yn cyfeirio at driniaethau mewnwthiol pan fo risg y gall anaf i’r deintydd neu’r proffesiynolyn gofal deintyddol arwain at gysylltiad rhwng meinwe agored claf a gwaed y deintydd neu’r proffesiynolyn gofal deintyddol;
ystyr “unigolyn cyfrifol” (“responsible individual”) yw unigolyn sy’n gyfarwyddwr, rheolwr, ysgrifennydd, neu swyddog arall i sefydliad ac sy’n gyfrifol am oruchwylio’r gwaith o reoli practis deintyddol preifat;
ystyr “yswiriant” (“insurance”) yw—
contract yswiriant sy’n darparu sicrwydd o ran atebolrwyddau a all godi wrth gyflawni gwaith fel deintydd neu broffesiynolyn gofal deintyddol, neu
trefniant a wneir at ddibenion indemnio person rhag atebolrwyddau o’r fath.
(2) Yn y Rheoliadau hyn, mae cyfeiriadau at bractis deintyddol preifat i gael eu dehongli fel cyfeiriadau—
(a)yn achos ceisydd, at y practis deintyddol preifat y mae’r ceisydd yn ceisio cael ei gofrestru mewn cysylltiad ag ef;
(b)yn achos person cofrestredig, at y practis deintyddol preifat y mae’r ceisydd wedi ei gofrestru mewn cysylltiad ag ef.
Dim ond i gleifion diddannedd y caiff technegydd deintyddol clinigol ddarparu’r ystod lawn o wasanaethau drwy drefniadau mynediad uniongyrchol.
Gweler rheoliad 4 o Reoliadau Deintyddiaeth Breifat (Cymru) 2017 am ymgymeriadau nad ydynt yn bractisau deintyddol preifat.