Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio'r Rheoliadau a ganlyn:

(a) Rheoliadau Hadau Betys (Cymru) 2005 (O.S. 2005/3037 (Cy.225));

(b) Rheoliadau Hadau Yd (Cymru) 2005 (O.S. 2005/3036 (Cy.224));

(c) Rheoliadau Hadau Planhigion Porthiant (Cymru) 2005 (O.S. 2005/1207 (Cy.79));

(ch) Rheoliadau Hadau Planhigion Olew a Ffibr (Cymru) 2004 (O.S. 2004/2881 (Cy.251));

(d) Rheoliadau Hadau Llysiau (Cymru) 2005 (O.S. 2005/3035 (Cy.223));

(dd) Rheoliadau Hadau (Cofrestru, Trwyddedu a Gorfodi) (Cymru) 2005 (O.S. 2005/3038 (Cy.226));

Mae'r Rheoliadau hyn yn gweithredu Penderfyniad y Cyngor 2005/834/EC, sy'n diwygio Penderfyniad y Cyngor 2003/17/EC (OJ Rhif L 312, 29.11.2005, t. 51). Maent yn gwneud diwygiadau er mwyn trefnu bod rhai hadau cyn-sylfaenol sydd wedi eu hardystio'n swyddogol mewn trydydd gwledydd yn dod o fewn cwmpas y Rheoliadau diwygiedig, gan ganiatáu i hadau o'r fath gael eu marchnata os ydynt yn bodloni gofynion y Rheoliadau hynny (rheoliadau 2(2)(b) a (5), 3(2)(b) a (7), 4(2)(b) a (7) a 5(2)(b) a (7)). Maent yn gwneud diwygiadau canlyniadol i ddarpariaethau ynglyn â labelu hadau o'r fath (rheoliadau 2(4), 3(6), 4(6) a 5(6)), ac yn gwneud diwygiadau canlyniadol pellach.

Mae'r Rheoliadau hyn yn gweithredu Cyfarwyddeb y Comisiwn 2006/124/EC, sy'n diwygio Cyfarwyddeb y Cyngor 2002/55/EC ynglyn â marchnata hadau llysiau (OJ Rhif L 339, 6.12.2006, t. 12). Maent hefyd yn gweithredu rhanddirymiad o'r gofyniad i gymhwyso darpariaethau marchnata Cyfarwyddeb y Cyngor 2002/55/EC mewn perthynas â phedair o rywogaethau ac un isrywogaeth a ganiatawyd gan Benderfyniad y Comisiwn 2007/321/EC (OJ Rhif L 119, 9.5.2007, t .48). Maent yn diwygio Rheoliadau Hadau Llysiau (Cymru) 2005 er mwyn ychwanegu india-corn neu bopgorn at y rhestr o rywogaethau rheoledig, ac yn gwneud mân ddiwygiadau i rai o enwau ac enwau cyffredin rhywogaethau rheoledig eraill (rheoliad 6(3)). Maent hefyd yn gosod safonau ar gyfer india-corn/popgorn o ran purdeb dadansoddol a chynnwys hadau rhywogaethau eraill o blanhigion, yn ogystal â phwysau lotiau a samplau (rheoliad 6(5) a (6)). Maent hefyd yn gwneud mân ddiwygiadau canlyniadol i'r Rheoliadau hynny (rheoliad 6(4) ac (8)) ac i Reoliadau Hadau (Cofrestru, Trwyddedu a Gorfodi) 2002 (rheoliad 8). Mae mân ddiwygiad yn cael ei wneud hefyd i'r olaf o'r Rheoliadau hynny er mwyn newid y math o ddyfais samplu sy'n cael ei ddefnyddio mewn perthynas â phys y maes.

Mae'r Rheoliadau hyn yn gwneud diwygiadau o ganlyniad i ymaelodaeth Bwlgaria a Rwmania yn Aelod-wladwriaethau (rheoliadau 2(2)(a), 3(2)(a), 4(2)(a) a 5(2)(a)).

Mae'r Rheoliadau hyn yn cywiro mân wallau sy'n deillio o ddiwygiadau a wnaed gan Reoliadau Hadau (Cymru) (Diwygiadau ar gyfer Cynnal Profion a Threialu etc.) 2007 (rheoliadau 2(3), 3(5), 4(5), 5(5) a 6(7)).

Nid oes asesiad effaith reoleiddiol llawn wedi ei lunio ar gyfer yr offeryn hwn.