Nodyn Esboniadol

(Nid yw'r nodyn hwn yn rhan o'r Gorchymyn)

Mae Atodlen 3 i Ddeddf Traffig Ffyrdd 1991 yn gwneud darpariaeth ar gyfer dynodi ardaloedd parcio a ganiateir ac ardaloedd parcio arbennig. Mae paragraff 1(1) yn rhoi'r pŵer i Weinidogion Cymru i ddynodi'r cyfan neu unrhyw ran o ardal cyngor sir neu gyngor bwrdeistref sirol yng Nghymru yn ardal barcio a ganiateir yn dilyn cais gan yr awdurdod lleol. Mae paragraff 2(1) yn rhoi pŵer cyffelyb mewn perthynas ag ardaloedd parcio arbennig.

Caiff y Gorchymyn hwn ei wneud yn dilyn cais gan Gyngor Bwrdeistref Sirol Wrecsam (“yr awdurdod lleol”) ac ymgynghoriad statudol â Phrif Gwnstabl Heddlu Gogledd Cymru ac â'r Cyngor ar Dribiwnlysoedd.

Effaith y Gorchymyn hwn yw dynodi'n ardal barcio a ganiateir ac yn ardal barcio arbennig y cyfan o fwrdeistref sirol Wrecsam heblaw am y darn cyfan o'r A483 sydd o fewn y fwrdeistref sirol, gan gynnwys ei slipffyrdd ymuno a'i slipffyrdd ymadael, ac heblaw hefyd am yr A5 tua'r de o'i chyffordd â'r A483 i'r ffin sirol â Swydd Amwythig ac am yr A5 tua'r gorllewin o'i chyffordd â'r A483 i'w chyffordd â'r B5070 (“yr ardal barcio”). Unwaith y bydd y Gorchymyn mewn grym, rhoddir y pŵer i swyddogion parcio a gyflogir gan yr awdurdod lleol (neu a gyflogir yn swyddogion parcio gan berson y mae'r awdurdod lleol wedi gwneud trefniadau ag ef) i osod hysbysiadau ffioedd cosb ar gerbydau sy'n torri rheoliadau parcio a chânt, mewn achosion priodol, awdurdodi llusgo ymaith neu barlysu cerbydau.

Yn rhinwedd y Gorchymyn, mae'r ffioedd cosb yn yr ardal barcio i'w gosod gan yr awdurdod lleol gan roi ystyriaeth i ganllawiau a roddir gan Weinidogion Cymru. Gall yr awdurdod lleol eu hadennill fel dyledion sifil. Gwneir darpariaeth ar gyfer gwneud sylwadau i'r awdurdod lleol os digwydd i ffi gosb gael ei rhoi neu os digwydd i gerbyd gael ei lusgo ymaith neu ei barlysu. Gwaith dyfarnwyr parcio a benodwyd gan gyd-bwyllgor a ffurfiwyd yn unol â threfniadau a wnaed o dan adran 101(5) o Ddeddf Llywodraeth Leol 1972 fydd dyfarnu os cyfyd anghytundebau.