Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn diwygio Rheoliadau Ardrethu Annomestig (Casglu a Gorfodi) (Rhestri Lleol) 1989, Rheoliadau Ardrethu Annomestig (Casglu a Gorfodi) (Rhestri Canolog) 1989 a Rheoliadau'r Dreth Gyngor (Gweinyddu a Gorfodi) 1992 o ran Cymru. Mae'n darparu ar gyfer cyflwyno hysbysiadau a gwybodaeth benodol drwy gyfathrebiad electronig ar berson sydd wedi cytuno i dderbyn cyflwyniad electronig.

Mae erthygl 3 yn mewnosod diffiniadau newydd yn rheoliad 1 o'r Rheoliadau Ardrethu Annomestig (Casglu a Gorfodi) (Rhestri Lleol) 1989 (“Rheoliadau 1989”).

Mae erthygl 4(2) yn ychwanegu paragraffau newydd i reoliad 2 o Reoliadau 1989.

O dan y paragraff (3) newydd o reoliad 2 caniateir cyflwyno unrhyw hysbysiad o dan Ran II (Bilio) neu o dan reoliad 11 (Gorchmynion dyled: camau rhagarweiniol) o Reoliadau 1989 neu unrhyw wybodaeth y mae angen ei chyflenwi pan gyflwynir hysbysiadau galw am dalu yn rhinwedd Rheoliadau Ardrethu Annomestig (Hysbysiadau Galw am Dalu) (Cymru) 1993 yn electronig ar berson sydd wedi cytuno i dderbyn dogfennau o'r fath drwy gyflwyniad electronig. Fel arall, os yw'r awdurdod bilio wedi cytuno â'r derbynnydd, caniateir cyhoeddi'r dogfennau hyn ar wefan a chaniateir i'r awdurdod bilio hysbysu'r derbynnydd ei fod wedi gwneud hynny, ac o ble y gellir canfod yr hysbysiad neu'r wybodaeth a sut mae cael atynt.

Mae'r paragraff (4) newydd yn darparu y bernir y bydd hysbysiad o dan Ran II neu o dan reoliad 11 wedi cael ei gyflwyno at ddibenion unrhyw achos cyfreithiol ar yr ail ddiwrnod busnes ar ôl y diwrnod y'i hanfonwyd neu, os cyhoeddwyd ef ar wefan, ar yr ail ddiwrnod busnes ar ôl hysbysu ei gyhoeddi.

Mae'r paragraff (5) newydd yn darparu fod rhaid i'r sawl sy'n cael hysbysiadau neu wybodaeth o'r fath hysbysu'r awdurdod bilio yn ysgrifenedig o unrhyw newid yn eu cyfeiriad electronig.

Mae'r paragraffau (6) a (7) newydd yn eu trefn yn gwneud darpariaeth i'r derbynnydd dynnu'n ôl ei gytundeb i dderbyn dogfennau o'r fath drwy gyflwyniad electronig neu i gael at ddogfennau o'r fath ar wefan.

Mae'r Gorchymyn hwn hefyd yn diwygio Rheoliadau Ardrethu Annomestig (Casglu a Gorfodi) (Rhestri Canolog) 1989 o ran Cymru.

Mae erthygl 6 yn mewnosod diffiniadau newydd yn rheoliad 2 ac mae erthygl 7 yn disodli rheoliad 3. Mae'r rheoliad 3(1) newydd yn caniatáu cyflwyno'n electronig hysbysiadau y mae angen i Weinidogion Cymru eu cyflwyno (yn benodol hysbysiadau galw am dalu o dan reoliad 4 a hysbysiadau galw am dalu pellach o dan reoliad 8). Oni fydd trethdalwr yn pennu cyfeiriad ar gyfer cyflwyniad electronig, bydd y trethdalwr hwnnw yn parhau i gael hysbysiadau ar bapur. Mae paragraffau (3) a (4) o'r rheoliad 3 newydd yn darparu fod rhaid i'r rheini sy'n cael hysbysiadau electronig roi gwybod i Weinidogion Cymru yn ysgrifenedig o unrhyw newid yn eu cyfeiriad electronig ac y caniateir iddynt dynnu'n ôl eu cytundeb i dderbyn cyflwyniad electronig.

Diwygir Rheoliadau'r Dreth Gyngor (Gweinyddu a Gorfodi) 1992 mewn modd cyffelyb i Reoliadau 1989 gan erthygl 9 sy'n mewnosod diffiniadau newydd yn rheoliad 1 a chan erthygl 10 sy'n ychwanegu paragraffau (4) i (8) newydd at reoliad 2.