Dehongliad

2.   Yn y Rheoliadau hyn—

ystyr “awdurdod” (“authority”) yw awdurdod gwasanaethau plant;

ystyr “awdurdod esgobaethol priodol” (“appropriate diocesan authority”), o ran un o ysgolion yr Eglwys yng Nghymru neu un o ysgolion yr Eglwys Gatholig, yw—

(i)

y Bwrdd Cyllid Esgobaethol, neu berson arall sydd wedi ei ddynodi gan Gynulliad Cenedlaethol Cymru o dan adran 142 (1) o Ddeddf 1998 (yn ôl y digwydd), ar gyfer pob esgobaeth o'r Eglwys yng Nghymru, a

(ii)

esgob pob esgobaeth o'r Eglwys Gatholig,

y mae unrhyw ran o'i hardal (yn y ddau achos) yn gorwedd oddi mewn i ardal yr awdurdod;

ystyr “Cynllun Plant a Phobl Ifanc” (“Children and Young People’s Plan”) yw'r cynllun y cyfeirir ato yn rheoliad 3 (2);

ystyr “Deddf 1998” (“the 1998 Act”) yw Deddf Safonau a Fframwaith Ysgolion 1998(1);

ystyr “Deddf 2004” (“the 2004 Act”) yw Deddf Plant 2004;

ystyr “Partneriaeth Plant a Phobl Ifanc” (“Children and Young People’s Partnership”) yw'r bartneriaeth rhwng yr awdurdod, pob un o bartneriaid perthnasol yr awdurdod, a phersonau neu gyrff eraill sy'n arfer swyddogaethau neu'n ymwneud â gweithgareddau o ran plant a phobl ifanc yn ardal yr awdurdod;

mae i “partneriaid perthnasol” (“relevant partners”) yr un ystyr ag a roddir iddo yn adran 25 o Ddeddf 2004;

mae i “personau ifanc perthnasol” (“relevant young persons”) yr un ystyr ag a roddir iddo yn adran 26 (6) o Ddeddf 2004;

mae i “ysgol a gynhelir gan awdurdod addysg lleol” (“school maintained by a local education authority”) (gan gynnwys unrhyw gyfeiriad at ysgol a gynhelir gan awdurdod penodol) yr ystyr a roddir iddo gan adran 142 (1) o Ddeddf 1998.

mae i “ysgol yr Eglwys Gatholig” (“Roman Catholic Church school”) yr ystyr a roddir iddo gan adran 142 (1) o Ddeddf 1998;

mae i “ysgol yr Eglwys yng Nghymru” (“Church in Wales school”) yr ystyr a roddir iddo gan adran 142 (1) o Ddeddf 1998;

(1)

1998 p.31