Gorchymyn Digartrefedd (Addasrwydd Llety) (Cymru) 2015

RHAN 3 Addasrwydd llety’r sector rhentu preifat ar gyfer dod â’r ddyletswydd adran 75 i ben i geiswyr digartref

8.   At ddibenion cynnig yn y sector rhentu preifat o dan adran 76 (amgylchiadau pan fo’r ddyletswydd i sicrhau llety ar gyfer ceiswyr sydd mewn angen blaenoriaethol yn dod i ben), ni chaniateir i lety gael ei ystyried yn addas pan fo un neu ragor o’r canlynol yn gymwys—

(a) bod yr awdurdod o’r farn nad yw’r llety mewn cyflwr ffisegol rhesymol;

(b) bod yr awdurdod o’r farn nad yw’r llety yn cydymffurfio â phob gofyniad statudol (megis, pan fo’n gymwys, gofynion sy’n ymwneud â thân, nwy, trydan, carbon monocsid a diogelwch arall; cynllunio; a thrwyddedau ar gyfer tai amlfeddiannaeth); neu

(c) bod yr awdurdod o’r farn nad yw’r landlord yn berson addas a phriodol o fewn ystyr adran 20 i weithredu fel landlord.

Dirymu a darpariaethau trosiannol ac arbed

9.—( 1) Yn ddarostyngedig i baragraff (2), mae’r Gorchmynion a ganlyn drwy hyn wedi eu dirymu—

(a) Gorchymyn Digartrefedd (Addasrwydd Llety) 1996(1) i’r graddau y mae’n gymwys i Gymru;

(b) Gorchymyn Digartrefedd (Addasrwydd Llety) (Diwygio) 1997(2) i’r graddau y mae’n gymwys i Gymru; ac

(c) Gorchymyn Digartrefedd (Addasrwydd Llety) (Cymru) 2006(3).

(2) Mae’r Gorchmynion a ddirymir o dan baragraff (1) yn parhau mewn grym mewn cysylltiad ag unrhyw gais a wnaed o dan adran 183 o Ddeddf Tai 1996 cyn y dyddiad y daw’r Gorchymyn hwn i rym.

(1)

O.S. 1996/3204.

(2)

O.S. 1997/1741.

(3)

O.S. 2006/650 (Cy. 71).