Cofrestrau gwaith stryd

4.—( 1) Yn ddarostyngedig i reoliad 13 ac i'r gofynion a osodir ym mharagraffau (2) a (3), rhaid i gofrestrau gwaith stryd gael eu cadw mewn modd fydd yn galluogi'r wybodaeth y cyfeirir ati ym mharagraffau (4) a (5), ynglŷn â stryd benodol, i gael ei holrhain.

(2) Rhaid i bob cofrestr—

(a) fod wedi'i mynegeio;

(b) heb fod yn ddiweddarach na 1 Ebrill 2009, fod yn seiliedig ar system wybodaeth ddaearyddol; ac

(c) ddynodi'r awdurdod priffyrdd mewn perthynas â phob stryd yn ardal yr awdurdod sy'n briffordd a gynhelir.

(3) Rhaid i bob cofrestr a gedwir gan awdurdod priffyrdd lleol fod ar ffurf sydd yn cydymffurfio â'r system o gyfeirnodi strydoedd a bennir yn Rhan I o'r cyhoeddiad a ddyroddwyd gan y Sefydliad Safonau Prydeinig ar 1 Awst 2006 dan yr enw: “Spatial data sets for geographical referencing — specification for a street gazetteer” o dan gyfeirnod Rhif BS 7666-1 2006(1) fel y'i hadolygwyd neu y'i hail ddyroddwyd o bryd i'w gilydd,

(4) Caiff yr wybodaeth mewn perthynas â gwaith stryd sydd i ymddangos ar y gofrestr a'r person, ymhob achos, sydd â'r cyfrifoldeb o sicrhau ei gofrestru, eu pennu yng ngholofnau (1) a (2) yn eu trefn o'r Tabl a ganlyn.

Tabl

(1) Gwybodaeth		(2) Y person sydd â'r cyfrifoldeb o sicrhau ei gofrestru
1.	Manylion pob hysbysiad o dan adrannau 54, 55 a 57 a gyflwynwyd i'r awdurdod priffyrdd ynglŷn â gwaith stryd mewn unrhyw stryd sy'n briffordd a gynhelir.	Yr ymgymerwr perthnasol.
2.	Manylion pob hysbysiad o dan adrannau 54, 55 a 57 a gyflwynwyd i reolwyr strydoedd ynglŷn â gwaith stryd mewn unrhyw stryd nad yw'n briffordd a gynhelir.	Yr ymgymerwr perthnasol.
3.	Manylion pob cyfarwyddyd a roddwyd o dan adrannau 56 a 56A.	Yr awdurdod strydoedd perthnasol.
4.	Manylion pob hysbysiad, cydsyniad a chyfarwyddyd a gyhoeddwyd neu a roddwyd gan awdurdod strydoedd o dan adrannau 58 a 58A.	Yr awdurdod strydoedd perthnasol.
5.	Manylion pob hysbysiad a wnaed gan ymgymerwr o dan baragraff 2(1)(d) o Atodlen 3A i Ddeddf 1991.	Yr ymgymerwr perthnasol.
6.	Manylion pob hysbysiad a gyflwynwyd gan awdurdod strydoedd o dan adran 66.	Yr awdurdod strydoedd perthnasol.
7.	Gwybodaeth o dan adran 70(3) a (4A) ynglŷn â chwblhau gwaith adfer.	Yr ymgymerwr perthnasol.
8.	Manylion pob hysbysiad a roddwyd gan awdurdod strydoedd o dan adran 72(3).	Yr awdurdod strydoedd perthnasol.
9.	Manylion pob hysbysiad a roddwyd gan ymgymerwr o dan adran 74.	Yr ymgymerwr perthnasol.
10.	Manylion pob hysbysiad a roddwyd gan awdurdod strydoedd o dan adran 74	Yr awdurdod strydoedd perthnasol.
11.	Disgrifiad o waith stryd y cyflwynwyd planiau a thrychluniau ar ei gyfer o dan Atodlen 4 i Ddeddf 1991 a'i leoliad.	Yr ymgymerwr perthnasol.
12.	Manylion pob hysbysiad a roddwyd gan unrhyw awdurdod perthnasol o dan Atodlen 4 i Ddeddf 1991.	Yr awdurdod perthnasol.

(5) Caiff yr wybodaeth mewn perthynas â mathau eraill o waith a materion eraill sydd i ymddangos ar y gofrestr a'r person, ymhob achos, sydd â'r cyfrifoldeb o sicrhau ei gofrestru, eu pennu yng ngholofnau (1) a (2) yn eu trefn o'r Tabl a ganlyn.

