Rheoliadau Ymweliadau â Phlant dan Gadwad a fu'n Derbyn Gofal (Cymru) 2011

Dehongli

2.—( 1) Yn y Rheoliadau hyn—

• ystyr “A” (“A”) yw plentyn a fu'n derbyn gofal gan awdurdod lleol ond nad yw'n derbyn gofal ganddo bellach(1) o ganlyniad i'r amgylchiadau a ragnodir yn rheoliad 3;

• ystyr “awdurdod lleol cyfrifol” (“responsible local authority”) yw'r awdurdod lleol a oedd yn darparu gofal i A cyn i A gael ei gadw'n gaeth;

• ystyr “Deddf 1989” (“the 1989 Act”) yw Deddf Plant 1989;

• ystyr “diwrnod gwaith” (“working day”) yw diwrnod nad yw'n ddydd Sadwrn, yn ddydd Sul, yn Ddydd Nadolig, yn Ddydd Gwener y Groglith nac yn ŵyl y Banc o fewn ystyr Deddf Bancio a Thrafodion Ariannol 1971(2);

• ystyr “R” (“R”) yw cynrychiolydd yr awdurdod cyfrifol a benodir i ymweld ag A yn unol â'r trefniadau a wnaed ganddo o dan adran 23ZA o Ddeddf 1989;

• “rheolwr achos tîm troseddau ieuenctid perthnasol” (“relevant youth offending team case manager”) yw'r person o fewn tîm troseddau ieuenctid yr awdurdod lleol cyfrifol(3) sy'n rheoli achos A;

• ystyr “sefydliad” (“institution”) yw sefydliad troseddwyr ifanc, canolfan hyfforddi ddiogel neu gartref diogel i blant; ac

• ystyr “cartref diogel i blant” (“secure children’s home”) yw cartref plant sy'n cael ei ddefnyddio at y diben o gyfyngu ar ryddid person sydd wedi ei gofrestru o dan Ran II o Ddeddf Safonau Gofal 2000(4).

(2) Nid yw'r Rheoliadau hyn yn gymwys i blentyn sy'n blentyn perthnasol at ddibenion adran 23A o Ddeddf 1989(5).

(1)

Er mwyn canfod ystyr plentyn “looked after” gweler adran 22(1) o Ddeddf 1989, fel y'i diwygiwyd gan adran 107 o Ddeddf Llywodraeth Leol 2000 a pharagraff 19 o Atodlen 5 iddi (p.22), adran 2 o Ddeddf Plant (Ymadael â Gofal) 2000 (p.35) a chan adran 116(2) o Ddeddf Mabwysiadu a Phlant 2002. Mae “Local authority” yn cael ei ddiffinio gan adran 105(1) o Ddeddf 1989 fel “the council of a county or county borough”, o ran Cymru.

(2)

1971 p.80.

(3)

O dan adran 39(1) o Ddeddf Trosedd ac Anhrefn 1998 (p.37) mae dyletswydd gan awdurdod lleol i sefydlu un neu fwy o dimau troseddau ieuenctid ar gyfer ei ardal.

(4)

2000 p.14.

(5)

Mae adran 23A(2) yn darparu bod “relevant child” yn blentyn: (a) nad yw'n derbyn gofal gan unrhyw awdurdod lleol; (b) a oedd, cyn y tro diwethaf i'r gofal a ddarperir iddo ddod i ben, yn blentyn cymwys at ddibenion paragraff 19B o Atodlen 2 i Ddeddf 1989; ac (c) yn 16 neu 17 mlwydd oed. Mae adran 23B o Ddeddf 1989 yn disgrifio swyddogaethau ychwanegol yr awdurdod cyfrifol mewn perthynas â phlant perthnasol.