Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio'r Rheoliadau Ardrethu Annomestig (Casglu a Gorfodi) (Rhestri Lleol) 1989 (“y Rheoliadau Rhestri Lleol”) a'r Rheoliadau Ardrethu Annomestig (Casglu a Gorfodi) (Rhestri Canolog) 1989 (“y Rheoliadau Rhestri Canolog”) i wneud darpariaeth arbennig ynglŷn â chasglu ardrethi annomestig sy'n daladwy mewn perthynas â'r flwyddyn ariannol sy'n cychwyn ar 1 Ebrill 2009 (“y flwyddyn ariannol 2009/10”). Mae'r Rheoliadau hyn hefyd yn gwneud addasiadau canlyniadol i Reoliadau Cyfraniadau Ardrethu Annomestig (Cymru) 1992 a Rheoliadau Ardrethu Annomestig (Hysbysiadau Galw am Dalu) (Cymru) 1993.

Mae'r Rheoliadau Rhestri Lleol a'r Rheoliadau Rhestri Canolog yn darparu ar gyfer diwallu'r rhwymedigaeth ardrethi flynyddol mewn rhandaliadau. Fodd bynnag, o dan y cynllun rhandalu presennol, mae'r rhandaliadau yn daladwy yn y flwyddyn ariannol y mae'r hysbysiad galw am dalu yn berthynol iddi.

Mae'r Rheoliadau hyn yn mewnosod Atodlen 1D newydd yn y Rheoliadau Rhestri Lleol ac Atodlen 1B newydd yn y Rheoliadau Rhestri Canolog i wneud darpariaeth sy'n caniatáu i drethdalwr, sy'n ddarostyngedig i ardrethi annomestig mewn perthynas â'r flwyddyn ariannol 2009/10, os yw'n bodloni amodau penodol, ohirio talu cyfran benodedig o'r rhwymedigaeth honno tan y blynyddoedd ariannol sy'n cychwyn ar 1 Ebrill 2010 ac 1 Ebrill 2011.

Pennir yr amodau y mae'n rhaid eu bodloni cyn y caiff trethdalwr fanteisio ar ohiriad ym mharagraff 1 o'r Atodlen 1D newydd ac ym mharagraff 1 o'r Atodlen 1B newydd, lle y darperir hefyd bod y trethdalwr i hysbysu'r awdurdod bilio o'i ddymuniad i ohirio.

Mewn perthynas â'r Rheoliadau Rhestri Lleol, mae paragraffau 2 i 4 o'r Atodlen 1D newydd yn gwneud darpariaeth ynglŷn â'r cyfrifiadau y mae'n rhaid i'r awdurdod bilio eu gwneud er mwyn penderfynu'r swm y caiff trethdalwr ei ohirio (“y swm gohiriadwy”) a'r swm y mae'n rhaid ei dalu yn y flwyddyn ariannol 2009/10 (“y swm anohiriadwy”).

Mae paragraffau 5 i 7 yn gwneud darpariaeth ynghylch talu'r swm anohiriadwy. Ym mharagraff 8 gwneir darpariaeth ynghylch terfynu rhandaliadau pan fo trethdalwr yn peidio â meddiannu'r eiddo. Mae paragraff 9 yn darparu ar gyfer addasu'r rhandaliadau yn ystod y flwyddyn ariannol 2009/10 pan fo angen ailgyfrifo, am ba bynnag reswm, y swm sy'n daladwy gan y trethdalwr, neu'r swm y mae'r trethdalwr yn gymwys i gael ei ohirio.

Mae paragraff 10 yn gwneud darpariaeth ynglŷn â'r modd y mae'r swm gohiriadwy i'w dalu yn y blynyddoedd ariannol sy'n cychwyn ar 1 Ebrill 2010 ac 1 Ebrill 2011.

Mae paragraff 11 yn addasu rheoliad 8 o'r Rheoliadau Rhestri Lleol i ddarparu, os yw trethdalwr yn peidio â thalu unrhyw randaliad sy'n ddyledus ynglŷn â'r swm gohiriadwy, y bydd y darpariaethau yn y Rheoliadau hynny sy'n ymwneud â gorfodi yn gymwys mewn perthynas â'r swm hwnnw.

Mae paragraffau 12 a 13 yn ymdrin â therfynu ac addasu rhandaliadau yn y blynyddoedd ariannol sy'n cychwyn ar 1 Ebrill 2010 ac 1 Ebrill 2011.

Mae paragraff 14 yn addasu rheoliad 4 o'r Rheoliadau Rhestri Lleol fel y caiff yr awdurdod bilio, mewn perthynas â'r blynyddoedd ariannol 2010/11 a 2011/12, pan fo trethdalwr wedi gohirio talu ardrethi o dan yr Atodlen newydd, ddyroddi hysbysiad sengl a fydd yn ymwneud â'r swm taladwy mewn perthynas â'r flwyddyn honno yn ogystal â thalu'r swm gohiriadwy.

Mae paragraffau 2 i 14 o'r Atodlen 1B newydd i'r Rheoliadau Rhestri Canolog yn gwneud darpariaeth gyfatebol ynglŷn â thalu ardrethi yn y flwyddyn ariannol sy'n cychwyn ar 1 Ebrill 2009/10 gan drethdalwyr sydd â'u henwau ar y rhestr ardrethu canolog.

Mae rheoliad 4 o'r Rheoliadau hyn yn addasu'r diffiniad o “relevant year” yn rheoliad 2 o Reoliadau Ardrethu Annomestig (Hysbysiadau Galw am Dalu) (Cymru) 1993, fel, pan ddyroddir hysbysiad galw am dalu o dan reoliad 4 o'r Rheoliadau Rhestri Lleol (fel y'u haddesir gan y Rheoliadau hyn), ynglŷn â thalu ardrethi mewn perthynas â'r flwyddyn ariannol a fydd yn cychwyn ar 1 Ebrill 2010 neu 1 Ebrill 2011 a thalu'r swm gohiriadwy, na fydd raid i'r hysbysiad gynnwys dim ac eithrio'r wybodaeth ofynnol o dan y Rheoliadau Hysbysiadau Galw am Dalu, sy'n berthynol i'r flwyddyn ariannol a fydd yn cychwyn ar 1 Ebrill 2010 neu 2011 (yn ôl fel y digwydd).

Mae rheoliad 5 o'r Rheoliadau hyn yn addasu rheoliad 6 (ailgyfrifo symiau amodol) o Reoliadau Cyfraniadau Ardrethu Annomestig (Cymru) 1992 (“Rheoliadau 1992”) mewn perthynas â'r flwyddyn ariannol 2009/10. Yn Rheoliadau 1992, gwneir darpariaeth ynghylch cyfrifo'r cyfraniadau ardrethu annomestig y mae'n ofynnol i'r awdurdodau bilio eu gwneud i Weinidogion Cymru. Mae'r addasiad, sy'n gymwys o ran y flwyddyn ariannol 2009/10, yn dileu trothwyon ariannol, a fyddent, fel arall, islaw iddynt, yn atal awdurdod bilio rhag ailgyfrifo ei gyfraniad amodol am y flwyddyn. Gwneir hyn er mwyn galluogi'r awdurdodau i ailgyfrifo'u cyfraniadau ardrethu annomestig, wedi i drethdalwyr ohirio talu ardrethi mewn perthynas â'r flwyddyn 2009/10 o dan y Rheoliadau hyn.