Nodyn Esboniadol

(Nid yw'r nodyn hwn yn rhan o'r Rheoliadau.)

Mae'r Rheoliadau hyn yn gosod yr amgylchiadau pan fo'r posibilrwydd o wrthdrawiad buddiannau yn gyfryw ag nad oes modd i weithiwr proffesiynol iechyd meddwl cymeradwy wneud cais a grybwyllir yn adran 11(1) o Ddeddf Iechyd Meddwl 1983 (p.20), fel y'i diwygiwyd gan Ddeddf lechyd Meddwl 2007 (p.12), neu nad oes modd i ymarferydd meddygol cofrestredig wneud argymhelliad meddygol at ddibenion cais a grybwyllir yn adran 12(1) i berson gael ei dderbyn o dan y Ddeddf.

Bydd gan weithiwr proffesiynol iechyd meddwl cymeradwy sy'n ystyried gwneud cais i berson gael ei dderbyn dan y Ddeddf neu ymarferydd meddygol cofrestredig sy'n ystyried rhoi argymhelliad meddygol at ddibenion cais o'r fath wrthdrawiad buddiannau posibl am amryw o resymau. Mae'r rhesymau hynny yn rhai proffesiynol (rheoliad 3), yn rhai ariannol (rheoliad 4), yn rhai busnes (rheoliad 5) neu oherwydd perthynas bersonol (rheoliad 6) sy'n bodoli rhwng y person hwnnw ac asesydd arall, neu rhwng y person hwnnw a naill ai y claf neu, pan fo'r cais i gael ei wneud gan berthynas agosaf y claf, y perthynas agosaf.

Mae yna ddarpariaeth i weithiwr proffesiynol iechyd meddwl cymeradwy neu i ymarferydd meddygol cofrestredig wneud cais neu argymhelliad meddygol er gwaethaf gwrthdrawiad buddiannau posibl petai yna fel arall oedi gyda risg difrifol i iechyd neu ddiogelwch y claf neu bobl eraill.

Ni luniwyd asesiad effaith reoleiddiol llawn ar gyfer yr offeryn hwn gan ragwelir y caiff effaith arwyddocaol ar y sector preifat nac ar y sector gwirfoddol.