Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Swn Amgylcheddol (Cymru) 2006 (O.S. 2006/2629).

Mae rheoliad 3(2) yn mewnosod diffiniad o “map sŵn cyfunol” yn y rhestr o eiriau a thermau a ddefnyddir yn Rheoliadau Sŵn Amgylcheddol (Cymru) 2006 (“Rheoliadau 2006”). Mae rheoliad 3(3) yn diwygio'r diffiniad o “Cyfarwyddeb” yn rheoliad 2 o Reoliadau 2006 fel y bydd cyfeiriadau at y Gyfarwyddeb yn Rheoliadau 2006 i'w dehongli fel cyfeiriadau at y Gyfarwyddeb fel y'i diwygir o bryd i'w gilydd yn unol â'r pŵer a gynhwysir ym mharagraff 1A o Atodlen 2 i Ddeddf y Cymunedau Ewropeaidd 1972. Mae rheoliad 3(4) yn gwneud mân gywiriad i'r diffiniad o “prif faes awyr” yn rheoliad 2.

Mae rheoliad 4 yn diwygio rheoliad 3 o Reoliadau 2006 fel bod y ffynonellau sŵn a restrir yn rheoliad 3 yn cael eu nodi o 2011 ymlaen drwy gyhoeddi mapiau.

Mae rheoliad 5 yn diwygio rheoliad 13 o Reoliadau 2006 fel y bydd yn ofynnol i ardaloedd tawel yn y crynodrefi cylch cyntaf a'r crynodrefi gael eu nodi yn y cynlluniau gweithredu ar gyfer y crynodrefi hynny.

Mae rheoliad 6(1) yn diwygio rheoliad 15(1)(ch) o Reoliadau 2006 fel y bydd yn rhaid i'r cynlluniau gweithredu a lunnir o dan Ran 4 o'r Rheoliadau nodi ac ystyried blaenoriaethau o ran canllawiau a gyhoeddir gan Weinidogion Cymru o dan reoliad 30(1). Mae rheoliad 6(2) yn diwygio rheoliad 15(4) o Reoliadau 2006 drwy wneud darpariaeth sy'n rhoi i Weinidogion Cymru y pŵer i wneud mapiau swn cyfunol.

Mae rheoliad 7 yn diwygio rheoliad 30 o Reoliadau 2006 drwy wneud darpariaeth sy'n rhoi i Weinidogion Cymru bŵer diwygiedig i ddyroddi canllawiau i awdurdodau cymwys, a thrwy osod dyletswydd ar awdurdodau cymwys i roi sylw i'r canllawiau hynny.

Mae asesiad effaith rheoleiddiol llawn o'r effaith y bydd yr offeryn hwn yn ei chael ar gostau busnes ac ar y sector gwirfoddol ar gael gan Y Gangen Ymbelydredd ac Atal Llygredd, Ynni a Diwydiant Cynaliadwy Cymru, Llywodraeth Cynulliad Cymru, Parc Cathays, Caerdydd, CF10 3NQ ac mae wedi ei atodi i'r Memorandwm Esboniadol sydd ar gael ochr yn ochr â'r offeryn ar wefan OPSI.