Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Gorchymyn hwn yn diwygio'r rhestr o gyrff a geir yng Ngorchymyn Addysg (Cyrff sy'n Cael eu Rhestru) (Cymru) 2007 (“Gorchymyn 2007”).

Mae Gorchymyn 2007 yn rhestru enw pob corff nad yw'n gorff cydnabyddedig o fewn adran 216(4) o Ddeddf Diwygio Addysg 1988 ond yr ymddengys i Weinidogion Cymru ei fod naill ai—

(a) yn darparu cwrs sydd yn baratoad at ddyfarnu gradd gan gorff cydnabyddedig o'r fath ac a gymeradwyir gan y corff hwnnw neu ar ei ran; neu

(b) yn goleg cyfansoddol, yn ysgol, yn neuadd neu'n sefydliad arall sy'n rhan o brifysgol sy'n gorff cydnabyddedig.

Ystyr “cyrff cydnabyddedig” yw prifysgolion, colegau neu gyrff eraill a awdurdodir gan Siarter Frenhinol neu gan Ddeddf Seneddol neu oddi tani i roi graddau, a chyrff eraill y mae'r cyrff hynny'n caniatáu iddynt am y tro weithredu ar eu rhan wrth ddyfarnu graddau.

Mae'r Gorchymyn hwn yn diweddaru'r rhestr o gyrff a geir yn yr Atodlen i'r Gorchymyn hwnnw. Caiff nifer o gyrff eu hepgor o'r Atodlen gan nad ydynt bellach yn darparu cyrsiau a gymeradwyir gan gorff cydnabyddedig neu ar ei ran. Mae'r Atodlen yn cynnwys cyrff nad oeddynt wedi'u rhestru mewn Gorchmynion blaenorol, ond sydd bellach yn darparu cyrsiau a gymeradwyir gan sefydliad cydnabyddedig neu ar ei ran. Cafodd nifer o fân newidiadau hefyd eu gwneud i'r Atodlen i gymryd ystyriaeth o newidiadau i enwau a gafodd eu gwneud ers pan wnaed Gorchymyn 2007.