Offerynnau Statudol

2009 Rhif 1673 (Cy.158)

ADDYSG, CYMRU

Gorchymyn Addysg (Ciniawau Ysgol am Ddim) (Credyd Treth Gwaith) (Cymru) 2009

Gwnaed

1 Gorffennaf 2009

Gosodwyd gerbron Cynulliad Cenedlaethol Cymru

3 Gorffennaf 2009

Yn dod i rym

3 Awst 2009

Mae Gweinidogion Cymru, drwy arfer y pwerau a roddwyd i'r Ysgrifennydd Gwladol gan adrannau 512ZB(4)(a)(iv) a 568 o Ddeddf Addysg 1996(1) ac a freiniwyd bellach ynddynt hwy, yn gwneud y Gorchymyn a ganlyn:

Enwi, cychwyn a chymhwyso

1.—( 1) Enw'r Gorchymyn hwn yw Gorchymyn Addysg (Ciniawau Ysgol am Ddim) (Credyd Treth Gwaith) (Cymru) 2009. Daw i rym ar 3 Awst 2009 ac mae'n gymwys o ran Cymru.

(2) Yn y Gorchymyn hwn—

• mae i “Credyd Treth Gwaith” yr un ystyr â “Working Tax Credit” yn Neddf 2002; ac

• ystyr “Deddf 2002” (“the 2002 Act”) yw Deddf Credydau Treth 2002(2).

Credyd treth rhagnodedig

2.   Mae Credyd Treth Gwaith wedi'i ragnodi at ddibenion adran 512ZB(4)(a)(iv) o Ddeddf Addysg 1996 o dan amgylchiadau pan fo rhiant sydd â hawl i'w gael yn cael ei drin fel un sy'n gwneud gwaith cymwys sy'n talu (o fewn ystyr Deddf 2002) yn rhinwedd rheoliad 7D o Reoliadau Credyd Treth Gwaith (Yr Hawl i'w Gael a'r Gyfradd Uchaf) 2002(3).

Jane Hutt

Y Gweinidog dros Blant, Addysg, Dysgu Gydol Oes a Sgiliau, un o Weinidogion Cymru

1 Gorffennaf 2009

Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn rhagnodi, at ddibenion adran 512ZB o Ddeddf Addysg 1996, Gredyd Treth Gwaith pan fo gan riant hawl i gael y Credyd hwnnw o dan yr amgylchiadau a ddiffinnir yn rheoliad 7D o Reoliadau Credyd Treth Gwaith (Yr Hawl i'w Gael a'r Gyfradd Uchaf) 2002.

Effaith y Gorchymyn, pan fo gan riant hawl i gael Credyd Treth Gwaith yn ystod y cyfnod o bedair wythnos yn union ar ôl i'w waith cyflogedig beidio, neu ar ôl i'r rhiant ddechrau gweithio am lai na 16 o oriau yr wythnos, yw bod gan ei blentyn hawl i gael ciniawau ysgol am ddim.

(1)

1996 p.56. Mewnosodwyd adran 512ZB gan adran 201 o Ddeddf Addysg 2002. Trosglwyddwyd swyddogaethau'r Ysgrifennydd Gwladol o dan adran 512ZB (gweler y diffiniad o “prescribed” yn adran 512 o Ddeddf 1996) ac adran 568 i Gynulliad Cenedlaethol Cymru gan adran 211 o Ddeddf Addysg 2002 a Gorchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672) yn ôl eu trefn. Trosglwyddwyd y swyddogaethau wedyn i Weinidogion Cymru gan baragraff 30 o Atodlen 11 i Ddeddf Llywodraeth Cymru 2006 (p.32).

(2)

2002 p.21.

(3)

O.S. 2002/2005 fel y'i diwygiwyd gan Reoliadau Credyd Treth Gwaith (Yr Hawl i'w Gael a'r Gyfradd Uchaf) (Diwygio) 2007/968.