9. Ni cheir penodi person yn aelod o'r panel addysg oni fodlonir Gweinidogion Cymru—
(a)nad yw'r person yn gymwys i'w benodi'n Gadeirydd; a
(b)bod gan y person wybodaeth a phrofiad cyfredol o blant sydd ag—
(i)anghenion addysgol arbennig; neu
(ii)anableddau; neu
(iii)pan fo'n ofynnol, y ddau.
10.—(1) Mae awdurdodaeth y Tribiwnlys i gael ei harfer gan y cyfryw nifer o banelau tribiwnlys ag y penderfynir gan y Llywydd o bryd i'w gilydd.
(2) Mae'r panelau tribiwnlys sy'n arfer yr awdurdodaeth a roddir iddynt yn unol â pharagraff (1) i eistedd ar y cyfryw adegau, ac yn y cyfryw fannau a benderfynir o bryd i'w gilydd gan y Llywydd.
11.—(1) Yn ddarostyngedig i reoliad 45(5), rhaid i banel tribiwnlys gael ei gyfansoddi o berson a benodir yn Gadeirydd, ynghyd â dau aelod arall.
(2) Ar gyfer pob gwrandawiad—
(a)rhaid i'r Cadeirydd fod yn naill ai'r Llywydd neu'n berson a ddewisir gan y Llywydd o'r panel o bersonau a benodir o dan adran 333(2) o Ddeddf 1996; a
(b)rhaid i'r ddau aelod arall fod yn bersonau a ddewisir gan y Llywydd o'r panel addysg.