Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio ymhellach Reoliadau'r Gwasanaeth Iechyd Gwladol (Treuliau Teithio a Pheidio â Chodi Tâl) (Cymru) 2007 (“y prif Reoliadau”).

Mae'r prif Reoliadau yn gwneud darpariaeth fel bod pobl sydd naill ai'n cael budd-daliadau penodol oddi wrth y wladwriaeth neu sydd ar incwm isel yn cael peidio â thalu taliadau penodol neu gael ad-daliad ohonynt, a'r taliadau hynny fel arall yn daladwy o dan Ddeddf y Gwasanaeth Iechyd Gwladol (Cymru) 2006 (“taliadau GIG”) a chael taliad am dreuliau teithio a dynnwyd wrth gael gwasanaeth GIG penodol (“treuliau teithio GIG”).

Wrth gyfrifo adnoddau a gofynion person o dan y prif Reoliadau er mwyn canfod a oes gan berson hawl i beidio â thalu taliadau GIG a chael taliad am dreuliau teithio GIG, defnyddir fersiwn addasedig o Reoliadau Cymhorthdal Incwm (Cyffredinol) 1987 (“y Rheoliadau Cymhorthdal Incwm”).

Mae rheoliad 2 yn gwneud darpariaeth ar gyfer cyfrifo adnoddau a gofynion aelodau o briodasau amlgymar.

Mae rheoliad 3 yn darparu, pan fo person sy'n cael lwfans cyflogaeth a chymorth a bod sancsiwn yn ei erbyn o dan reoliad 63 o Reoliadau Lwfans Cyflogaeth a Chymorth 2008, bod hawl y person hwnnw i beidio â thalu taliadau GIG ac i gael taliad am dreuliau GIG yn cael ei chyfrifo fel na bai'r sancsiwn yn ei erbyn. Mae rheoliad 3 hefyd yn darparu ar gyfer diystyriadau penodol i bobl sy'n ymgymryd â gwaith esempt o dan reoliad 45 o Reoliadau Lwfans Cyflogaeth a Chymorth 2008.

Mae rheoliad 4 yn darparu ar gyfer pobl o dan 25 oed gael eu cynnwys wrth gyfrifo eu hawl i beidio â thalu taliadau GIG a chael taliad am dreuliau teithio GIG a lwfans personol o swm sydd gymaint â'r swm ar gyfer person sy'n 25 oed neu'n hyn. Bydd hyn yn gymwys i bobl sydd naill ai yn cael lwfans cyflogaeth a chymorth ac y dyfarnwyd cydran lwfans cyflogaeth a chymorth iddynt, neu sy'n analluog i weithio am gyfnod parhaus o 28 wythnos ers 27 Hydref 2008. Mae rheoliad 3 hefyd yn darparu ar gyfer cynnwys amryw o bremiymau wrth gyfrifo ar gyfer hawl i gael peidio â thalu taliadau GIG ac i gael taliad am dreuliau teithio GIG ac i'r bobl hynny sy'n cael lwfans cyflogaeth a chymorth.