Dadansoddiad eilaidd gan Gemegydd y Llywodraeth

20.—( 1) Pa fo sampl wedi ei chadw o dan reoliad 19 ac —

(a) pan fwriedir cychwyn achos cyfreithiol yn erbyn person am drosedd o dan y Rheoliadau hyn, neu pan fo achos o'r fath wedi ei gychwyn; a

(b) mae'r erlyniad yn bwriadu dyfynnu fel tystiolaeth ganlyniad y dadansoddiad a grybwyllir uchod,

mae paragraffau (2) i (7) yn gymwys.

(2) Bydd y swyddog awdurdodedig —

(a) yn gallu gweithredu fel a ganlyn, o'i wirfodd ef neu hi ei hun; neu

(b) yn gweithredu fel gan ganlyn —

(i) os bydd yr erlynydd (a bwrw bod hwnnw'n rhywun heblaw'r swyddog awdurdodedig) yn gwneud cais i'r perwyl hwnnw;

(ii) os bydd y llys yn gwneud gorchymyn i'r perwyl hwnnw; neu

(iii) (yn ddarostyngedig i baragraff (6)) os bydd y diffynnydd yn gwneud cais i'r perwyl hwnnw,

sef anfon y rhan argadwedig o'r sampl at Gemegydd y Llywodraeth i'w dadansoddi.

(3) Bydd Cemegydd y Llywodraeth yn dadansoddi'r rhan a anfonwyd ato ef neu hi o dan baragraff (2), ac yn anfon at y swyddog awdurdodedig dystysgrif sy'n nodi canlyniadau'r dadansoddiad.

(4) Bydd unrhyw dystysgrif o ganlyniadau'r dadansoddiad sy'n cael ei throsglwyddo gan Gemegydd y Llywodraeth yn cael ei llofnodi ganddo ef neu hi neu ar ei ran, ond gall unrhyw berson gynnal y dadansoddiad dan gyfarwyddyd y sawl sy'n llofnodi'r dystysgrif.

(5) Bydd y swyddog awdurdodedig, yn syth ar ôl ei derbyn, yn darparu copi o dystysgrif Cemegydd y Llywodraeth o'r dadansoddiad ar gyfer yr erlynydd (os yw hwnnw'n rhywun heblaw'r swyddog awdurdodedig) a'r diffynnydd.

(6) Pan fo cais yn cael ei wneud o dan baragraff (2)(b)(iii), caiff y swyddog awdurdodedig gyflwyno hysbysiad ysgrifenedig i'r diffynnydd yn gofyn am daliad o ffi sydd wedi ei nodi yn yr hysbysiad ar gyfer talu rhai neu'r cyfan o gostau Cemegydd y Llywodraeth am gyflawni'r swyddogaethau o dan baragraff (3); ac yn absenoldeb cytundeb gan y diffynnydd i dalu'r ffi a nodir yn yr hysbysiad, caiff y swyddog awdurdodedig wrthod cydymffurfio â'r cais.

(7) Yn y rheoliad hwn, mae “diffynnydd” yn cynnwys darpar-ddiffynnydd.