Troseddau a chosbau

13.—( 1) Mae unrhyw berson —

(a) sydd yn mynd yn groes i ddarpariaethau rheoliad 8(2), 10(3), (4), (6) neu (7), neu 11(1) neu (3);

(b) sydd yn rhwystro'n fwriadol unrhyw berson sy'n gweithredu i gyflawni Rheoliad 1935/2004, Rheoliad 2023/2006 neu'r Rheoliadau hyn, neu'n methu heb esgus rhesymol i ddarparu unrhyw gymorth neu wybodaeth y mae'r person hwnnw'n ei cheisio'n rhesymol; neu

(c) sydd yn darparu'n ymwybodol neu'n fyrbwyll wybodaeth sydd yn anwir neu'n gamarweiniol mewn unrhyw fanylyn perthnasol, mewn cydymffurfiad honedig ag unrhyw ofyniad a grybwyllir yn is-baragraff (b),

yn euog o drosedd.

(2) Mae unrhyw berson sydd yn euog o drosedd o dan y Rheoliadau hyn yn agored —

(a) yn achos trosedd a grybwyllir ym mharagraff (1)(a) neu (c) neu yn rheoliad 4 neu 5 —

(i) i ddirwy, neu i garchariad am dymor o ddim mwy na dwy flynedd, neu'r ddau, o'i gael yn euog drwy dditiad;

(ii) i ddirwy o ddim mwy na'r uchafswm statudol, neu i dymor yng ngharchar o ddim mwy na 6 mis, neu'r ddau, yn dilyn collfarn ddiannod; a

(b) yn achos trosedd a grybwyllir ym mharagraff (1)(b) — i dymor yng ngharchar o ddim mwy na 3 mis, neu i ddirwy o ddim mwy na lefel 5 ar y raddfa safonol, neu'r ddau, yn dilyn collfarn ddiannod.

(3) Ni ddylid dehongli unrhyw beth ym mharagraff (1)(b) fel gofyniad ar unrhyw berson i ateb unrhyw gwestiwn neu roi unrhyw wybodaeth os gallai ei hunan-argyhuddo drwy wneud hynny.