Nodyn Esboniadol

(Nid yw'r nodyn hwn yn rhan o'r Rheoliadau)

Mae Rheoliadau Symud Ymaith a Gwaredu Cerbydau 1986 (“Rheoliadau 1986”) yn darparu ar gyfer symud ymaith a gwaredu cerbydau o dan adrannau 3 a 4 o Ddeddf Gwaredu Sbwriel (Amwynder) 1978 (“Deddf 1978”) ac adrannau 99 a 101o Ddeddf Rheoleiddio Traffig Ffyrdd 1984 (“Deddf 1984”).

Cafodd swyddogaethau yr Ysgrifennydd Gwladol o dan adrannau 3 a 4 o Ddeddf 1978 eu trosglwyddo i Gynulliad Cenedlaethol Cymru gan Orchymyn Cynulliad Cenedlaethol Cymru (Trosglwyddo Swyddogaethau) 1999, OS 1999/672, erthygl 2 ac Atodlen 1. Cafodd swyddogaethau yr Ysgrifennydd Gwladol o dan adrannau 99 a 101 o Ddeddf 1984 eu trosglwyddo i Gynulliad Cenedlaethol Cymru gan Orchymyn Cynulliad Cenedlaethol Cymru (Trosglwyddo Swyddogaethau) 2004, OS 2004/3044, erthygl 2 ac Atodlen 1. Cafodd holl swyddogaethau Cynulliad Cenedlaethol Cymru eu trosglwyddo i Weinidogion Cymru yn rhinwedd paragraff 30 o Atodlen 11 i Ddeddf Llywodraeth Cymru 2006.

Mae'r Rheoliadau hyn yn diwygio Rheoliadau 1986 o ran Cymru (ac eithrio'r rhannau hynny o Groesfannau'r Hafren sydd yng Nghymru) er mwyn caniatáu i swyddogion gorfodi symud ymaith gerbydau sydd wedi cael eu gadael i sefyll ar ffordd o fewn ardal orfodi sifil yng Nghymru.

Ni chaiff symudiad ymaith o'r fath ddigwydd ond pan fo swyddog gorfodi sifil wedi gosod hysbysiad o dâl cosb ar y cerbyd, neu wedi traddodi hysbysiad o'r fath i'r person y mae'n ymddangos ei fod yn gyfrifol am y cerbyd.

Ni fydd hysbysiadau tâl cosb a ddyroddir mewn perthynas â cherbydau mewn mannau parcio dynodedig o ran taliadau parcio, methiant i arddangos tocyn parcio neu ddyfais barcio neu fethiant i symud y cerbyd ymaith o fan parcio ar ddiwedd cyfnod y talwyd amdano yn gwarantu symud y cerbyd dan sylw ymaith, hyd nes bydd yr “appropriate period” fel y'i diffinnir gan y rheoliad 5C(4) newydd wedi dod i ben.

Gellir cael Asesiad Effaith Reoleiddiol lawn a Memorandwm Esboniadol o'r Uned Trafnidiaeth Integredig, yr Is-adran Cynllunio a Gweinyddu, Trafnidiaeth Cymru, Llywodraeth Cynulliad Cymru, Swyddfeydd y Goron, Parc Cathays, Caerdydd, CF10 3NQ neu wefan Cynulliad Cenedlaethol Cymru ar http://www.cynulliadcymru.org/bushome/buslegislation/bus/bus-legislation-sub/bus-legislation-sub annulment.htm%20 http:/www.assemblywales.org/bus-home/buslegislation/bus/bus-legislation-sub/bus-legislation-sub-annulment.htm