Offerynnau Statudol Cymru
Llywodraeth Leol, Cymru
Gwnaed
25 Mawrth 2015
Mae Gweinidogion Cymru yn gwneud y Gorchymyn a ganlyn drwy arfer y pwerau a roddwyd iddynt gan adran 22(2) a (3) o Ddeddf Is-ddeddfau Llywodraeth Leol (Cymru) 2012(1).
1.—(1) Enw’r Gorchymyn hwn yw Gorchymyn Deddf Is-ddeddfau Llywodraeth Leol (Cymru) 2012 (Cychwyn Rhif 2, Darpariaethau Trosiannol ac Arbedion) 2015.
(2) Yn y Gorchymyn hwn—
(a)ystyr “Deddf 2012” (“the 2012 Act”) yw Deddf Is-ddeddfau Llywodraeth Leol (Cymru) 2012; a
(b)ystyr “Deddf 1972” (“the 1972 Act”) yw Deddf Llywodraeth Leol 1972(2).
2. 31 Mawrth 2015 yw’r diwrnod penodedig ar gyfer dwyn i rym y darpariaethau a ganlyn yn Neddf 2012—
(a)adran 1 (trosolwg);
(b)adran 2 (is-ddeddfau ar gyfer rheolaeth dda a llywodraeth ac atal niwsansau);
(c)adran 3 (ystyr “awdurdod deddfu”);
(d)adran 4 (dirymu gan awdurdod deddfu);
(e)adran 5 (dirymu gan Weinidogion Cymru);
(f)adran 6 (is-ddeddfau pan na fo cadarnhad yn ofynnol) a Rhan 1 o Atodlen 1;
(g)adran 7 (is-ddeddfau pan fo cadarnhad yn ofynnol);
(h)adran 8 (materion ffurfiol, cychwyn a chyhoeddi is-ddeddfau);
(i)adran 10 (tramgwyddau yn erbyn is-ddeddfau);
(j)adran 11 (is-ddeddfau adran 2; pwerau ymafael etc);
(k)adran 12 (y pŵer i gynnig cosbau penodedig am dramgwyddau yn erbyn is-ddeddfau penodol) i’r graddau nad yw eisoes wedi ei chychwyn a Rhan 2 o Atodlen 1;
(l)adran 13 (swm cosb benodedig) i’r graddau nad yw eisoes wedi ei chychwyn;
(m)adran 14 (y pŵer i ofyn am enw a chyfeiriad mewn cysylltiad â chosb benodedig);
(n)adran 15 (y defnydd o dderbyniadau am gosbau penodedig);
(o)adran 17 (Swyddogion Cymorth Cymunedol etc);
(p)adran 18 (canllawiau) i’r graddau nad yw eisoes wedi ei chychwyn;
(q)adran 19 (tystiolaeth o is-ddeddfau); ac
(r)adran 20 (diwygiadau canlyniadol) a pharagraffau 1 i 8, 9(1) i (3), (5) a 10 i 18 o Atodlen 2.
3.—(1) Er i adrannau 2, 4, 6, 7, 8 ac 20 o Ddeddf 2012, ac Atodlenni 1 a 2 iddi, ddod i rym—
(a)nid yw adrannau 2, 4, 6 a 7(3) i (9) ac 8(3) o’r Ddeddf honno, ac Atodlen 2 iddi, yn gymwys i is-ddeddfau a ddisgrifir ym mharagraff (2); a
(b)mae adran 236(3), (4) i (7) ac (11)(3) o Ddeddf 1972 yn gymwys i is-ddeddfau a ddisgrifir yn y paragraff hwnnw.
(2) Mae’r paragraff hwn yn gymwys i is-ddeddfau y mae adrannau 235, 236 a 236B o Ddeddf 1972 yn gymwys iddynt, os cyn y diwrnod penodedig—
(a)bod un neu ragor o’r camau a ganlyn wedi eu cymryd mewn perthynas â hwy—
(i)bod yr awdurdod deddfu sy’n gwneud yr is-ddeddfau wedi rhoi hysbysiad, yn unol ag adran 236(4) o Ddeddf 1972, o’i fwriad i wneud cais am gadarnhad o’r is-ddeddfau yn un neu ragor o’r papurau newydd lleol sy’n cylchredeg yn yr ardal y mae’r is-ddeddfau i fod yn gymwys iddi; neu
(ii)bod copi o’r is-ddeddfau wedi ei adneuo, yn unol ag adran 236(5) o Ddeddf 1972, yn swyddfa’r awdurdod deddfu sy’n gwneud yr is-ddeddfau; a
(b)bod yr awdurdod cadarnhau(4) heb gadarnhau’r is-ddeddf; neu
(c)bod yr awdurdod cadarnhau wedi cadarnhau’r is-ddeddf ond nad yw’r is-ddeddf eto wedi dod yn weithredol.
Leighton Andrews
Y Gweinidog Gwasanaethau Cyhoeddus, un o Weinidogion Cymru
25 Mawrth 2015
(Nid yw’r nodyn hwn yn rhan o’r Gorchymyn)
Gwneir y Gorchymyn hwn o dan adran 22(2) a (3) o Ddeddf Is-ddeddfau Llywodraeth Leol (Cymru) 2012 (“Deddf 2012”). Hwn yw’r ail orchymyn cychwyn i’w wneud o dan Ddeddf 2012.
