Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn, o ran Cymru, yn cymryd lle Rheoliadau Cartrefi Symudol (Datganiad Ysgrifenedig) 1983, sy'n cael eu dirymu i'r graddau y maent yn gymwys o ran Cymru.

Mae adran 1(2) o Ddeddf Cartrefi Symudol 1983 (“Deddf 1983”) yn darparu bod rhaid i berchennog y safle, cyn gwneud cytundeb y mae adran 1 o Ddeddf 1983 yn gymwys iddo, roi datganiad ysgrifenedig i ddarpar feddiannydd cartref symudol. Mae adran 1 yn gymwys i bob cytundeb sy'n rhoi hawl i berson osod cartref symudol ar safle gwarchodedig ac i'w feddiannu fel ei unig breswylfa neu ei brif breswylfa. Caiff “protected site” ei ddiffinio yn adran 5(1) o Ddeddf 1983.

Mae adran 1(2)(a) i (d) o Ddeddf 1983 yn ei gwneud yn ofynnol bod y datganiad ysgrifenedig;

• yn pennu enwau a chyfeiriadau'r partïon;

• yn cynnwys manylion am y tir y mae gan ddarpar feddiannydd yr hawl i osod y cartref symudol arno sy'n ddigonol i adnabod y tir hwnnw.

• yn gosod y telerau datganedig sydd i'w rhoi yn y cytundeb; ac

• yn gosod y telerau sydd yn oblygedig drwy adran 2(1) o Ddeddf 1983.

Mae rheoliad 3 o'r Rheoliadau hyn yn ei gwneud yn ofynnol bod y datganiad ysgrifenedig yn cynnwys deunydd sy'n ychwanegol at yr hyn sy'n ofynnol gan adran 1(2)(a) i (d) a'i fod yn y ffurf a osodir yn yr Atodlen. Mae pum Rhan i'r Atodlen:

• Mae Rhan 1 yn ymdrin ag enwau a chyfeiriadau'r partïon ac â manylion am y tir, ac â thermau datganedig penodol, sef ffi'r llain, adolygiadau ohono a ffioedd ychwanegol;

• Mae Rhan 2 yn cynnwys gwybodaeth ynghylch hawliau'r meddiannydd o dan y cytundeb arfaethedig;

• Mae Rhan 3 yn cynnwys y telerau sydd yn oblygedig drwy adran 2(1) o Ddeddf 1983, fel a osodir yn Rhan 1 o Atodlen 1 i Ddeddf 1983 (fel y'i diwygiwyd gan adran 207 o Ddeddf Tai 2004 (p.34) a Gorchymyn Deddf Cartrefi Symudol 1983 (Diwygio Atodlen 1) (Cymru) 2007 (O.S.2007/3151 (Cy.268));

• Mae Rhan 4 yn cynnwys y darpariaethau atodol sy'n berthnasol i gymeradwyaeth perchennog safle o ddarpar brynwr y cartref symudol neu o'r aelod o'r teulu y mae'r cartref symudol yn mynd i gael ei roi iddo fel a osodir yn Rhan 3 o Atodlen 1 i Ddeddf 1983;

• Mae Rhan 5 ar gyfer unrhyw delerau datganedig eraill yn y cytundeb.

Mae'r Rheoliadau hyn yn gymwys mewn perthynas â datganiadau ysgrifenedig a roddir ar ôl 30 Tachwedd 2007 ynghylch safleoedd gwarchodedig yng Nghymru.