Tabl

(1) Gwybodaeth		(2) Y person sydd â'r cyfrifoldeb o sicrhau ei gofrestru
1.	Pob stryd y mae'r awdurdod priffyrdd lleol yn awdurdod strydoedd drosti.	Yr awdurdod priffyrdd lleol.
2.	Pob stryd sydd yn briffordd a gynhelir yn rhagolygol	Yr awdurdod priffyrdd lleol.
3.	Pob stryd y mae'r awdurdod priffyrdd lleol yn ymwybodol ohoni sydd yn briffordd, ond nad yw'r awdurdod hwnnw yn awdurdod strydoedd drosti.	Yr awdurdod priffyrdd lleol.
4.	Pob stryd (a) sydd — (i) yn stryd a warchodir(2); (ii) yn stryd ag iddi anawsterau peirianyddol arbennig neu (iii) yn stryd sy'n sensitif i draffig, gan gynnwys, pan fydd yn briodol, fanylion y rhannau o'r stryd a ddynodwyd felly ac, yn achos stryd sy'n sensitif i draffig, unrhyw ddynodiad cyfyngedig; neu (b) y bwriedir ei dynodi felly.	Yr awdurdod strydoedd perthnasol.
5.	Disgrifiad, amseriad a lleoliad gwaith at ddibenion ffyrdd a gwaith pwysig priffyrdd sy'n golygu — (a) darnio'r briffordd; (b) agor cerbytffordd stryd sy'n sensitif i draffig ar adeg sy'n sensitif i draffig; neu (c) lleihau lled y gerbytffordd sydd ar gael i draffig cerbydol— (i) o un neu fwy o lonydd traffig; (ii) o fwy na thraean mewn achos lle nad oes lonydd o'r fath; neu (iii) o unrhyw led mewn stryd sy'n sensitif i draffig ar adeg sensitif i draffig, ac unrhyw waith o'r fath y bwriedir ei wneud.	Yr awdurdod strydoedd perthnasol.
6.	Manylion pob cydsyniad a roddwyd gan awdurdod strydoedd o dan adran 61 gyda manylion unrhyw amodau.	Yr awdurdod strydoedd perthnasol.
7.	Manylion pob cyfarwyddyd a roddwyd o dan adran 62.	Yr awdurdod strydoedd perthnasol.
8.	Manylion trwyddedau gwaith stryd, gan gynnwys manylion amodau a newidiadau mewn perchenogaeth.	Yr awdurdod strydoedd perthnasol.
9.	Manylion yr offer yr hysbyswyd yr awdurdod strydoedd ohono o dan adran 80(2).	Yr awdurdod strydoedd perthnasol.
10.	Pob hysbysiad o waith o dan adran 85(2)	Yr awdurdod perthnasol.
11.	Manylion cau ffyrdd a gwyriadau pan fo angen gorchymyn o dan adran 14 o Ddeddf 1984.	Yr awdurdod priffyrdd.
12.	Categori ffordd pob stryd.	Yr awdurdod strydoedd perthnasol

(6) Mae gwybodaeth o'r mathau a ganlyn yn wybodaeth gyfyngedig at ddibenion adran 53(3);

(a) gwybodaeth a gafodd ei ardystio gan neu a awdurdodwyd drwy yr Ysgrifennydd Gwladol dros Drafnidiaeth ei bod yn wybodaeth gyfyngedig oherwydd y byddai ei datgelu yn rhagfarnu gwarchod diogelwch gwladol, neu'n debygol o wneud hynny, a

(b) gwybodaeth a gafodd ardystiad neu awdurdodiad ymgymerwr ei bod yn wybodaeth gyfyngedig oherwydd y byddai ei datgelu yn rhagfarnu buddiannau masnachol yr ymgymerwr hwnnw, neu'n debygol o wneud hynny.

(7) Yn y rheoliad hwn—

• mae i “lôn draffig” yr un ystyr ag sydd i'r ymadrodd “traffic lane” yn rheoliad 4 o Reoliadau 2002 ac mae'n cynnwys llain galed.

• mae i “llain galed” yr un ystyr ag sydd i'r ymadrodd “hard shoulder” o dan reoliad 4 o Reoliadau 2002 ac mae'n cynnwys o ran unrhyw briffordd nad yw'n draffordd unrhyw lain galed a luniwyd i gymryd pwysau cerbyd ac y mae ei ochr dde neu ei ymyl bellaf wedi'i ddynodi ag arwydd traffig o'r math a ddangosir yn niagram 1012.3 yn Atodlen 2 i'r Rheoliadau hynny;

• ystyr “y person sydd â'r cyfrifoldeb o sicrhau ei gofrestru” (“person responsible for securing registration”) mewn perthynas ag unrhyw wybodaeth, yw'r person sydd â'r cyfrifoldeb dros drosglwyddo'r cyfryw wybodaeth i'r awdurdod strydoedd i'w gofrestru yn y gofrestr gwaith stryd;

• ystyr “system wybodaeth ddaearyddol” (“geographical information system”) yw system ar gyfer dal, storio, gwirio, integreiddio, manipiwleiddio, dadansoddi ac arddangos data sy'n gysylltiedig â phwyntiau ar wyneb y Ddaear; ac

• mae i “traffordd” yr un ystyr ag sydd i “motorway” o dan reoliad 4 o Reoliadau 2002.

(1)

ISBN 0 580 48710 5.

(2)

Gweler adrannau 61 a 62 o Ddeddf Ffyrdd Newydd a Gwaith Stryd 1991 (1991 p.22).