Mae erthygl 2 o’r Gorchymyn yn darparu mai 31 Mawrth 2015 yw’r diwrnod penodedig ar gyfer dwyn i rym y darpariaethau yn Neddf 2012 a nodir yn yr erthygl honno ac y cyfeirir atynt isod:
adran 1 (trosolwg);
adran 2 (is-ddeddfau ar gyfer rheolaeth dda a llywodraeth ac atal niwsansau);
adran 3 (ystyr “awdurdod deddfu”);
adran 4 (dirymu gan awdurdod deddfu);
adran 5 (dirymu gan Weinidogion Cymru);
adran 6 (is-ddeddfau pan na fo cadarnhad yn ofynnol) a Rhan 1 o Atodlen 1;
adran 7 (is-ddeddfau pan fo cadarnhad yn ofynnol);
adran 8 (materion ffurfiol, cychwyn a chyhoeddi is-ddeddfau);
adran 10 (tramgwyddau yn erbyn is-ddeddfau);
adran 11 (is-ddeddfau adran 2; pwerau ymafael etc);
adran 12 (y pŵer i gynnig cosbau penodedig am dramgwyddau yn erbyn is-ddeddfau penodol) i’r graddau nad yw eisoes wedi ei chychwyn a Rhan 2 o Atodlen 1;
adran 13 (swm cosb benodedig) i’r graddau nad yw eisoes wedi ei chychwyn;
adran 14 (y pŵer i ofyn am enw a chyfeiriad mewn cysylltiad â chosb benodedig);
adran 15 (y defnydd o dderbyniadau am gosbau penodedig);
adran 17 (Swyddogion Cymorth Cymunedol etc);
adran 18 (canllawiau) i’r graddau nad yw eisoes wedi ei chychwyn;
adran 19 (tystiolaeth o is-ddeddfau); ac
adran 20 (diwygiadau canlyniadol) ac Atodlen 2 ond nid paragraff 9(4) o’r Atodlen honno.
Mae erthygl 3 yn gwneud darpariaethau trosiannol ac arbedion mewn cysylltiad ag is-ddeddfau y mae un neu ragor o’r camau a ddisgrifir yn erthygl 3(2)(a) wedi eu cymryd mewn perthynas â hwy cyn y diwrnod penodedig.
Daeth adrannau 18(1) (canllawiau), 21 (gorchmynion a rheoliadau), 22 (cychwyn), a 23 (enw byr) o Ddeddf 2012 i rym ar 30 Tachwedd 2012.
Mae’r darpariaethau a ganlyn yn Neddf 2012 wedi eu dwyn i rym o ran Cymru drwy orchymyn cychwyn a wnaed cyn dyddiad y Gorchymyn hwn:
| Y Ddarpariaeth | Y Dyddiad Cychwyn | Rhif O.S. |
|---|---|---|
| adran 9 (y pŵer i ddiwygio Rhan 1 o Atodlen 1 i Ddeddf 2012) | 15 Awst 2014 | O.S. 2014/2121 (Cy. 207) |
| adran 12(13) (y pŵer i wneud rheoliadau i ragnodi amodau i’w bodloni gan berson cyn y caiff cyngor cymuned awdurdodi’r person i roi hysbysiadau cosb benodedig o dan Ddeddf 2012) | 15 Awst 2014 | O.S. 2014/2121 (Cy. 207) |
| adran 13(3) (y pŵer i wneud rheoliadau mewn cysylltiad â swm cosbau penodedig) | 15 Awst 2014 | O.S. 2014/2121 (Cy. 207) |
| adran 13(4) (y pŵer i’w gwneud yn ofynnol bod swm cosb benodedig yn dod o fewn ystod a ragnodir ac i gyfyngu ar y rhychwant y caiff awdurdod wneud darpariaeth o dan adran 13(1)(b) o Ddeddf 2012 a chyfyngu ar yr amgylchiadau pan all wneud hynny) | 15 Awst 2014 | O.S. 2014/2121 (Cy. 207) |
| adran 16 (y pŵer i ddiwygio Rhan 2 o Atodlen 1 i Ddeddf 2012) | 15 Awst 2014 | O.S. 2014/2121 (Cy. 207) |
Diwygiwyd is-adran (1) o adran 236 o Ddeddf 1972 gan adran 84 o Ddeddf Llywodraeth Leol 1985 (p. 51), a pharagraff 31(1) o Atodlen 14 iddi.Diwygiwyd is-adran (3) o adran 236 o Ddeddf 1972 gan O.S. 2001/3719. Diwygiwyd is-adran (9) o’r adran honno, a mewnosodwyd is-adran (10A) o’r adran honno, gan baragraff 50 o Atodlen 15 i Ddeddf Llywodraeth Leol (Cymru) 1994 (p. 19). Ceir diwygiadau eraill i adran 236 o Ddeddf 1972 nad ydynt yn berthnasol i’r Gorchymyn hwn.
Gweler adran 236(11) o Ddeddf 1972 ar gyfer ystyr “confirming authority”. Mae swyddogaeth yr Ysgrifennydd Gwladol yn yr adran hon yn cael ei harfer yn gydredol â Chynulliad Cenedlaethol Cymru yn unol ag erthygl 2 o Orchymyn Cynulliad Cendlaethol Cymru (Trosglwyddo Swyddogaethau) 1999 (O.S. 1999/672), ac Atodlen 1 iddi. Trosglwyddwyd y swyddogaeth hon bellach i Weinidogion Cymru yn rhinwedd gweithrediad adran 162 o Ddeddf Llywodraeth Cymru 2006 (p. 32) a pharagraff 30 o Atodlen 11 iddi.