Enwi a chychwyn

1.   Daw'r Gorchymyn hwn a enwir Gorchymyn Traffig Ffyrdd (Ardal Barcio a Ganiateir ac Ardal Barcio Arbennig) (Bwrdeistref Sirol Wrecsam) i rym ar 1 Mawrth 2008.

Dehongli

2.   Yn y Gorchymyn hwn:

ystyr “yr ardal barcio” (“the parking area”) yw'r ardal a ddynodir yn ardal barcio a ganiateir ac yn ardal barcio arbennig gan erthygl 4 o'r Gorchymyn hwn;

ystyr “Deddf 1984” (“the 1984 Act”) yw Deddf Rheoleiddio Traffig Ffyrdd 1984(1); ac

ystyr “Deddf 1991” (“the 1991 Act”) yw Deddf Traffig Ffyrdd 1991.

Cymhwyso

3.   Mae'r Gorchymyn hwn yn gymwys i fwrdeistref sirol Wrecsam yn ei chyfanrwydd heblaw am —

(a) y darn cyfan o'r A483, gan gynnwys ei slipffyrdd ymuno a'i slipffyrdd ymadael, sy'n dod o fewn y fwrdeistref sirol;

(b) yr A5 tua'r de o'i chyffordd â'r A483 cyn belled â'r ffin sirol â Swydd Amwythig; ac

(c) yr A5 tua'r gorllewin o'i chyffordd â'r A483 i'w chyffordd â'r B5070.

Dynodi ardal barcio a ganiateir ac ardal barcio arbennig

4.   Mae Gweinidogion Cymru drwy hyn yn dynodi'r ardal y mae'r Gorchymyn hwn yn gymwys iddi—

(a) yn ardal barcio a ganiateir; a

(b) yn ardal barcio arbennig.

Addasu a chymhwyso Rhan II o Ddeddf 1991

5.   Mae adrannau 66, 69 i 74, 78, 79 ac 82 o Ddeddf 1991, ac Atodlen 6 iddi, yn gymwys mewn perthynas â'r ardal barcio ac yn ôl y cymhwysiad hwnnw maent yn effeithiol yn ddarostyngedig i'r addasiadau a bennir yn Atodlen 1 i'r Gorchymyn hwn.

Addasu Deddf 1984

6.   Caiff Deddf 1984 ei haddasu mewn perthynas â'r ardal barcio fel a bennir yn Atodlen 2 i'r Gorchymyn hwn.

Ieuan Wyn Jones

Y Gweinidog dros yr Economi a Thrafnidiaeth, un o Weinidogion Cymru

8 Chwefror 2008