Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Awdurdodau Lleol (Cyllid Cyfalaf a Chyfrifyddu) (Cymru) 2003 (“Rheoliadau 2003”) ac maent yn gymwys o ran awdurdodau lleol yng Nghymru.

Mae rheoliad 3 yn rhoi darpariaethau newydd yn lle'r rhai yn Rheoliadau 2003 sy'n ymdrin â chyfrifo isafswm darpariaeth refeniw — sef y swm y mae awdurdod lleol yn codi ar ei gyfrif refeniw mewn cysylltiad ag ariannu gwariant cyfalaf. Mae rheoliad 22 newydd yn disodli'r gofyniad bod awdurdodau lleol yn gwneud cyfrifiadau manwl â dyletswydd newydd i wneud darpariaeth ddarbodus.

Mae rheoliad 4 yn diwygio darpariaethau penodol yn rheoliad 24C o Reoliadau 2003, sy'n ymwneud â phremiymau a disgowntiau ar fenthyciadau sy'n cael eu codi gan awdurdodau lleol a'u had-dalu'n gynnar, er mwyn i'r darpariaethau hynny adlewyrchu'r rhai cyfatebol yn rheoliad 24B.

Mae rheoliad 5 yn mewnosod rheoliadau 24E a 24F newydd yn Rhan 6 o Reoliadau 2003. Mae'r rheoliadau newydd yn rhoi i awdurdodau lleol rywfaint o hyblygrwydd yn y ffordd y maent yn rhoi cyfrif am fenthyciadau ar gyfradd llog gynyddrannol yr ymrwymwyd iddynt cyn 21 Ionawr 2008 ac am warantau ariannol a roesant cyn y dyddiad hwnnw.